കൊച്ചി: മരടിലെ ഫ്ളാറ്റുകളില് നിന്ന് താമസക്കാര്ക്ക് ഒഴിഞ്ഞുപോകാനുള്ള സമയപരിധി ഇന്ന് അവസാനിക്കും. സുപ്രീംകോടതിയില് സര്ക്കാര് നല്കിയ സത്യവാങ്മൂലത്തിലെ കാലാവധിയാണിത്. താമസം മാറുന്നതിന് ഉടമകള് പതിനഞ്ച് ദിവസം കൂടി ആവശ്യപ്പെട്ടെങ്കിലും ഒഴിപ്പിക്കല് നടപടിയുമായി മുന്നോട്ടുപോകാന് തന്നെയാണ് നഗരസഭ നിലവില് തീരുമാനിച്ചിരിക്കുന്നത്.
അനുവദിച്ച സമയം നീട്ടാനാകില്ല എന്ന നിലപാടില് ഉറച്ച് നില്ക്കുകയാണ് നഗരസഭ. എന്നാല് പകുതിയിലേറെ താമസക്കാര് ഇനിയും മാറാനുണ്ട്. സമയ പരിധി നീട്ടുന്നത് കോടതിയലക്ഷ്യമാകുമെന്നാണ് നഗരസഭ പറയുന്നത്. ഇന്ന് കൊണ്ട് ഒഴിഞ്ഞുപോകല് സാധ്യമല്ലെന്ന് ഉടമകളും തീര്ത്ത് പറയുന്നു.
ഒഴിഞ്ഞു പോകുന്നതിനുള്ള കാലാവധി അവസാനിക്കുന്നതോടെ താത്കാലികമായി പുനസ്ഥാപിച്ച വൈദ്യുതിയും ജലവിതരണവും വിച്ഛേദിക്കാനാണ് നഗരസഭയുടെ തീരുമാനം. കാലാവധി അവസാനിച്ചിട്ടും ഒഴിഞ്ഞുപോകാന് തയ്യാറാകാത്തവര്ക്കെതിരെ നിയമനടപടി സ്വീകരിക്കേണ്ടി വരുമെന്ന് നഗരസഭ കഴിഞ്ഞ ദിവസം വ്യക്തമാക്കിയിരുന്നു.
അതേസമയം ബലപ്രയോഗത്തിലേക്ക് നീങ്ങാതെ സമവായത്തിലൂടെ കാര്യങ്ങള് പരിഹരിക്കാനാണ് സര്ക്കാര് ഉദ്യോഗസ്ഥര്ക്ക് നല്കിയിരിക്കുന്ന നിര്ദ്ദേശം. ഈ സാഹചര്യത്തില് ഉടമകള്ക്ക് വേണ്ടി താത്കാലിക താമസ സൗകര്യം കണ്ടെത്താനുള്ള ശ്രമങ്ങള് നഗരസഭ തുടരുകയാണ്. ഇതുമായി ബന്ധപ്പെട്ട് സബ് കളക്ടര് കഴിഞ്ഞ ദിവസം ഫ്ളാറ്റ് ഉടമകളുമായി സംസാരിച്ചിരുന്നു.
