തിരുവനന്തപുരം: പിഎസ്സി പോലീസ് കോണ്സ്റ്റബിള് പരീക്ഷയിലെ ക്രമക്കേട് കേസിലെ പ്രതികളായ മൂന്ന് പേരൊഴികെ മറ്റുള്ളവരെ നിയമിക്കുന്നതില് തടസമില്ലെന്ന് ക്രൈംബ്രാഞ്ച്. എസ്എഫ്ഐ നേതാക്കളായ ശിവരഞ്ജിത്ത്, നസീം, പ്രണവ് എന്നിവരൊഴികയുള്ളവരെ നിയമിക്കുന്നതില് തടസമില്ല. ഇത് സംബന്ധിച്ച വിഷയത്തിത്തില് ക്രൈംബ്രാഞ്ച് മേധാവി ടോമിന് തച്ചങ്കരി പിഎസ്സിക്ക് കത്ത് നല്കി.
മൂന്ന് പ്രതികള് ഒഴികെയുള്ളവര് ക്രമക്കേട് നടത്തിയതിനോ കോപ്പിയടിച്ചതിനോ തെളിവുകളില്ല. മറ്റുള്ളവരെ നിയമിക്കുന്നതിനുമുന്പ് പോലീസിന്റെ വിശദമായ പരിശോധന വേണമെന്നും തച്ചങ്കരി പിഎസ്സി സെക്രട്ടറിക്ക് നല്കിയ കത്തില് പറയുന്നു.
തിരുവനന്തപുരം യൂണിവേഴ്സിറ്റി കോളേജിലെ കുത്തുകേസുമായി ബന്ധപ്പെട്ട് എസ്എഫ്ഐ നേതാക്കളെ കസ്റ്റഡിയിലെടുത്തപ്പോഴായിരുന്നു പിഎസ്സി പരീക്ഷയില് ക്രമക്കേട് നടന്നതായി പുറത്തുവന്നത്. സിവില് പൊലീസ് ഓഫീസര് കെഎപി നാലാം ബറ്റാലിയന് (കാസര്ഗോഡ്) റാങ്ക് ലിസ്റ്റിലാണ് ശിവരഞ്ജിത്തിന് ഒന്നാം റാങ്ക് കിട്ടിയത്. 78.33 മാര്ക്കാണ് ശിവരഞ്ജിത്തിന് കിട്ടിയത്. സ്പോര്ട്സ് വെയിറ്റേജായി 13.58 മാര്ക്കാണ് കിട്ടിയത്. ഇത് കൂടി ചേര്ത്തപ്പോള് 91.9 മാര്ക്ക് കിട്ടി ഒന്നാം റാങ്കുകാരനായി. പ്രണവിന് രണ്ടാം റാങ്കും, നസീമിന് 28ാം റാങ്കുമാണ് ലഭിച്ചത്. 65.33 മാര്ക്കാണ് നസീമിന് ലഭിച്ചത്. ചോദ്യപേപ്പറുമായിട്ടായിരുന്നു ജയലില് വച്ച് ശിവരഞ്ജിത്തിനെയും നസീമിനെയും ക്രൈം ബ്രാഞ്ച് ചോദ്യം ചെയ്തത്. ഒരു ചോദ്യത്തിനുപോലും ഉത്തരം പറയാന് കഴിയാഞ്ഞതോടെ പ്രതികള് കോപ്പിയടി സമ്മതിക്കുകയായിരുന്നു. ക്രമക്കേട് പുറത്തുവന്നതോടെ പ്രതികളെ പട്ടികയില് നിന്നും നീക്കി. ജൂലൈ ഒന്നിനാണ് റാങ്ക് ലിസ്റ്റ് പുറത്തുവന്നത്.
പരീക്ഷാ ക്രമക്കേട് പുറത്തുവന്നതോടെ ഈ ലിസ്റ്റ് റദ്ദാക്കുമോയെന്ന ആശങ്കയുയര്ന്നിരുന്നു. ഇക്കാര്യം ചൂണ്ടിക്കാണിച്ച് മുഖ്യമന്ത്രിയെയും പിഎസ്സി ചെയര്മാനെയും കണ്ട് മറ്റ് ഉദ്യോഗാര്ത്ഥികള് ആശങ്കയറിയിച്ചിരുന്നു. ചിലര് കോടതിയേയും സമീപിച്ചിട്ടുണ്ട്.
