കോന്നി: ഭയപ്പാടിന്റെ കാലം കഴിഞ്ഞു, ബിജെപിയാണ് ഇനി യഥാര്ത്ഥ ന്യൂനപക്ഷ സംരക്ഷകരെന്ന് അറിയാന് തുടങ്ങിയതായി ബിജെപി സംസ്ഥാന അധ്യക്ഷന് അഡ്വ.പിഎസ്. ശ്രീധരന് പിള്ള. കോന്നിയില് കെ.സുരേന്ദ്രന്റെ തെരെഞ്ഞെടുപ്പ് പ്രചാരണങ്ങള്ക്ക് എത്തിയതായിരുന്നു അദ്ദേഹം. ബിജെപിയും ആര്എസ്എസും ന്യൂനപക്ഷങ്ങളെ ഇല്ലായ്മചെയ്യാന് ശ്രമിക്കുന്നവര് എന്ന യുഡിഎഫ് എല്ഡിഎഫ് പ്രചരണ തന്ത്രം പൊളിയുന്നു. കുപ്രചരണത്തിലൂടെ മതന്യൂനപക്ഷങ്ങളെ ബിജെപിയില് നിന്ന് ഈകാലമത്രയും മതില്കെട്ടി മറക്കുകയായിരുന്നു.
കഴിഞ്ഞ തെരഞ്ഞെടുപ്പ് കാലത്ത് നരേന്ദ്ര മോദി അധികാരത്തില് വന്നാല് ന്യൂനപക്ഷങ്ങളെ ഇല്ലാതാക്കുമെന്നും തെരഞ്ഞെടുപ്പുകള് പോലും നടത്തില്ലെന്നും ആയിരുന്നു ഇടതു വലതു പ്രചാരണം. എന്നാല് നരേന്ദ്രമോദി മഹാഭൂരിപക്ഷത്തോടെ അധികാരത്തില് വന്നയുടന് പറഞ്ഞത് ഭാരതത്തിലെ 130 കോടി ജനങ്ങളും എന്റെ കുടുംബാംഗങ്ങള് ആണെന്നാണ്. കുറഞ്ഞ കാലം കൊണ്ട് തന്നെ ദരിദ്രര്ക്കും ന്യൂനപക്ഷങ്ങള്ക്കും വേണ്ടി നിരവധി പദ്ധതികള് കേന്ദ്ര സര്ക്കാര് നടപ്പാക്കിക്കഴിഞ്ഞു.
രാഷ്ട്രീയ വൈരം തീര്ക്കാന് മനുഷ്യമനസ്സുകളില് വിഷം നിറച്ച് അതില് നിന്ന് വിളവുകള് കൊയ്യുകയായിരുന്നു ഇടതു വലതു മുന്നണികള്. ഇതിനാണ് ഇപ്പോള് മാറ്റമുണ്ടാകുന്നത്. മതന്യൂനപക്ഷങ്ങള്ക്ക് ബിജെപിയിലേക്കുള്ള വഴിയിലെ ബ്ലോക്കുകള് ഒന്നായി മാറുകയാണ്. ഇക്കാലമത്രയും തങ്ങള് കബളിപ്പിക്കപ്പെടുകയായിരുന്നെന്ന് ന്യൂനപക്ഷങ്ങള് മനസ്സിലാക്കിക്കഴിഞ്ഞു. ഓര്ത്തഡോക്സ് സഭ ബിജെപിക്ക് അനുകൂലമായ പരസ്യനിലപാട് എടുത്തു കഴിഞ്ഞത് തന്നെ ഇതിന്റെ തെളിവാണ്.
മറ്റു പല ന്യൂനപക്ഷ വിഭാഗങ്ങളും ഈ നിലയില് ചിന്തിച്ചു തുടങ്ങി. വര്ഗീയവാദി എന്ന് മുദ്ര കുത്തപ്പെട്ടിരുരുന്ന നരേന്ദ്രമോദി ഗുജറാത്ത് മുഖ്യമന്ത്രിയായിരുന്നപ്പോഴാണ് കേരളത്തില്നിന്ന് എത്തിയ സഭാ നേതാക്കളെ സ്റ്റേറ്റ് ഗസ്റ്റായി സ്വീകരിച്ചത്. മറ്റ് ഏത് സര്ക്കാര് ഇങ്ങനെ ചെയ്തിട്ടുണ്ട്. ന്യൂനപക്ഷ മനസ്സുകളില് നിന്ന് ബിജെപിയെ കുറിച്ചുള്ള പുകമറ മാറുന്ന ഈ ഉപ തെരഞ്ഞെടുപ്പില് അത്ഭുതങ്ങള് സംഭവിക്കുമെന്നും ശ്രീധരന് പിള്ള പറഞ്ഞു.
