വാഷിങ്ടണ് : തമിഴ്നാട്ടില് പാവപ്പെട്ട ഹിന്ദുക്കളെ വ്യാപകമായി ക്രിസ്തു മതത്തിലേക്ക് പരിവര്ത്തനം ചെയ്യുന്നതായി റിപ്പോര്ട്ട്. ഇന്ത്യന് സംസ്കാരത്തേയും പരമ്പരാഗത രീതികളേയും കുറിച്ച് പഠനം നടത്തുന്ന യുഎസ് ഗവേഷക റെനീ ലിനാണ് ഇതുസംബന്ധിച്ചുള്ള വിവരങ്ങള് പുറത്തുവിട്ടിരിക്കുന്നത്. വോയിസ് ഫോര് ഇന്ത്യ എന്ന പേരിലാണ് റെനീ ലിന് ഗവേഷണം നടത്തി വരുന്നത്.
ഫേയ്സ് ബുക്ക് വീഡിയോയിലൂടെയാണ് ലിന് ഈ വിവരങ്ങള് പങ്കുവെച്ചിരിക്കുന്നത്. വര്ഷത്തില് രണ്ടു തവണ വീതമെങ്കിലും തമിഴ്നാട് സന്ദര്ശിച്ച് പഠനം നടത്തി വരുന്ന വ്യക്തിയാണ് ലിന്. ഇവര് നടത്തിയ പഠനത്തില് സംസ്ഥാനത്തു ക്രിസ്ത്യന് മിഷണറികളുടെ പ്രവര്ത്തനങ്ങള് വ്യാപിച്ചു വരികയാണ്. ഇവര് സാമ്പത്തികമായി പിന്നാക്കം നില്ക്കുന്ന ഹിന്ദു വിഭാഗത്തില്പ്പെട്ടവര്ക്കിടയില് പ്രവര്ത്തിച്ചു വ്യാപകമായി മത പരിവര്ത്തനം നടത്തി വരികയാണെന്നും റിപ്പോര്ട്ടില് പറയുന്നുണ്ട്. സന്ദര്ശന വേളയില് കോയമ്പത്തൂരില് സൂപ്പര്മാര്ക്കറ്റില് കയറിയപ്പോള് സുവിശേഷ പ്രസംഗിക്കുന്നവര് തന്നെ സമീപിച്ച് സ്വാധീനിക്കാന് ശ്രമിച്ചതായും ലിന് അനുഭവം പങ്കുവെയ്ക്കുന്നുണ്ട്. ഏഴ് പേരോളം അടങ്ങുന്ന സുവിശേഷ പ്രസംഗം നടത്തുന്ന കാനഡ കേന്ദ്രീകരിച്ച് പ്രവര്ത്തിക്കുന്ന മിഷനറിയിലെ അംഗങ്ങളാണ് ഇവര്. മതപരിവര്ത്തനം നടത്തുകയാണ് അവരുടെ ലക്ഷ്യമെന്നും അവര് തന്നോട് വെളിപ്പെടുത്തിയതാണ് ലിന് അവകാശപ്പെടുന്നുണ്ട്. ദരിദ്രരായ ഹിന്ദു കുടുംബങ്ങളെ കണ്ടെത്തി അവര്ക്ക് ആഹാരവും, വസ്ത്രവും പണവും വാഗ്ദാനം ചെയ്ത് സംസ്ഥാന വ്യാപകമായി മത പരിവര്ത്തനം നടത്തി വരികയാണ് ഈ സംഘം.
നിങ്ങള്ക്ക് യഥാര്ത്ഥത്തില് സഹായം നല്കാനാണ് ഉദ്ദേശമെങ്കില് അവര്ക്ക് വസ്ത്രവും വിദ്യാഭ്യാസവും ഭക്ഷണവും നല്കി കൂടെ, എന്തിന് അവരെ ക്രിസ്തു മതത്തിലേക്ക് മതം മാറ്റുന്നതെന്നു ലിന് സുവിശേഷ പ്രസംഗകരോട് ചോദിച്ചെങ്കിലും ജീസസ് മാത്രമാണ് ഈ പ്രശ്നങ്ങള്ക്കുള്ള പരിഹാരമെന്ന മറുപടിയാണ് നല്കിയത്. ഇതിനെതിരെ വീണ്ടും പ്രതികരിച്ചപ്പോള് ലിന്നിനെതിരെ പോലീസില് പരാതി നല്കുമെന്ന് ഭീഷണിപ്പെടുത്തുകയായിരുന്നു.
