ബംഗളൂരു: ചന്ദ്രയാന് രണ്ടിന്റെ ലാന്ഡറായ വിക്രം ചന്ദ്രോപരിതലത്തില് എവിടെയാണെന്ന് കണ്ടെത്തി ഐഎസ്ആര്ഒ. ലാന്ഡറിന്റെ തെര്മല് ചിത്രങ്ങള് ഓര്ബിറ്റര് പകര്ത്തിയതായി ഇസ്രോ ചെയര്മാന് കെ. ശിവന് ഔദ്യോഗികമായി അറിയിച്ചു.വിക്രം ലാന്ഡറിന്റെ സ്ഥാനം കണ്ടെത്തിയെങ്കിലും ഇതുമായുള്ള ആശയവിനിമയം സാധ്യമായില്ല എന്നാണ് ഐഎസ്ആര്ഒ അറിയിക്കുന്നത്. ഇതിനായുള്ള ശ്രമം തുടരുകയാണ്. ചന്ദ്രയാന് രണ്ട് ഓര്ബിറ്ററില് നിന്ന് വിക്രം ലാന്ഡറിന്റെ തെര്മ്മല് ഇമേജ് ലഭിച്ചതായി ഇസ്രൊ ചെയര്മാന് ശിവനെ ഉദ്ധരിച്ച് വാര്ത്താ ഏജന്സി എഎന്ഐയാണ് ഇക്കാര്യം പുറത്ത് വിട്ടത്. വിക്രം ചന്ദ്രോപരിതലത്തില് ഉണ്ട് എന്നതിന് ഇതോടെ സ്ഥിരീകരണമായി പക്ഷേ വിക്രമുമായുള്ള ബന്ധം പുനസ്ഥാപിക്കാന് ഇത് വരെ സാധിച്ചിട്ടില്ല. ചന്ദ്രോപരിതലത്തില് ലാന്ഡിങ് തൊട്ടുമുന്പാണ് ലാന്ഡറുമായുള്ള ബന്ധം നഷ്ടമായത്.
ചന്ദ്രയാന് 2 ദൗത്യത്തിന്റെ ഭാഗമായ ലാന്ഡറുമായുള്ള ആശയവിനിമയം നഷ്ടമായെങ്കിലും ഓര്ബിറ്റര് സുരക്ഷിതമാണെന്ന് ഐ.എസ്.ആര്.ഒ നേരത്തേ വ്യക്തമാക്കിയിരുന്നു. ഇതു ചന്ദ്രനു ചുറ്റം ഇപ്പോഴും ഭ്രമണം ചെയ്തുകൊണ്ടിരിക്കുകയാണെന്നും ഐ.എസ്.ആര്.ഒ പത്രക്കുറിപ്പില് വ്യക്തമാക്കി. ഓര്ബിറ്ററിന് കേടുപാടുകളില്ല. ചന്ദ്രന്റെ ഭ്രമണപഥത്തിലൂടെ സാധാരണരീതിയില് പ്രവര്ത്തിക്കുന്നുണ്ട് അദ്ദേഹം പറഞ്ഞു. ചന്ദ്രോപരിതലത്തെ കുറിച്ചും ചന്ദ്രന്റെ അന്തരീക്ഷത്തെക്കുറിച്ചും പഠിക്കുകയെന്നതാണ് ഓര്ബിറ്ററിന്റെ ദൗത്യം.
ഓര്ബിറ്റര്, ലാന്ഡര്(വിക്രം), റോവര്(പ്രഗ്യാന്) എന്നിങ്ങനെ മൂന്നുഭാഗങ്ങളാണ് ചന്ദ്രയാന് രണ്ടിനുള്ളത്. ഇതില്, 2,379 കിലോ ഭാരമുള്ള ഓര്ബിറ്ററിന്റെ ആയുസ് ഒരുവര്ഷമാണ്. ജൂലൈ 22ന് ഉച്ചയ്ക്ക് ശേഷം 2.43നാണ് ബാഹുബലി എന്ന വിളിപ്പേരുള്ള ജി എസ് എല് വി മാര്ക്ക് മൂന്ന് റോക്കറ്റില് ചന്ദ്രയാന് രണ്ട് കുതിച്ചുയര്ന്നത്. ഒരു വര്ഷത്തെ കാലാവധിയുള്ള ഓര്ബിറ്റര് ചന്ദ്രന്റെ വിവിധ ചിത്രങ്ങള് എടുത്തയക്കും എന്നതാണ് പ്രധാനമെന്നും ശാസ്ത്രജ്ഞര് വ്യക്തമാക്കി. ലാന്ഡറിന്റെ ചിത്രങ്ങളും ഓര്ബിറ്റര് എടുക്കും. ലാന്ഡറിന്റെ നിലവിലെ അവസ്ഥ മനസ്സിലാക്കാനും ഇതിലൂടെ സാധിക്കുമെന്നാണ് കരുതപ്പെടുന്നത്.
