നിലമ്പൂര്: നിലമ്പൂര് പോത്തുകല്ലിലെ പ്രളയബാധിത മേഖലകള് ഗവര്ണര് ആരിഫ് മുഹമ്മദ് ഖാന് സന്ദര്ശിച്ചു. ഇന്നലെ രാവിലെ 11ന് ഭാര്യ രേഷ്മ ആരിഫിനൊപ്പം പോത്തുകല്ലിലെത്തിയ ഗവര്ണര് പ്രളയത്തില് വലിയകെടുതി നേരിട്ട പാതാറും കവളപ്പാറയും സന്ദര്ശിച്ചു കാര്യങ്ങള് വിലയിരുത്തി. പ്രളയത്തിനിരയായവര് താമസിക്കുന്ന പോത്തുകല് സിറ്റി പാലസ് ഓഡിറ്റോറിയത്തിലെ ദുരിതാശ്വാസ ക്യാമ്പ് സന്ദര്ശിച്ചു. അവിടത്തെ താമസക്കാരോട് ക്ഷേമാന്വേഷണങ്ങള് നടത്തിയ ഗവര്ണര് കുട്ടികളെ ലാളിച്ചു, അവര്ക്കൊപ്പം ഫോട്ടോയെടുത്തു. ക്യാമ്പിലുള്ള ഊരുമൂപ്പന് വാളലത്ത് ചാത്തനെ ഗവര്ണര് ഷാളണിയിച്ച് ആദരിച്ചു. ക്യാമ്പിലുള്ളവരുടെ പുനരധിവാസം വേഗത്തിലാവട്ടെയെന്ന് ആശംസിച്ച ഗവര്ണര് പുതിയ വീടുകളിലേക്ക് താമസം മാറിയ ശേഷം കാണാനെത്താന് ശ്രമിക്കാമെന്നും ഉറപ്പു നല്കി. ഉരുള്പൊട്ടലില് കൂറ്റന് പാറകള് വന്നടിഞ്ഞ ഇഴുകത്തോടിനു സമീപമാണ് ഗവര്ണര് വന്നിറങ്ങിയത്. 10 മിനിറ്റോളം നാശനഷ്ടം സംഭവിച്ച പ്രദേശം നടന്നു കണ്ടു. തുടര്ന്ന് പാതാര് അങ്ങാടി വരെ നടന്നു. അതിനിടയില് നാട്ടുകാരുമായി സംസാരിച്ചു.
ഞങ്ങള്ക്ക് വീടുകള് വേണമെന്നും അടുത്ത മഴക്കാലത്തിനു മുന്പ് തിരിച്ചുപോകാന് വേണ്ടതു ചെയ്യണമെന്നും പോത്തുകല്ല് ഓഡിറ്റോറിയത്തിലെ ദുരിതാശ്വാസ ക്യാംപിലുള്ളവര് ഗവര്ണറോട് അഭ്യര്ഥിച്ചു. എല്ലാവരെയും പലവഴിക്ക് ആക്കരുതെന്നും പോത്തുകല്ല് പഞ്ചായത്തില്തന്നെ താമസിപ്പിക്കണമെന്നും അവര് ആവശ്യപ്പെട്ടു. വേണ്ടതു ചെയ്യാമെന്നും എല്ലാവരും ഒപ്പമുണ്ടെന്നും ഗവര്ണര് അവരെ അറിയിച്ചു. കുട്ടികളോടൊപ്പമാണ് ഗവര്ണറും ഭാര്യയും കൂടുതല് സമയം ചെലവിട്ടത്. കുട്ടികള്ക്ക് മധുരം നല്കിയും സെല്ഫിയെടുത്തും ഗവര്ണറും ഭാര്യയും സമയം പങ്കിട്ടു. ഒരു ദിവസം പോലും സ്കൂള് മുടക്കരുതെന്നും എന്തെങ്കിലും പ്രയാസമുണ്ടെങ്കില് അറിയിക്കണമെന്നും ഗവര്ണര് കുട്ടികളോട് പറഞ്ഞു.
പി.വി. അബ്ദുല് വഹാബ് എംപി, ജില്ലാ കളക്ടര് ജാഫര് മലിക്, ജില്ലാ പോലീസ് സൂപ്രണ്ട് യു. അബ്ദുല് കരീം, പെരിന്തല്മണ്ണ അഡീഷണല് പോലീസ് സൂപ്രണ്ട് രേഷ്മ രമേശ്, ഡെപ്യൂട്ടി കളക്ടര് ഡോ.ജെ.ഒ. അരുണ്, പോത്തുകല് ഗ്രാമപഞ്ചായത്ത് പ്രസിഡന്റ് സി. കരുണാകരന് പിള്ള, നിലമ്പൂര് തഹസില്ദാര് സുഭാഷ് ചന്ദ്ര ബോസ്, ഭൂരേഖ തഹസില്ദാര് മുരളീധരന്, ജനപ്രതിനിധികള്, വകുപ്പുതല ഉദ്യോഗസ്ഥര് എന്നിവരും ഗവര്ണറോടൊപ്പമുണ്ടായിരുന്നു
