തിരുവനന്തപുരം: പരാതി പറഞ്ഞതിന് യാത്രക്കാരന് കെഎസ്ആര്ടിസി സിഐടിയു ജീവനക്കാരുടെ ക്രൂര മര്ദ്ദനം. ചോദ്യം ചെയ്ത മറ്റ് യാത്രക്കാര്ക്കും കിട്ടി ജീവനക്കാരുടെ അസഭ്യവര്ഷവും മര്ദ്ദനവും. തമ്പാനൂരില് നിന്ന് തൃശൂര്ക്ക് പോകാനെത്തിയ കണ്ണൂര് സ്വദേശി ബിജുവിനെയാണ് കെഎസ്ആര്ടിസി സിഐടിയു നേതാക്കള് മര്ദിച്ചത്.
തിരുവനന്തപുരത്തെ ഭാര്യവീട്ടില് നിന്ന് ഓണാഘോഷം കഴിഞ്ഞ് തിരികെ വീട്ടിലേക്ക് മടങ്ങാനാണ് കണ്ണൂര് സ്വദേശി ബിജു തമ്പാനൂരിലെത്തിയത്. തൃശൂരിലേക്ക് പോകാന് തമ്പാനൂരില് നിന്നും കെഎസ്ആര്ടിസിയുടെ കോയമ്പത്തൂര് ബസില് സീറ്റു റിസര്വ് ചെയ്തിരുന്ന ഇയാള് ബസില് കയറിയപ്പോള് കൈയിലിരുന്ന ചെറിയ ട്രോളിബാഗിന് ടിക്കറ്റ് എടുക്കണമെന്ന് കണ്ടക്ടര് ആവശ്യപ്പെട്ടു. എന്നാല് ഇത് ചെറിയ ബാഗാണെന്നും ഇതിന് ടിക്കറ്റ് ഇതുവരേയും എടുത്തിട്ടില്ല എന്നും ഇയാള് പറഞ്ഞു. യാത്രക്കാരന്റെ വാദങ്ങള് വകവയ്ക്കാത്ത കണ്ടക്ടര് ടിക്കറ്റിന് നല്കിയ 500 രൂപ മടക്കിനല്കാതെ ഇയാളെ പട്ടത്ത് ഇറക്കി വിട്ടു. ഇതിനെതിരെ പരാതി നല്കാന് തിരികെ തമ്പാനൂര് സ്റ്റേഷന് മാസ്റ്ററുടെ അടുത്തെത്തിയ ഇയാളെ പരാതി നല്കുന്നത് മൊബൈലില് റിക്കോര്ഡ് ചെയ്തു എന്നു പറഞ്ഞാണ് ജീവനക്കാര് കൈയ്യേറ്റം ചെയ്തത്. യുവാവിനെ മര്ദ്ദിക്കുന്നതുകണ്ട യാത്രക്കാര് കാര്യമന്വേഷിക്കുകയും സംഭവം വീഡിയോയില് റെക്കോര്ഡ് ചെയ്യാന് ശ്രമിച്ച കള്ളിക്കാട് സ്വദേശിയേയും കെഎസ്ആര്ടിസി ജീവനക്കാര് സംഘം ചേര്ന്ന് മര്ദിച്ചു.
സിഐടിയു യൂണിയന് സെക്രട്ടറി സുരേഷ്കുമാര്, ട്രഷറര് ഉദയകുമാര് എന്നിവര് ചേര്ന്നാണ് യാത്രക്കാരെ മര്ദ്ദിച്ചത്. ഇവര് കണ്ണൂര് സ്വദേശിയുടെ പുതിയ മൊബൈല് ഫോണ് നിലത്തെറിഞ്ഞ് പൊട്ടിക്കുകയും ചെയ്തു എന്നാണ് ആരോപണം. യാത്രക്കാര് സംഘടിതരായി ഇതിനെതിരെ പ്രതിഷേധിക്കുകയും തമ്പാനൂര് പോലീസ് സ്റ്റേഷനില് അറിയിക്കുകയുമുണ്ടായി. തുടര്ന്ന് സ്ഥലത്തെത്തിയ തമ്പാനൂര് എസ്െഎയുടെ നിര്ദേശാനുസരണം മര്ദ്ദനമേറ്റ യാത്രക്കാര് സ്റ്റേഷനില് എത്തി പരാതി നല്കി. യാത്രക്കാരോട് അപമര്യാദയായി പെരുമാറുന്ന ജീവനക്കാര്ക്കെതിരെ നടപടിയെടുക്കണമെന്ന് യാത്രക്കാര് ഒന്നടങ്കം ആവശ്യപ്പെട്ടു.
രണ്ടുമാസം മുമ്പ് യാത്രക്കാരോട് മാന്യമല്ലാത്ത രീതിയില് പെരുമാറിയ സ്വകാര്യ ബസ് ജീവനക്കാര്ക്കും കമ്പനിക്കാര്ക്കുമെതിരെ ശക്തമായ പ്രതിഷേധമാണ് നാടെങ്ങും ഉണ്ടായത്. യാത്രക്കാരോട് മാന്യമായി പെരുമാറണമെന്ന അധികാരികളുടെ നിര്ദ്ദേശം നിലനില്ക്കെയാണ് ഇത്തരം സംഭവങ്ങള് ആവര്ത്തിക്കുന്നത്.
