ന്യൂദല്ഹി : ഐഎന്എക്സ് അഴിമതി കേസില് മുന് കേന്ദ്ര ധനമന്ത്രി പി. ചിദംബരം സിബിഐ കസ്റ്റഡിയില് തന്നെ തുടരും. കേസിലെ ചോദ്യം ചെയ്യല് പൂര്ത്തി ആയെന്നും കസ്റ്റഡിയില് വേണ്ടെന്ന് കേന്ദ്ര സര്ക്കാര് കോടതിയെ അറിയിച്ചെങ്കിലും സിബിഐ കസ്റ്റഡിയില് തന്നെ വിട്ടുകൊണ്ട് കോടതി ഉത്തരവിറക്കുകയായിരുന്നു. സിബിഐയുടെ റിമാന്ഡിനെതിരെ ചിദംബരം നല്കിയ ഹര്ജി പരിഗണിക്കവേ ജസ്റ്റിസ് ആര്. ഭാനുമതി അധ്യക്ഷയായ ബെഞ്ചിന്റേതാണ് ഈ ഉത്തരവ്.
ചിദംബരത്തിന് 73 വയസ്സുണ്ടെന്നും അതിനാല് തീഹാര് ജയിലിലേക്ക് അയയ്ക്കരുതെന്നും അദ്ദേഹത്തിന്റെ അഭിഭാഷകന് കോടതിയില് അറിയിച്ചിരുന്നു. അതേസമയം ചോദ്യം ചെയ്യല് അവസാനിച്ചെന്നും കസ്റ്റഡിയില് ലഭിക്കണമെന്നില്ല, നിയമം നിയമത്തിന്റെ വഴിക്ക് പോകട്ടെയെന്നുമാണ് കേന്ദ്രസര്ക്കാര് കോടതിയില് അറിയിച്ചത്.
ചിദംബരത്തിന്റെ ജാമ്യത്തിനായി ഇനി കേസ് പരിഗണിക്കുന്ന സെപ്റ്റംബര് അഞ്ച് വരെ വാദിക്കുകയോ അപേക്ഷ നല്കുകയോ ചെയ്യില്ലെന്ന് അഭിഭാഷകരായ കപില് സിബലും, അഭിഷേക് സിങ്വിയും കോടതിയില് ഉറപ്പ് നല്കി. ഇത് കണക്കിലെടുത്താണ് അദ്ദേഹത്തെ തിഹാറിലേക്ക് അയക്കേണ്ടതില്ല, അദ്ദേഹം സിബിഐ കസ്റ്റഡിയില് തുടരട്ടെയെന്ന് സുപ്രീംകോടതിയും നിലപാടെടുത്തത്.
ഐഎന്എക്സ് മീഡിയ അഴിമതിക്കേസില് ചിദംബരത്തെ അറസ്റ്റ് ചെയ്യുന്നത് തടയണമെന്ന അപേക്ഷ ദല്ഹി ഹൈക്കോടതി കഴിഞ്ഞ മാസം തള്ളിയതിനെത്തുടര്ന്നാണ് അദ്ദേഹം പിന്നീട് സുപ്രീംകോടതിയെ സമീപിക്കുന്നത്. ആഗസ്ത് 21 രാത്രി മുതല് അദ്ദേഹം സിബിഐ കസ്റ്റഡിയിലാണ്. എന്ഫോഴ്സ്മെന്റ് അദ്ദേഹത്തെ അറസ്റ്റ് ചെയ്യാനൊരുങ്ങിയിരുന്നെങ്കിലും സുപ്രീംകോടതി തത്കാലം അത് സ്റ്റേ ചെയ്തിരിക്കുകയാണ്. ഇഡി കേസിലെ മുന്കൂര് ജാമ്യഹര്ജിയില് വ്യാഴാഴ്ച സുപ്രീംകോടതി വിധി പറയും.
എന്നാല് സുപ്രീംകോടതിയുടെ ഈ ഉത്തരവില് വിയോജിപ്പുണ്ടെന്ന് സോളിസിറ്റര് ജനറല് തുഷാര് മേഹ്ത അറിയിച്ചു. ഒരാള് ജുഡീഷ്യല് കസ്റ്റഡിയില് തുടരാനാഗ്രഹിക്കുന്നില്ല എന്നതു കൊണ്ടോ, ജയിലില് പോകാന് ആഗ്രഹിക്കാത്തതിനാല് ഇത്തരത്തില് ഉത്തരവിടണോയെന്നും അദ്ദേഹം ചോദിച്ചു. വിചാരണക്കോടതിയുടെ തീരുമാനങ്ങളില് സുപ്രീംകോടതി ഇടപെടരുതെന്നും മേഹ്ത പറഞ്ഞു.
