ന്യൂദല്ഹി: 2010 ജൂലൈ 25, സൊറാബുദ്ദീന് കേസില് ഉള്പ്പെടുത്തി ഇന്നത്തെ ആഭ്യന്തരമന്ത്രി അമിത് ഷായെ അറസ്റ്റു ചെയ്യുന്നത് അന്നാണ്. അന്നത്തെ ആഭ്യന്തരമന്ത്രി പി. ചിദംബരം. പിന്നീട് ജുഡീഷ്യല് കസ്റ്റഡിയില് ആയി അമിത് ഷാ സബര്മതി ജയിലില് തടവില് കഴിഞ്ഞത് നിലത്ത് കിടന്നുറങ്ങി. പ്രത്യേക സൗകര്യങ്ങളൊന്നും നല്കേണ്ടെന്നു സര്ക്കാരും നല്കിയാലും വേണ്ടെന്നു അമിത് ഷായും നിലപാടെടുത്തു. 9 വര്ഷങ്ങള്ക്കിപ്പുറം കാലം ചിലത് മാറ്റിവരച്ചു. അന്നത്തെ ആഭ്യന്തരമന്ത്രി പി.ചിദംബരം ഐഎന്എക്സ് മീഡിയ കേസില് തിഹാര് ജയിലില് ഏഴാം നമ്പര് സെല്ലില് സിമന്റ് തറയില് തടവില് കിടന്നുറങ്ങേണ്ടി വന്നു. ഇന്നത്തെ ആഭ്യന്തരമന്ത്രി അന്ന് തടവില് കഴിഞ്ഞ അമിത് ഷാ എന്നത് ചരിത്രനിയോഗം.
ചിദംബരം ജയിലിലെ ആദ്യ രാത്രി അത്ര സുഖകരമല്ലെന്നാണു റിപ്പോര്ട്ട്. അദ്ദേഹം ഉറങ്ങാതെ അസ്വസ്ഥനായിരുന്നു.ഉറക്കം വരുന്നില്ല എന്നു പറഞ്ഞ സെല്ലില് നടക്കുകയായിരുന്നു മുന്കേന്ദ്ര മന്ത്രി. രാത്രി ജയില് വളപ്പിലൂടെ നടക്കാന് അനുമതി ചോദിച്ചു എങ്കിലും അധികൃതര് നല്കിയില്ല. പുലര്ച്ചെ വെറും നിലത്ത് ഇരുന്നുറങ്ങുന്ന ചിദംബരത്തെ ആണ് ജയില് ജീവനക്കാര് കണ്ടത്. ചിദംബരത്തിന്റെ സെല്ലില് തന്നെ കുളിക്കാന് സൗകര്യം ഉണ്ട്. കുളി കഴിഞ്ഞ് മറ്റ് തടവുകാര്ക്കൊപ്പം ഇരുത്തി പ്രഭാത ഭക്ഷണം നല്കി. അവര്ക്കൊപ്പം ഇരുത്തരുത് എന്ന് ചിദംബരം കേണു പറഞ്ഞിട്ടും ജയില് അധികൃതര് സമ്മതിച്ചില്ല. ചിദംബരത്തിനായി പ്രത്യേക സൗകര്യങ്ങളൊന്നും ജയിലില് ഒരുക്കിയിരുന്നില്ല. ജയിലില് ചിദംബരത്തിനു കിടക്കാന് കട്ടില് നല്കി എന്ന വാര്ത്തയും ജയില് അധികൃതര് നിഷേധിച്ചു.
രാവിലെ ആറു മണിയോടെ ചിദംബരം തല കുനിച്ച് നടന്ന് വന്ന് മറ്റ് തടവുകാര്ക്കൊപ്പം ഇരുന്ന് അവരില് ഒരാളായി ഉപ്പുമാവും ചായയുമാണ് അദ്ദേഹം കഴിച്ചത്. മുന് കേന്ദ്ര മന്ത്രി എന്ന നിലയില് ഇസെഡ് പ്ലസ് സുരക്ഷയുണ്ടെങ്കിലും ചിദംബരത്തിന് ജയിലില് പ്രത്യേക ആനുകൂല്യങ്ങളൊന്നും നല്കിയിട്ടില്ല. പകല് സമയം സെല്ലിന് പുറത്തിറങ്ങി നടക്കാന് അദ്ദേഹത്തിന് അനുമതിയുണ്ട്. കണ്ണടയും മരുന്നും കൈവശം വെക്കാന് അനുവദിക്കണമെന്ന അദ്ദേഹത്തിന്റെ ആവശ്യം കോടതി കഴിഞ്ഞ ദിവസം തന്നെ അനുവദിച്ചിരുന്നു. വ്യാഴാഴ്ച രാത്രിയിലെ ഭക്ഷണം ജയിലില് നിന്ന് തന്നെയായിരുന്നു. തടവുകാര്ക്കുള്ള ലൈബ്രറിയില് അദ്ദേഹത്തിന് അനുമതിയുണ്ട്. നിശ്ചിത സമയം ടെലിവിഷന് കാണാന് പറ്റും. പത്രവും ലഭിക്കും. പ്രായം പരിഗണിച്ച് തലയണയും പുതപ്പും നല്കിയിട്ടുണ്ട്. എന്നാലും കട്ടില് കൊടുക്കില്ല. മുന്കൂര് ജാമ്യാപേക്ഷ ഹൈക്കോടതി തള്ളിയതിനെത്തുടര്ന്ന് ഓഗസ്റ്റ് 21-നാണ് നാടകീയ നീക്കത്തിലൂടെ ചിദംബരത്തെ ഡല്ഹിയിലെ വീട്ടില്നിന്ന് സി.ബി.ഐ. അറസ്റ്റുചെയ്തത്. അഞ്ചു തവണയായി കോടതി നീട്ടി നല്കിയ 15 ദിവസത്തെ സി.ബി.ഐ. കസ്റ്റഡി വ്യാഴാഴ്ചയാണ് അവസാനിച്ചത്. തിഹാര് ജയിലിലേക്കു പോകേണ്ടിവരുമെന്നതിനാല് ജുഡീഷ്യല് കസ്റ്റഡിയെ ചിദംബരത്തിന്റെ അഭിഭാഷകര് ശക്തമായി എതിര്ത്തെങ്കിലും ഫലം കണ്ടില്ല.
