കോഴിക്കോട്: മാവോയിസ്റ്റ് ബന്ധത്തെ തുടര്ന്ന് യുഎപിഎ ചുമത്തി പോലീസ് അറസ്റ്റുചെയ്ത വിദ്യാര്ത്ഥികളുടെ സിപിഎം ബന്ധം മറച്ചുവച്ച് പാര്ട്ടി മുഖപത്രമായ ദേശാഭിമാനി. പന്തീരങ്കാവില് നടന്ന അറസ്റ്റിനു പാര്ട്ടി പത്രം കൊടുത്ത തലക്കെട്ടിങ്ങനെ ‘മാവോയിസ്റ്റ് ബന്ധം ആരോപിച്ചു രണ്ട് വിദ്യാര്ത്ഥികള് അറസ്റ്റില്’. മൂര്ക്കനാട് സ്വദേശി ത്വാഹ ഫൈസല്, തിരുവണ്ണൂര് സ്വദേശി അലന് ഷുഹൈബ് എന്നീ പ്രതികളുടെ ചിത്രങ്ങള് പോലും ഇവര് പത്രത്തില് എവിടെയും പ്രദര്ശിപ്പിച്ചിട്ടില്ല. സര്ക്കാര് നിലപാടിനോട് പാര്ട്ടി പത്രം തന്നെ പ്രതിഷേധിക്കുന്നത് സമൂഹമാധ്യമങ്ങള് ഏറ്റെടുത്തിട്ടുണ്ട്.
സിപിഎം പാറമേല് ബ്രാഞ്ച് അംഗവും കണ്ണുര് സ്കൂള് ഓഫ് ജേര്ണലിസത്തിലെ മാധ്യമ വിദ്യാര്ത്ഥിയുമാണ് ത്വാഹ. പാര്ട്ടി കുടുംബത്തില് നിന്നുള്ള അലന് ഷുഹൈബ് കോഴിക്കോട് മീഞ്ചന്ത ബ്രാഞ്ച് അംഗവും കണ്ണൂര് പാലയാട് സ്കൂള് ഓഫ് ലീഗല് സ്റ്റഡീസിലെ രണ്ടാം വര്ഷ വിദ്യാര്ത്ഥിയുമാണ്. പാര്ട്ടിയിലെ മുതിര്ന്ന നേതാക്കള് ഉള്പ്പെടെ രൂക്ഷവിമര്ശനം ഉന്നയിക്കുമ്പോഴാണ് ദേശാഭിമാനി പാര്ട്ടി അംഗങ്ങള് തന്നെ വിഷയം മറച്ചുവയ്ക്കാന് ശ്രമിക്കുന്നത്. അറസ്റ്റിനെതിരായ പ്രതികരണങ്ങളിലും എംഎ ബേബി അടക്കമുള്ള പാര്ട്ടിയിലെ മുതിര്ന്ന നേതാക്കള് വിദ്യര്ത്ഥികളുടെ പാര്ട്ടി ബന്ധം മറച്ചുവച്ചിട്ടുണ്ട്. സര്ക്കാരിന്റെ വീഴച്ചകള് പിണറായി പോലീസിന്റെ തലയില് കെട്ടിവച്ച് പ്രശ്നം വഴിതിരിക്കാനും പാര്ട്ടി ശ്രമിക്കുന്നതായും ആക്ഷേപങ്ങള് ഉയരുന്ന പശ്ചതലത്തിലാണ് പാര്ട്ടിയുടെ മുഖപത്രത്തിന്റെ ഈ നിലപാട്.
എന്നാല്, യുഎപിഎ നിയമപ്രകാരം അറസ്റ്റിലായ വിദ്യാര്ത്ഥികള്ക്ക് നിയമ സഹായം നല്കുമെന്നാണ് പാര്ട്ടി പന്നിയങ്കര ലോക്കല് കമ്മിറ്റിയുടെ നിലപാട്. വിദ്യാര്ത്ഥികളായ രണ്ട് സിപിഎം പ്രവര്ത്തകര്ക്കെതിരെ യുഎപിഎ ചുമത്തിയ സംഭവത്തില് കോഴിക്കോട് സൗത്ത് ഏരിയ കമ്മിറ്റി പോലീസിനെതിരെ പ്രമേയം പാസാക്കി. അതെസമയം പിടിയിലായവര് നഗര മാവോയിസ്റ്റുകളാണെന്ന് പോലീസ് പറഞ്ഞു. ലഘുലേഖയോ നോട്ടീസോ കൈവശം വച്ചതിനോ വിതരണം ചെയ്തതിനോ മാത്രമല്ല അറസ്റ്റെന്നും യുഎപിഎ ചുമത്താവുന്ന വിധത്തില് ഇവരുടെ മാവോയിസ്റ്റ് ബന്ധത്തിന് വ്യക്തമായ തെളിവ് കയ്യിലുണ്ടെന്നും പോലീസ് വ്യക്തമാക്കി. അറസ്റ്റിലായ യുവാക്കളുടെ പ്രവര്ത്തനം നാളുകളായി നിരീക്ഷിച്ച് വരികയാണെന്നും പോലീസ് പറഞ്ഞു.
കാട്ടില് തോക്കേന്തി നടക്കുന്ന മാവോയിസ്റ്റുകളല്ല അറസ്റ്റിലായവര്. അര്ബന് നക്സലിസത്തേക്കാള് (നഗര മാവോയിസ്റ്റുകള്) തീവ്രതയേറിയ രീതിയില് ഇവരുടെ ആശയങ്ങള് നഗരത്തില് നടപ്പാക്കുകയും പ്രചരിപ്പിക്കുകയും ചെയ്യുന്നവരാണെന്നും പോലീസ് വ്യക്തമാക്കി. പിടിയില് നിന്ന് ഓടി രക്ഷപ്പെട്ട മൂന്നാമത്തെയാള് കോഴിക്കോട് സ്വദേശിയാണെന്നും ഇയാളെ കുറിച്ച് വ്യക്തമായ വിവരങ്ങള് തങ്ങളുടെ കൈവശമുണ്ടെന്നും പോലീസ് പറഞ്ഞു. ഇവര്ക്ക് പുറമേ നിരവധിപേര് നിരീക്ഷണത്തിലാണ്.
