കോഴിക്കോട് : സിപിഎം ലോക്കല് കമ്മിറ്റി അംഗവും കൂടത്തായി കൊലക്കേസിലെ മുഖ്യപ്രതി ജോളിയും തമ്മില് പണം ഇടപാടുകള് ഉണ്ടായിരുന്നതായി കണ്ടെത്തല്. റിയല് എസ്റ്റേറ്റ് ബിസിനസ്സിന്റെ മറവില് സിപിഎം ലോക്കല് കമ്മിറ്റി അംഗം പലരില് നിന്നും പണം നല്കിയതായി ആരോപണം ഉയര്ന്നിരുന്നു. അന്വേഷണ സംഘം കഴിഞ്ഞ ദിവസം ഇത് കണ്ടെത്തിയതോടെയാണ് സിപിഎം നേതൃത്വത്തിനെതിരേയും ആരോപണം ശക്തമായിരിക്കുന്നത്.
അതേസമയം റിയല് എസ്റ്റേറ്റിനെന്ന പേരില് ജോളി പലരില് നിന്നും ലക്ഷങ്ങള് തട്ടിയതായും റിപ്പോര്ട്ടുണ്ട്. പണംനല്കിയ തിരുവമ്പാടിയിലെ വ്യാപാരി കിടപ്പാടം ഉള്പ്പടെ ഉണ്ടായിരുന്ന വസ്തുവും, കടമുറികളും വിറ്റാണ് കടബാധ്യത തീര്ത്തത്. വാഹനങ്ങളോട് വല്ലാത്ത ഭ്രമമുണ്ടായിരുന്ന ജോളി പലപ്പോഴും സുഹൃത്തുക്കളുടെ വിലകൂടിയ കാറുകളാണ് സ്വന്തമെന്ന് പറഞ്ഞ് ഓടിച്ചിരുന്നത്.
കോടഞ്ചേരിയിലെ സിപിഎം ലോക്കല് കമ്മിറ്റി അംഗം, കൂടത്തായിയിലെ വാഹന ഇടപാടുകാരന് എന്നിവരുമായി ലക്ഷങ്ങളുടെ കൈമാറ്റമുണ്ടായി. റിയല് എസ്റ്റേറ്റ് നിക്ഷേപത്തിനെന്നാണ് വിശ്വസിപ്പിച്ചിരുന്നത്. സിപിഎം ലോക്കല് കമ്മിറ്റി അംഗത്തിന്റെ പിന്തുണയിലാണ് ജോളി പണം ഇടപാടുകള് എല്ലാം നടത്തിയിരുന്നത്.
എന്നാല് വ്യക്തിപരമായ ആവശ്യങ്ങള്ക്ക് പണം ഉപയോഗിച്ചിരുന്നതിനൊപ്പം ജോളി ചില ബിസിനസ് ശ്രമങ്ങള് നടത്തിയെങ്കിലും പരാജയപ്പെട്ടു. പണം തിരികെ കിട്ടുന്നതിന് പലപ്പോഴായി ഇടനിലക്കാര് വഴി സുഹൃത്തുക്കള് ശ്രമിച്ചെങ്കിലും വിജയിച്ചില്ല.
