തിരുവനന്തപുരം : ആസൂത്രണ ബോര്ഡില് കോടതിയുടെ അനുമതി വാങ്ങാതെ ഒരു നിയമനവും നടത്തരുതെന്നു കേരള അഡ്മിനിസ്ട്രേറ്റീവ് ട്രൈബ്യൂണലിന്റെ ഉത്തരവ്. ആസൂത്രണ ബോര്ഡ് നിയമനത്തില് പിഎസ്സി നിമയ വിരുദ്ധ ഇടപെടലും മാര്ക്ക് ദാനവും നല്കിയിട്ടുണ്ടെന്ന് ആരോപണം ഉയര്ന്നതിന്റെ അടിസ്ഥാനത്തിലാണ് ട്രൈബ്യൂണല് ഉത്തരവ് വന്നിരിക്കുന്നത്.
ചീഫ് സോഷ്യല് സര്വീസ്, പ്ലാനിങ് കോ ഓര്ഡിനേഷന്, ഡി സെന്ട്രലൈസ്ഡ് പ്ലാനിങ് തസ്തികകളിലേക്കു നടന്ന പരീക്ഷയില് എഴുത്ത് പരീക്ഷയില് കുറഞ്ഞ മാര്ക്ക് ലഭിച്ചവര്ക്ക് അഭിമുഖ പരീക്ഷയില് കൂടുതല് മാര്ക്ക് നല്കി റാങ്ക് ലിസ്റ്റില് മുന്നിലെത്തിച്ചെന്നതാണ് വിവാദം. സുപ്രീംകോടതി ഉത്തരവിന്റേയും പിഎസ്സി സര്ക്കുലറിന്റേയും ലംഘനമാണ് ഇതെന്ന് കണ്ടെത്തിയാണ് ട്രൈബ്യൂണല് വിധി പ്രസ്താവന നടത്തിയിരിക്കുന്നത്.
ചീഫ് സോഷ്യല് സര്വീസ് തസ്തികയിലേക്കുള്ള അഭിമുഖത്തില് ഇടതു സംഘടനാ പ്രവര്ത്തകര്ക്കു 40ല് 36 മാര്ക്ക് വീതം നല്കിയപ്പോള് എഴുത്തു പരീക്ഷയിലെ ഒന്നാം റാങ്കുകാരിക്കു 11 മാര്ക്കാണു നല്കിയത്. ചീഫ് പ്ലാനിങ് കോ ഓഡിനേഷന് തസ്തികയിലേക്കുള്ള അഭിമുഖത്തില് ഒരു ഉദ്യോഗാര്ഥിക്കു 40 ല് 38 മാര്ക്കു നല്കിയിരുന്നു.
