പുതുക്കാട്: എന്ഡോ സള്ഫാന് ബാധിതര്ക്ക് വാഗ്ദാനങ്ങള് നല്കി ഇടതു സര്ക്കാര് വഞ്ചിച്ചുവെന്ന് സാമൂഹിക പ്രവര്ത്തക ദയാബായി. എന്ഡോസള്ഫാന് ദുരിതംവിതച്ച തലമുറകളുടെ ജീവിതത്തെക്കുറിച്ച് പള്ളിക്കുന്ന് അസംപ്ഷന് ദേവാലയത്തിലെ മതബോധന വിദ്യാര്ഥികള്ക്കായി സംഘടിപ്പിച്ച ബോധവത്ക്കരണ ക്ലാസില് പ്രസംഗിക്കുകയായിരുന്നു അവര്. എന്ഡോ സള്ഫാന് ഇരകള്ക്ക് നീതിതേടി കാസര്ഗോഡുനിന്നു തിരുവനന്തപുരം വരെ നടത്തുന്ന പ്രതിഷേധ പര്യടനത്തിന് പൊതുസമൂഹത്തിന്റെ പിന്തുണയുണ്ടാകണമെന്നും ദയാബായി അഭ്യര്ത്ഥിച്ചു.
സര്ക്കാരുകള് നല്കിയ വാഗ്ദാനങ്ങള് പാലിക്കപ്പെടാതെ എന്ഡോസള്ഫാന് ബാധിതര് നിരന്തരം വഞ്ചിക്കപ്പെട്ടുകൊണ്ടിരിക്കുകയാണ്. എന്ഡോസള്ഫാന് ബാധിതരെ അറിയാന് ശ്രമിക്കണമെന്നും സമൂഹത്തില് ഒറ്റപ്പെട്ടുപോയ ജനവിഭാഗത്തെ മനസോടുചേര്ത്തു നിര്ത്തണമെന്നും ദയാബായി പറഞ്ഞു. കാസര്ഗോട്ടെ എന്ഡോസള്ഫാന് ബാധിതരുടെ ദുരിതം ഒറ്റയാള് നാടകത്തിലൂടെ കുട്ടികള്ക്ക് മുന്നില് ദയാബായി അവതരിപ്പിച്ചു. അസംപ്ഷന് ദേവാലയ വിശ്വാസ പരിശീലന യൂണിറ്റിന്റെ നേതൃത്വത്തില് സംഘടിപ്പിച്ച പരിപാടിയില് അഞ്ഞൂറോളം മതബോധന വിദ്യാര്ഥികള് ദയാബായിയുമായി സംവദിച്ചു. ദേവാലയ വികാരി ഫാ. ജോസ് തത്രത്തില്, ഷാജു വെണ്ണാട്ടുപറമ്പില്, ഷാജു മുണ്ടന് കുര്യന്, ബാബു തട്ടില് എന്നിവര് പ്രസംഗിച്ചു.
