കൊച്ചി: ഐഎന്എക്സ് അഴിമതിക്കേസില് കഴിയുന്ന മുന് കേന്ദ്രമന്ത്രി പി. ചിദംബരത്തിന് ജാമ്യം കിട്ടിയിട്ടില്ല, പാലാരിവട്ടം പാലം നിര്മാണത്തില് ടി.ഒ. സൂരജിന് ജാമ്യം നല്കുന്നതെങ്ങിനെയെന്ന് ഹൈക്കോടതി. വിജിലന്സ് അന്വേഷണം നേരിടുന്ന മുന് പൊതുമരാമത്ത് സെക്രട്ടറി ടി.ഒ.സൂരജിനും മറ്റും ജാമ്യം നിഷേധിച്ചു കൊണ്ടുള്ള ഉത്തരവിലാണ് ഹൈക്കോടതി പി.ചിദംബരത്തിന്റെ കേസിലെ ദല്ഹി ഹൈക്കോടതി വിധിയും ഉദ്ധരിച്ചത്.
വൈററ് കോളര് ക്രിമിനലുകള് കോടിക്കണക്കിന് തുക പൊതുഖജനാവിന് നഷ്ടമുണ്ടാക്കുന്നതിനാല് അതീവ ഗൗരവത്തോടെ ഇവരുടെ ജാമ്യഹര്ജികള് പരിഗണിക്കണമെന്നാണ് സുപ്രീം കോടതി നിരവധി വിധികളില് നിര്ദ്ദേശിച്ചിട്ടുള്ളതെന്ന് വിജിലന്സ് പ്രോസിക്യൂട്ടര് ഹൈക്കോടതിയെ ബോധിപ്പിച്ചു.
വരവില് കവിഞ്ഞ സ്വത്ത് സമ്പാദിച്ചുവെന്ന കുറ്റത്തിനും വിജിലന്സ് കുറ്റപത്രം നല്കിയിട്ടുള്ള ഉദ്യോഗസ്ഥനാണ് സൂരജ് എന്നും പ്രോസിക്യൂട്ടര് ചൂണ്ടിക്കാട്ടി. ഈ സാഹചര്യങ്ങള് വിലയിരുത്തിയാണ് പ്രതിക്ക് ജാമ്യം നിഷേധിച്ചത്. അതേസമയം ജാമ്യത്തിനായി സൂരജ് വീണ്ടും നല്കിയ ഹര്ജിയില് ഹൈക്കോടതി സര്ക്കാറിന്റെ വിശദീകരണം തേടിയിട്ടുണ്ട്.
