കോന്നി: മിന്നല് പിണരുകള് മാനത്ത് പൂത്തിരി തെളിയിക്കവെ അമൃത വര്ഷമായി തുലാമാസ മേഘങ്ങള് പെയ്തു നിറഞ്ഞ പകലിന്റെ അവസാനത്തില് പൂരക്കാഴ്ച്ചയായി കൊട്ടിക്കലാശം. തിമിര്ത്തു പെയ്യുന്ന മഴയുടെ ആരവത്തെ വകവെയ്കകാതെ ജന സഹശ്രങ്ങള് മുഴക്കിയ ജയഘോഷത്താല് മൂഖരിതമായ അന്തരീക്ഷത്തിലാണ് കോന്നി ഉപതെരെഞ്ഞെടുപ്പിന്റെ കൊട്ടിക്കലാശം സെന്ട്രല് ജംഗ്ഷനില് അരങ്ങേറിയത്. അധികാരത്തിന്റെ ബലത്തില് ഇടതു പക്ഷം കാണിച്ച തിണ്ണമിടുക്കിനെ വക വെയ്ക്കാതെ പോസ്റ്റോഫീസ് റോഡിലും ബസ്റ്റാന്ഡ് റോഡിലും എന്ഡിഎ പ്രവര്ത്തകര് അണിനിരന്നതോടെ ഇടതു വലതു മുന്നണിയെക്കാള് ആവേശത്തിലും ആള് ബലത്തിലും ആധിപത്യമായി.
മലയോര നാട് ഒന്നാകെ കോന്നി ടൗണിലേക്ക് ഒഴുകി എത്തുകയായിരുന്നു. പ്രചരണത്തിന്റെ തുടക്കം മുതല് ആധിപത്യം നേടിയിരുന്ന എന്ഡിഎ കൊട്ടിക്കലാശത്തിലും അത് നിലനിര്ത്തി. ഇന്നലെ ഉച്ചക്ക് രണ്ടു മണി മുതല് പ്രവര്ത്തകര് ഒറ്റയ്ക്കും കൂട്ടമായും കാല്നടയായും വാഹനങ്ങളിലും കോന്നിയിലേക്ക് പ്രവഹിച്ചു. ഹരിത കുങ്കുമ പതാകകളോടൊപ്പം ബിഡിജെഎസ്ന്റെയും മറ്റു ഘടക കക്ഷികളുടെയും പതാകകള് വാനില് ഉയര്ത്തിയാണ് പ്രവര്ത്തകര് റോഡുകളില് നിറഞ്ഞത്. വര്ണ്ണബലൂണുകളും അലങ്കരിച്ച വാഹനങ്ങളും വര്ണ്ണക്കാഴ്ച്ചയൊരുക്കി. താളമേളങ്ങളും തെരെഞ്ഞെടുപ്പ് പാട്ടുകളും കൊട്ടിക്കലാശത്തിന് ഉത്സവ പ്രതീതിയേകി.
ഉച്ചയ്ക്ക് രണ്ടരയോടെ എന്ഡിഎ തെരെഞ്ഞെടുപ്പ് കമ്മറ്റി ഓഫീസിന്റെ സമീപത്തു നിന്നും സ്ഥാനാര്ത്ഥി കെ. സുരേന്ദ്രനോടൊപ്പം കേന്ദ്ര മന്ത്രി വി. മുരളീധരനും തുറന്ന വാഹനത്തിലേറി റോഡ് ഷോയോടെയാണ് പരസ്യപ്രചാരണത്തിന് സമാപനം കുറിച്ച് കൊട്ടിക്കലാശത്തിന് തുടക്കമിട്ടത്. ഇടതു വലതു മുന്നണികളുടെയും കൊട്ടിക്കലാശ വേദി കോന്നി സെന്ട്രല് ജംഗ്ഷന് ആയിരുന്നു.
റോഡ് ഷോ സെന്റര് ജംഗ്ഷനില് എത്തിയപ്പോഴേക്കും എന്ഡിഎയ്ക്ക് അനുവദിച്ച പോസ്റ്റോഫീസില് റോഡില് ആയിരക്കണക്കിന് പ്രവര്ത്തകര് നിറഞ്ഞിരുന്നു. പോലീസ് നിര്ദ്ദേശം അവഗണിച്ച് ഇടതു മുന്നണിക്കാര് സെന്ട്രല് ജംഗ്ഷന് കയ്യേറിയതോടെ ബസ്റ്റാന്റ് റോഡിലും എന്ഡിഎ പ്രവര്ത്തകര് അണിനിരന്നു.
പ്രചരണത്തിന്റെ കൊട്ടിക്കലാശത്തിനിടെ പെയ്ത ശക്തമായ മഴയെ അവഗണിച്ച് സ്ഥാനാര്ത്ഥി കെ.സുരേന്ദ്രന്, കേന്ദ്രമന്ത്രി വി.മുരളീധരന്, എന്ഡിഎനേതാക്കളായ കെ.പത്മകുമാര്, രാജന് കണ്ണാട്ട്, അശോകന് കുളനട തുടങ്ങിയ നേതാക്കളും പൂര്ണ്ണ സമയം നനഞ്ഞു നിലയുറപ്പിച്ചതൊടെ ആവേശം ഉച്ചസ്ഥായിയിലായ പ്രവര്ത്തകരും പിരിഞ്ഞ് പോകാതെ ആഹഌദാരവം മുഴക്കി ഒപ്പം ചേര്ന്നു. കൊട്ടിക്കലാശത്തിന് ആറ് മണിയോടെ സമാപനമായി. അതോടെ ദിവസങ്ങള് നീണ്ടു നിന്ന പരസ്യ പ്രചരണത്തിനും പരിസമാപ്തി കുറിച്ചു.
