കണ്ണൂര്: ബ്രണ്ണന് കോളേജിന് മുന്നില് എബിവിപി പ്രവര്ത്തകര് നടത്തിവന്ന സമരം വിജയിച്ചു. കോളേജില് മാരകായുധങ്ങളുമായി എത്തിയ ഏഴ് എസ്എഫ്ഐ പ്രവര്ത്തകര്ക്കെതിരെ നടപടി സ്വീകരിക്കാമെന്ന് പ്രിന്സിപ്പല് കെ. ഫല്ഗുനന് സമരപന്തലില് നേരിട്ടെത്തി അറിയിച്ചതോടെയാണ് സമരം അവസാനിപ്പിച്ചത്. ക്യാമ്പസ്സില് മാരകായുധങ്ങളുമായി എത്തിയ എസ്എഫ്ഐ പ്രവര്ത്തകര്ക്കെതിരെ നടപടി എടുക്കുക, ക്യാമ്പസില് സമാധാനാന്തരീക്ഷം നിലനിര്ത്താന് ആവശ്യമായ നടപടി സ്വീകരിക്കുക എന്നീ ആവശ്യങ്ങളുന്നയിച്ച് എബിവിപി സംസ്ഥാന സമിതിയംഗവും ബ്രണ്ണന് കോളേജ് മൂന്നാം വര്ഷ ചരിത്ര വിദ്യാര്ത്ഥിയുമായ വിശാഖ് പ്രേമന് അനിശ്ചിതകാല നിരാഹാരസമരം ഇന്ന് രണ്ട് ദിവസം പിന്നിട്ടിരുന്നു.
ബ്രണ്ണന് കോളേജ് ക്യാമ്പസില് പിക്കാസും പാരയുമടക്കമുള്ള ആയുധങ്ങളുമായി എത്തിയാണ് എസ്എഫ്ഐക്കാര് എബിവിപിയുടെ കൊടിമരം തകര്ക്കാന് ശ്രമിച്ചത്. സംഭവം നടന്ന് ഒരാഴ്ച പിന്നിട്ടിട്ടും അക്രമം നടത്തിയവര്ക്കെതിരെ നടപടി സ്വീകരിക്കാന് കോളേജ് അധികൃതര് തയ്യാറായിട്ടില്ല. ഇതോടെയാണ് പ്രതിഷേധ സമരവുമായി എബിവിപി രംഗത്ത് വന്നത്. ഇന്ന് ആര്.എസ്.എസ് നേതാവ് വത്സല് തില്ലങ്കേരി സമരത്തിന് പിന്തുണയുമായി എത്തിയിരുന്നു. തുടര്ന്ന് അദേഹം പ്രിന്സിപ്പലുമായി ചര്ച്ചനടത്തി. ഇതേ തുടര്ന്നാണ് കെ. ഫല്ഗുനന് സമരപന്തലില് നേരിട്ടെത്തി ഏഴ് എസ്.എഫ്.ഐ പ്രവര്ത്തകരെ സസ്പെന്ഡ് ചെയ്ത കാര്യം അറിയിച്ചത്.
നേരത്തെ, ബ്രണ്ണന് കോളേജില് അക്രമം നടത്തിയ ഗുണ്ടാസംഘത്തിനെതിരെ നടപെടിയെടുക്കുമെന്ന് പ്രിന്സിപ്പല് എബിവിപിക്ക് ഉറപ്പ് നല്കുകയും ചെയ്തു. എന്നാല് നിശ്ചിത സമയത്തിനുള്ളില് നടപടി സ്വീകരിക്കാത്തതിനെ തുടര്ന്നാണ് കഴിഞ്ഞ ദിവസം എബിവിപി ബ്രണ്ണന് കോളേജ് യൂണിറ്റിന്റെ നേതൃത്വത്തില് സമരം ആരംഭിച്ചത്. യുവമോര്ച്ച സംസ്ഥാന പ്രസിഡന്റ് അഡ്വക്കറ്റ് കെ.പി.പ്രകാശ് ബാബു, സംസ്ഥാന സെക്രട്ടറി അരുണ് മാസ്റ്റര്, ജില്ലാ പ്രസിഡന്റ് സി.സി. രതീഷ്, ഹിന്ദു ഐക്യവേദി ജില്ലാ വര്ക്കിംഗ് പ്രസിഡന്റ് പ്രദീപ് ശ്രീകലം, ജില്ലാ സെക്രട്ടറി ശ്യാം മോഹന്, വിശ്വഹിന്ദു പരിഷത്ത് ജില്ലാ ഓര്ഗനൈസിംഗ് സെക്രട്ടറി പ്രേമന്, ലസിത പാലക്കല്, ഐശ്വര്യ തുടങ്ങി സാമൂഹിക സാംസ്കാരിക രാഷ്ട്രീയ രംഗങ്ങളിലെ പ്രമുഖര് സമരപ്പന്തല് സന്ദര്ശിച്ചു.
