ബംഗളുരു: ചന്ദ്രയാന് 2 ദൗത്യം അവസാന ഘട്ടത്തില് ലക്ഷ്യം പൂര്ത്തീകരിക്കാന് സാധിക്കാതെ മനംനൊന്ത് വിതുമ്പിയ ഐഎസ്ആര്ഒ ചെയര്മാനെ മാറോടണച്ച് ആശ്ലേഷിക്കുന്ന പ്രധാനമന്ത്രിയെ ഹൃദയത്തോടണയ്ച്ച് സോഷ്യല് മീഡിയ. ‘എന്റെ പ്രധാനമന്ത്രി മനുഷ്യനാണ്’ എന്ന അടിക്കുറിപ്പോടെയാണ് ട്വിറ്ററില് വീഡിയോ വ്യാപകമായി ടീറ്റുകള് ചെയ്യപ്പെടുന്നത്.ഐഎസ്ആര്ഒ ആസ്ഥാനത്തു നിന്നും പ്രധാനമന്ത്രി മടങ്ങുമ്പോഴായിരുന്നു എല്ലാവരുടെയും കണ്ണുനനഞ്ഞത്. പ്രധാനമന്ത്രിയെ യാത്രയാക്കാനെത്തിയ ഐഎസ്ആര്ഒ ചെയര്മാന് കെ ശിവന് വിതുമ്പി. കണ്ണട ഊരി വിങ്ങിപൊട്ടിയ ശിവനെ മിനിറ്റുകളോളം നെഞ്ചോടു ചേര്ത്ത് ചുമലില് തലോടി പ്രധാനമന്ത്രി ആശ്വസിപ്പിച്ചു . ഇന്ത്യക്കാരുടെ കണ്ണുനനയിച്ച നിമിഷങ്ങളായിരുന്നു അത്.
ഇതിന്റെ ദൃശ്യങ്ങളാണ് ഇപ്പോള് സാമൂഹിക മാധ്യമങ്ങള് എറ്റെടുത്തിരിക്കുന്നത്. എന്റെ പ്രധാനമന്ത്രി മനുഷ്യനാണെന്നും ലക്ഷക്കണക്കിന് ഹൃദയങ്ങള് സ്വന്തമാക്കിയിരിക്കുകയാണ് ഇരുവരുമെന്ന് അടിക്കുറിപ്പോടുകൂടിയാണ് നിരവധിപേര് വീഡിയോ ട്വീറ്റ് ചെയ്തിരിക്കുന്നത്.ശാസ്ത്രജ്ഞരെ സല്യൂട്ട് ചെയ്യുന്നതായി പ്രധാനമന്ത്രി പറഞ്ഞു. കഴിഞ്ഞ കുറച്ചു മണിക്കൂറുകളായി നിങ്ങള് ഏത് അവസ്ഥയിലൂടെയാണു കടന്നുപോകുന്നതെന്ന് നിങ്ങളുടെ കണ്ണുകള് പറയുന്നുണ്ട്. നിങ്ങള്ക്കെല്ലാവര്ക്കും ഇന്ത്യയുടെ ആദരമുണ്ടാകും. ഞാന് നിങ്ങളെ സല്യൂട്ട് ചെയ്യുന്നു ശാസ്ത്രജ്ഞരോടു പ്രധാനമന്ത്രി പറഞ്ഞു.
കുറച്ചു മണിക്കൂറുകളായി രാജ്യമാകെ സങ്കടത്തിലാണ്. നമ്മുടെ ശാസ്ത്രജ്ഞരുടെ കൂടെ എല്ലാവരും ഐക്യപ്പെടുകയാണ്. ഈ ബഹിരാകാശ പദ്ധതിയില് നമുക്ക് അഭിമാനമുണ്ട്. ഇതോടെ ചന്ദ്രനെ തൊടാനുള്ള ഇന്ത്യയുടെ പ്രതിജ്ഞ കൂടുതല് ശക്തമായതായും പ്രധാനമന്ത്രി പറഞ്ഞു. നമ്മുടെ ചരിത്രത്തില് തന്നെ പല സാഹചര്യങ്ങളിലും പതുക്കെയായിപ്പോയിട്ടുണ്ടെന്നും മോദി പറഞ്ഞു. പക്ഷേ നമ്മുടെ മനോഭാവത്തെ അതൊന്നും തകര്ത്തിട്ടില്ല. നമ്മള് തിരിച്ചുവന്ന് നിരവധി നേട്ടങ്ങള് സ്വന്തമാക്കി. നമ്മുടെ സംസ്കാരം ഉന്നതങ്ങളിലെത്താന് കാരണവും അതാണ്. ഐഎസ്ആര്ഒ സംഘം കഠിനാധ്വാനം ചെയ്തു, ഒരുപാടു ദൂരം സഞ്ചരിച്ചു, ഈ പാഠമാണ് നമ്മോടൊപ്പം ഉണ്ടാകേണ്ടതെന്നും പ്രധാനമന്ത്രി വ്യക്തമാക്കി.
