തിരുവനന്തപുരം: മധ്യ കിഴക്കന് അറബിക്കടലില് രൂപം കൊണ്ടിരുന്ന ന്യൂനമര്ദം ഒരു ചുഴലിക്കാറ്റായി ശക്തിപ്രാപിച്ചെന്ന് കേന്ദ്ര കാലാവസ്ഥ വകുപ്പ്. ‘ക്യാര്’ ചുഴലിക്കാറ്റ് മധ്യ കിഴക്കന് അറബിക്കടലില് നിന്ന് വടക്ക് പടിഞ്ഞാറ് ദിശയില് മണിക്കൂറില് 7 കിലോമീറ്റര് വേഗതയില് കഴിഞ്ഞ 6 മണിക്കൂറായി സഞ്ചരിച്ചു കൊണ്ടിരിക്കുകയാണ്. ചുഴലിക്കാറ്റിന്റെ പരമാവധി വേഗതയിപ്പോള് മണിക്കൂറില് 80 മുതല് 100 കിലോമീറ്റര് വരെയാണ്.
ഇന്നു പകല് മഹാരാഷ്ട്രയിലെ രത്നഗിരി തീരത്തില് നിന്ന് 210 കിമീ ദൂരത്തിലും തെക്കുപടിഞ്ഞാറന് മുംബൈയില് നിന്ന് 370 കിമീ ദൂരത്തിലും ഒമാനിലെ സലാല തീരത്ത് നിന്ന് 1870 കിമീ ദൂരത്തിലുമായിരുന്നു ക്യാര് ചുഴലിക്കാറ്റിന്റെ സ്ഥാനം. അടുത്ത 12 മണിക്കൂറില് ഇതൊരു അതിശക്തമായ ചുഴലിക്കാറ്റ് ആയി മാറും. 24 മണിക്കൂറില് കൂടുതല് ശക്തിപ്രാപിച്ചു തീവ്ര ചുഴലിക്കാറ്റ് ആയി മാറുമെന്നും ദിശ മാറി പടിഞ്ഞാറ് ദിശയില് തെക്കന് ഒമാന്, യമന് തീരത്തെ ലക്ഷ്യമാക്കി സഞ്ചരിക്കുമെന്നും കേന്ദ്ര കാലാവസ്ഥ വകുപ്പിന്റെ പ്രവചനത്തില് പറയുന്നു. കേരളം ക്യാര് ചുഴലിക്കാറ്റിന്റെ സഞ്ചാര പഥത്തിലില്ല. ചുഴലിക്കാറ്റിന്റെ സ്വാധീനഫലമായി കേരളത്തില് വിവിധയിടങ്ങളില് ഒറ്റപ്പെട്ട ശക്തമായ മഴക്ക് സാധ്യതയുണ്ട്. ക്യാര് ചുഴലിക്കാറ്റിന്റെ സ്വാധീനമുള്ളത് കൊണ്ട് തന്നെ മല്സ്യത്തൊഴിലാളികള് ഒരു കാരണവശാലും കടലില് പോകാന് പാടുള്ളതല്ലടക്കം ജാഗ്രത നിര്ദേശവും നല്കിയിട്ടുണ്ട്.
‘ക്യാര്’ ചുഴലിക്കാറ്റിന്റെ വികാസത്തെയും സഞ്ചാരത്തെയും സംസ്ഥാന ദുരന്ത നിവാരണ അഥോറിറ്റിയും കേന്ദ്ര കാലാവസ്ഥ വകുപ്പും സൂക്ഷ്മമായി നിരീക്ഷിച്ചു വരികയാണെന്നു മുഖ്യമന്ത്രിയുടെ ഓഫിസും വ്യക്തമാക്കി. ഓറഞ്ച് അലേര്ട്ട് പ്രഖ്യാപിക്കുകയും അതിശക്തമായ മഴയുണ്ടാകുകയും ചെയ്യുന്ന ഘട്ടത്തില് സംസ്ഥാന ദുരന്ത നിവാരണ അതോറിറ്റി പുറപ്പെടുവിച്ചിട്ടുള്ള മുന്കരുതല് നിര്ദേശങ്ങള് കര്ശനമായി പിന്തുടരണമെന്നും മുഖ്യമന്ത്രിയുടെ ഓഫിസ് വ്യക്തമാക്കി.
