തിരുവനന്തപുരം: മലയാളികളെ ആഗോളമായി ഒന്നിപ്പിക്കാന് ഇന്റര്നെറ്റ് റേഡിയോ കേരള മീഡിയ അക്കാദമി ആരംഭിച്ചു. റേഡിയോ കേരള എന്നാണ് പേര്. ഇപ്പോഴത്തെ പരീക്ഷണ പ്രക്ഷേപണ കാലത്ത് 110 ലധികം രാജ്യങ്ങളിലെ മലയാളികളിലേക്ക് ഈ ഓണ്ലൈന് റേഡിയോ എത്തിയെന്ന് അക്കാദമി ചെയര്മാന് ആര്.എസ്. ബാബു പറഞ്ഞു.
വാര്ത്തയും വാര്ത്താധിഷ്ഠിത പരിപാടികളും വിനോദവും ഒരുമിക്കുന്ന ഒരു സമ്പൂര്ണ്ണ മലയാളം റേഡിയോയാണ് ലക്ഷ്യമിടുന്നത്. ലോകത്തിലെ ഇന്റര്നെറ്റ് സാധ്യതയുള്ള അവസാന രാജ്യത്തെ മലയാളികളിലേക്കും ഈ റേഡിയോ എത്തിച്ചേരണമെന്നാണ് ഉദ്ദേശിക്കുന്നത്. ലോകമലയാളികളെ ഒരു പ്ലാറ്റ്ഫോമില് ഏകീകരിക്കാന് റേഡിയോ കേരള ഉപകരിക്കും. ഒരു വിനോദ വിജ്ഞാന റേഡിയോ എന്ന നിലയില് വിദ്യാലയങ്ങളില് ഇടവേളകളില് പരിപാടി നല്കാനുള്ള ധാരണയുണ്ടായി. ഇതിന്റെ ഭാഗമായി വിദ്യാഭ്യാസ സ്ഥാപനങ്ങളില് ‘ശബ്ദമരം’ എന്ന വിശ്രമറേഡിയോ പ്രക്ഷേപണ മരം സ്ഥാപിക്കും. . ക്യാമ്പസ് റേഡിയോ ആവശ്യമുള്ളവരിലേക്ക് റേഡിയോ കേരള കടന്നുചെല്ലും.
24 മണിക്കൂര് ഇടതടവില്ലാതെ പ്രക്ഷേപണത്തിനൊരുങ്ങുന്ന റേഡിയോ അക്കാദമിയുടെ സ്വന്തം സ്റ്റുഡിയോയില് നിന്ന് തന്നെ അപ് ലിങ്ക് ചെയ്യാനുള്ള സംവിധാനങ്ങള് പൂര്ത്തിയാക്കിവരികയാണ്. പ്രശസ്ത റേഡിയോ ജേര്ണലിസ്റ്റ് ബാലകൃഷ്ണന് പെരിയയാണ് റേഡിയോ കേരളയുടെ കണ്സള്ട്ടന്റ്.
മാധ്യമവിദ്യാര്ത്ഥികള്ക്ക് അവരുടെ ശബ്ദസൗന്ദര്യം മാറ്റുരയ്ക്കാനുള്ള അവസരവും ലഭിക്കും. റേഡിയോ കേരളയുടെ ഉദ്ഘാടനം ഡിസംബറില് നടക്കുമെന്ന് അക്കാദമി ചെയര്മാന് ആര്.എസ്. ബാബു പറഞ്ഞു. മാധ്യമരംഗത്ത് ചുവടുറപ്പിക്കാനൊരുങ്ങുന്നവരുടെ രചനകള് പൊതുജനങ്ങള്ക്കു മുന്നില് അവതരിപ്പിക്കാനുള്ള ക്രമീകരണം അക്കാദമി ഏര്പ്പെടുത്തും ഇതിന്റെ ഭാഗമായി https://www.newspages.in എന്ന ആനുകാലിക പോര്ട്ടലിന് തുടക്കം കുറിക്കുന്നു.
കഥ, കവിത, ലേഖനം, വീഡിയോ എന്നിങ്ങനെ വിവിധ തരത്തിലുള്ള ഉള്ളടക്കം ഈ പോര്ട്ടലിലൂടെ ലഭ്യമാകും. വിദ്യാര്ത്ഥികള്ക്കൊപ്പം മാധ്യമരംഗത്തെ പ്രമുഖരും തങ്ങളുടെ രചനകളുമായി ഈ പോര്ട്ടലിലെത്തും. മലയാളത്തിലും ഇംഗ്ലീഷിലും രചനകളുണ്ടാവും. ഇത്തരത്തില് ഒരു ആനുകാലിക ഘടനയുള്ള പോര്ട്ടല് കേരളത്തില് തന്നെ ആദ്യമായാണ് വരുന്നത്. വിദ്യാര്ത്ഥികള്ക്കുള്ള ഒരു ഓണ്ലൈന് റിക്രൂട്ട്മെന്റ് സംവിധാനമായും ഈ പോര്ട്ടലിനെ വളര്ത്തിയെടുക്കാനാണ് ലക്ഷ്യമിടുന്നത്.
