ന്യൂദല്‍ഹി: പാവപ്പെട്ടവര്‍ക്ക് സൗജന്യമായി പാചകവാതക കണക്ഷന് നല്‍കുന്ന പ്രധാനമന്ത്രി ഉജ്ജ്വല്‍ യോജന സമയ പരിധിക്ക് മുന്‍പേ ലക്ഷ്യം കണ്ടു. ഔറംഗാബാദില്‍ നടന്ന ചടങ്ങില്‍ അയേഷ ഷെയ്ഖിനാണ് എട്ടു കോടി തികയ്‌ക്കുന്ന ഗ്യാസ് കണക്ഷന് പ്രധാനമന്ത്രി നരേന്ദ്ര മോദി നല്‍കിയത്. ഞങ്ങള്‍ നല്‍കിയ വാക്കു പാലിക്കുന്നു, അതു കാലാവധി പറഞ്ഞതിനേക്കാള്‍ ഏഴുമാസം മുന്‍പു തന്നെ. ചടങ്ങില്‍ പ്രധാനമന്ത്രി പ്രഖ്യാപിച്ചു.
പ്രതിപക്ഷ നേതാക്കളടക്കം പുകഴ്‌ത്തിയ മോദി സര്‍ക്കാരിന്റെ സ്വപ്ന പദ്ധതിയാണ് ഉജ്ജ്വല്‍ യോജന. 2019 തെരഞ്ഞെടുപ്പില്‍ വന്‍വിജയം നേടാന്‍ സഹായിച്ചതിനു പിന്നിലും പാവങ്ങള്‍ക്ക് ഏറെ പ്രയോജനകരായ ഉജ്ജ്വല്‍ യോജനയായിരുന്നു. 2020 മാര്‍ച്ച് മാസമായിരുന്നു 8 കോടി കണക്ഷന് സര്‍ക്കാര്‍ മുന്നോട്ടു വച്ച സമയപരിധി. എന്നാല്‍, ഓഗസ്റ്റ് 26ലെ കണക്ക് പ്രകാരം ഇതിനകം 7.97 കോടി കണക്ഷനുകള്‍ നല്‍കിക്കഴിഞ്ഞിട്ടുണ്ട്. എട്ടു കോടി എന്ന ലക്ഷ്യം പൂര്‍ത്തിയായാല്‍ അര്‍ഹരായ കൂടുതല്‍ പാവങ്ങള്‍ക്കു കൂടി പദ്ധതിയുടെ പ്രയോജനം ലഭ്യമാക്കാന്‍ ഒരുങ്ങുകയാണ് മോദി സര്‍ക്കാര്‍.
ഈ ഫെബ്രുവരിയിലാണ് അഞ്ചു കോടി കണക്ഷന് എന്നത് 2020 മാര്‍ച്ചോടെ എട്ടു കോടിയാക്കാന്‍ തീരുമാനിച്ചത്. ഇതിനായി 4800 കോടി രൂപ അധികമായി മോദി സര്‍ക്കാര്‍ അനുവദിച്ചിരുന്നു. 2016 മേയ് മാസത്തിലാണ് മോദി തന്റെ സ്വപ്ന പദ്ധതിയായ ഉജ്ജ്വല്‍ യോജന അവതരിപ്പിച്ചത്. ഉത്തര്‍പ്രദേശ് തെരഞ്ഞെടുപ്പിനു ഒമ്പതു മാസം മുന്‍പാണ് പദ്ധതിയുടെ ഉദ്ഘാടനം നടത്തിയത്. യുപിയിലെ ബല്ലിയ ജില്ലയിലായിരുന്നു ഉദ്ഘാടനം. വര്‍ഷങ്ങള്‍ക്കു ശേഷം യുപിയില്‍ ബിജെപിയെ അധികാരത്തില്‍ എത്താന്‍ സഹായിച്ചതില്‍ ഉജ്ജ്വല്‍ യോജനയുടെ പങ്ക് സുപ്രധാനമായിരുന്നു. 8000 കോടി രൂപയാണ് പദ്ധതിയുടെ പ്രാരംഭഘട്ടത്തിനായി നീക്കിവച്ചത്. പദ്ധതി പ്രകാരം ഇതിനകം 10,675 കോടി രൂപ എണ്ണ കമ്പനികള്‍ക്ക് സര്‍ക്കാര്‍ നല്‍കി കഴിഞ്ഞിട്ടുണ്ട്. എട്ടു കോടി ഔദ്യോഗികമായി പൂര്‍ത്തിയായിക്കഴിഞ്ഞാല്‍ മറ്റൊരു വന്‍ പ്രഖ്യാപനവും ഉടന്‍ ഉണ്ടാകുമെന്നാണ് കേന്ദ്രസര്‍ക്കാരുമായി ബന്ധപ്പെട്ട അടുത്ത കേന്ദ്രങ്ങള്‍ നല്‍കുന്ന സൂചന. ദാരിദ്രരേഖയ്‌ക്കു താഴെയുള്ള എല്ലാ കുടുംബങ്ങള്‍ക്ക് സൗജന്യ ഗ്യാസ് കണക്ഷന് എന്നതാണ് പുതിയ ലക്ഷ്യം. പദ്ധതിയില്‍ അംഗമാകാന്‍ ഇതുവരെ 10 കോടി അപേക്ഷകളാണ് ലഭിച്ചത്. വളരെ സുതാര്യമായ പരിശോധനകളിലൂടെയാണ് അര്‍ഹരായവരെ കണ്ടെത്തിയത്. കുടുംബത്തിലെ മറ്റാര്‍ക്കെങ്കിലും ഗ്യാസ് കണക്ഷന് ഉണ്ടെങ്കില്‍ പദ്ധതി പ്രകാരമുള്ള ആനുകൂല്യം ലഭിക്കില്ല.
