ന്യൂദല്ഹി : പത്ത് പൊതുമേഖലാ ബാങ്കുകളുടെ ലയനത്തിനെതിരായി ബാങ്കിങ് മേഖലയിലെ നാല് യൂണിയനുകള് സമരത്തിലേക്ക്. ഈ മാസം 26, 27 തീയതികളില് പണിമുടക്കാനാണ് യൂണിയനുകള് ജീവനക്കാര്ക്ക് ആഹ്വാനം ചെയ്തിരിക്കുന്നത്. കൂടാതെ നവംബര് രണ്ടാം വാരം മുതല് അനിശ്ചിതകാല സമരം നടത്തുമെന്നും എഐബിഒസി അറിയിച്ചിട്ടുണ്ട്.
ഓള് ഇന്ത്യ ബാങ്ക് ഓഫീസേഴ്സ് കോണ്ഫെഡറേഷന്, ഓള് ഇന്ത്യ ബാങ്ക് ഓഫീസേഴ്സ് അസോസിയേഷന്, ഇന്ത്യന് നാഷണല് ബാങ്ക് ഓഫീസേഴ്സ് കോണ്ഗ്രസ്, നാഷണല് ഓര്ഗനൈസേഷന് ഓഫ് ബാങ്ക് ഓഫീസേഴ്സ് എന്നീ സംഘടനകളാണ് സമരത്തിന് നോട്ടീസ് നല്കിയിരിക്കുന്നത്. ധനമന്ത്രി നിര്മ്മലാ സീതാരാമന് വിഷയത്തില് ഭീമന് ഹര്ജി സമര്പ്പിക്കുമെന്നും, ഈ മാസം 20ന് ബാങ്കിങ് സംഘടനകളുടെ നേത്യത്വത്തില് പാര്ലമെന്റ് മാര്ച്ച് സംഘടിപ്പിച്ചിട്ടുണ്ടെന്നും യൂണിയന് അറിയിച്ചു.
ലാഭകരമല്ലാത്ത പൊതുമേഖലാ ബാങ്കുകളെ വമ്പന് പൊതുമേഖലാ ബാങ്കുകളുമായാണ് ലയിപ്പിച്ചത്. പത്ത് പ്രധാന പൊതുമേഖലാ ബാങ്കുകളെ നാലെണ്ണമാക്കിയാണ് ലയിപ്പിക്കുന്നത്. ഇന്ത്യന് ബാങ്ക്, അലഹാബാദ് ബാങ്ക്, യൂണിയന് ബാങ്ക് ഓഫ് ഇന്ത്യ, ആന്ധ്രാ ബാങ്ക് കോര്പ്പറേഷന് ബാങ്ക്, കനറാ ബാങ്ക്, സിന്ഡിക്കേറ്റ് ബാങ്ക്, പഞ്ചാബ് നാഷണല് ബാങ്ക്, ഓറിയന്റല് ബാങ്ക്, യുണൈറ്റഡ് ബാങ്ക് എന്നീ ബാങ്കുകളെയാണ് ലയിപ്പിക്കുന്നത്. തകര്ച്ചയിലേക്ക് നീങ്ങുന്ന സാമ്പത്തിക രംഗം തിരികെപ്പിടിക്കാനുള്ള നീക്കങ്ങളുടെ ഭാഗമായാണ് ആഗസ്ത്് 30ന് ബാങ്കുകള് ലയിപ്പിക്കുന്നതെന്നാണ് കേന്ദ്ര ധനമന്ത്രി അറിയിച്ചിരിക്കുന്നത്.
ഇന്ത്യന് ബാങ്കും അലഹാബാദ് ബാങ്കും ലയിപ്പിച്ച് രാജ്യത്തെ ഏഴാമത്തെ വലിയ ബാങ്കിങ് ശൃംഖലയാക്കും. ഇതിലൂടെ 8.08 ലക്ഷം കോടി രൂപയാകും ബാങ്കിന്റെ മൊത്തം ബാങ്കിങ് ബിസിനസ്. യൂണിയന് ബാങ്ക് ഓഫ് ഇന്ത്യ, ആന്ധ്രാ ബാങ്ക് കോര്പ്പറേഷന് ബാങ്ക് എന്നിവയെ ലയിപ്പിച്ച് രാജ്യത്തെ അഞ്ചാമത്തെ വലിയ ബാങ്കിങ് ശൃംഖലയാകും. 14.6 ലക്ഷം കോടിയാകും ഈ ബാങ്കിന്റെ മൊത്തം വ്യാപാരം. കനറാ ബാങ്ക്, സിന്ഡിക്കേറ്റ് ബാങ്ക് എന്നിവ ലയിച്ചാല് അത് രാജ്യത്തെ ഏറ്റവും വലിയ നാലാമത്തെ പൊതുമേഖലാ ബാങ്കാകും. ആകെ മൊത്തം ബാങ്കിങ് വ്യാപാരം 15.2 ലക്ഷം കോടി രൂപയാകും.
പഞ്ചാബ് നാഷണല് ബാങ്കും ഓറിയന്റല് ബാങ്കും യുണൈറ്റഡ് ബാങ്കും ഒന്നിച്ചാല് പഞ്ചാബ് നാഷണല് ബാങ്കായിരിക്കും ആങ്കര് ബാങ്ക്. ഇന്ത്യയിലെ രണ്ടാമത്തെ ബാങ്കായി പുതിയ ബാങ്ക് മാറും. കഴിഞ്ഞ വര്ഷം കേന്ദ്ര സര്ക്കാര് വിജയാ ബാങ്കും ദേനാ ബാങ്കും ബാങ്ക് ഓഫ് ബറോഡയുമായി ലയിപ്പിച്ചിരുന്നു. 2019 ഏപ്രില് ഒന്നുമുതലായിരുന്നു ലയനം നിലവില് വന്നത്. 2017-ല് സ്റ്റേറ്റ് ബാങ്ക് ഓഫ് ഇന്ത്യയുമായി സ്റ്റേറ്റ് ബാങ്ക് ഓഫ് ട്രാവന്കൂര് അടക്കം അഞ്ച് അസോസിയേറ്റ് ബാങ്കുകളും ഭാരതീയ മഹിളാ ബാങ്കും ലയിപ്പിച്ചിരുന്നു.
