തിരുവനന്തപുരം: മാവോയിസ്റ്റുകളെ വധിച്ചതിനെ അപലപിച്ച് ലഘുലേഖ വിതരണം ചെയ്ത രണ്ടു സിപിഎം പ്രവര്ത്തകരെ യുഎപിഎ ചുമത്തി അറസ്റ്റ് ചെയ്ത സംഭവത്തില് പോലീസ് കടുത്ത നിലപാടില്. സിപിഎം പ്രവര്ത്തകര്ക്കെതിരേ യുഎപിഎ ചുമത്തിയതില് പാര്ട്ടിയില് നിന്നും മുഖ്യമന്ത്രി പിണറായി വിജയനില് നിന്നും കടുത്ത സമ്മര്ദ്ദമാണ് പോലീസിനു നേരിടേണ്ടി വന്നത്. പോലീല് മേധാവി ലോക്നാഥ് ബെഹ്റയെ മുഖ്യമന്ത്രി നേരിട്ടു വിളിച്ചു ശകാരിച്ചതായും റിപ്പോര്ട്ടുണ്ട്. എന്നാല്, വിഷയം അന്വേഷിക്കാന് ചുമതലപ്പെടുത്തിയ ഉത്തരമേഖലാ ഐജി അശോക് യാദവും കമ്മിഷണര് എ. വി. ജോര്ജും പന്തീരാങ്കാവ് പൊലീസ് സ്റ്റേഷനില് നേരിട്ടെത്തി കാര്യങ്ങള് അന്വേഷിച്ച ശേഷം യുഎപിഎ ചുമത്തിയ നിലപാടില് ഉറച്ചു നിന്നു. മാവോയിസ്റ്റ് അനുകൂല ലഘുലേഖ കൈവശം വെച്ചതിന് കോഴിക്കോട് പന്തീരങ്കാവില് നിന്ന് അറസ്റ്റിലായ സിപിഎം പ്രാദേശിക നേതാക്കളായ അലന് ഷുഹൈബ്, താഹ ഫസല് എന്നിവര്ക്ക് മാവോയിസ്റ്റ് ബന്ധമുണ്ടെന്നതിനു തെളിവുകളുണ്ടെന്ന് ഐജി തന്നെ മാധ്യമങ്ങളോട് വെളിപ്പെടുത്തി. ഇവര്ക്കെതിരേ ചുമത്തിയ യുഎപിഎ പിന്വലിക്കില്ലെന്നും ഐജി. പ്രതികളെ ഉടന് കോടതിയില് ഹാജരാക്കാനും പോലീസ് തീരുമാനിച്ചു.
മാവോയിസ്റ്റുകളെ വധിച്ചതിനെ അപലപിച്ച് ലഘുലേഖ വിതരണം ചെയ്തതിന് യുഎപിഎ ചുമത്തിയതില് വിയോജിപ്പുമായി സിപിഎം കോഴിക്കോട് ജില്ലാ നേതൃത്വം രംഗത്തെത്തിയിരുന്നു. വിശദമായി അന്വേഷിക്കാതെ ഇത്തരം വകുപ്പുകള് ചുമത്തരുതെന്ന് സിപിഎം കോഴിക്കോട് ജില്ലാ സെക്രട്ടറി പി.മോഹനന് പറഞ്ഞിരുന്നു. അറസ്റ്റിലായ അലന് നിയമ വിദ്യാര്ഥിയാണ്. അലന് ശുഹൈബ് തിരുവണ്ണൂരിലും താഹ ഫസല് പാറമ്മല് ബ്രാഞ്ച് അംഗവുമാണ്. ഏതു സാഹചര്യത്തിലാണ് യുഎപിഎ ചുമത്തിയതെന്ന് അറിയിക്കണമൊയിരുന്നു മുഖ്യമന്ത്രി പിണറായി വിജയന് ഡിജിപി ലോക്നാഥ് ബെഹ്റയ്ക്ക് നിര്ദേശം നല്കിയത്. അറസ്റ്റിലായ അലന്റെ മാതാപിതാക്കള് കോഴിക്കോട് ഗസ്റ്റ്ഹൗസില് മുഖ്യമന്ത്രിയെ കണ്ട് പരാതി നല്കി. മകന് മാവോയിസ്റ്റ് ബന്ധമില്ലെന്നും ആരോ കൊടുത്ത നോട്ടിസ് കൈവശം വയ്ക്കുക മാത്രമാണുണ്ടായതെന്നും അമ്മ പറഞ്ഞു. അമ്മ സബിത മഠത്തില് കെ.അജിതയോടൊപ്പമാണ് ഇവടെത്തിയത്. നടി സജിത മഠത്തിലിന്റെ സഹോദരിയാണ് സബിത.
