പത്തനംതിട്ട: കോന്നി മന്നം മെമ്മോറിയല് എന്എസ്എസ് കോളേജിനെ എസ്എഫ്ഐക്കാര് കലാപഭൂമിയാക്കരുത് എന്ന സന്ദേശവുമായി ജനകീയ കൂട്ടായ്മ സംഘടിപ്പിച്ചു. ബുധനാഴ്ച കോളേജ് കവാടത്തില് നടന്ന കൂട്ടായ്മയില് വിദ്യാര്ത്ഥികള്ക്കും രക്ഷകര്ത്താക്കള്ക്കും പുറമെ കോളേജിനെ സംഘര്ഷ രഹിതമാക്കണമെന്ന് ആഗ്രഹിക്കുന്ന നാട്ടുകാരും പങ്കെടുത്തു. നാളുകളായി കോളേജില് എസ്എഫ്ഐക്കാര് നടത്തുന്ന അക്രമത്തില് പ്രദേശവാസികള്ക്കും പ്രതിഷേധമുണ്ട്.
അക്രമ രാഷ്ട്രീയത്തില് മനംമടുത്ത വിദ്യാര്ത്ഥികള് ഒന്നടങ്കം ഇത്തവണ എബിവിപിക്ക് വോട്ട് നല്കിയതോടെ കോളേജ് യൂണിയന് എസ്എഫ്ഐക്ക് നഷ്ടമായി. കഴിഞ്ഞ ദിവസം അദ്ധ്യാപകര് പഠിപ്പിച്ചു കൊണ്ടിരിക്കുമ്പോള് അവരുടെ മുന്പില് ഒരു പറ്റം എസ്എഫ്ഐ അക്രമികള് പല ഗ്രൂപ്പുകളായി പെണ്കുട്ടികളെ അടക്കം ക്ലാസുകളില് കയറി മൃഗീയമായി തല്ലിച്ചതയ്ക്കുകയായിരുന്നു. സംഭവം ഞെട്ടിപ്പിക്കുന്നതും നാടിനു തന്നെ നാണക്കേട് ഉണ്ടാക്കുന്നതുമാണെന്ന് കൂട്ടായ്മയില് പങ്കെടുത്ത എല്ലാവരും ഏക സ്വരത്തില് അഭിപ്രായപ്പെട്ടു.
തങ്ങള്ക്ക് ഭയമില്ലാതെ സമാധാനപരമായി പഠിക്കാനുള്ള സാഹചര്യം ഉണ്ടാവണമെന്ന് വിദ്യാര്ത്ഥികളും, അക്രമം നടത്തിയ വിദ്യാര്ത്ഥികളെ കോളേജില് നിന്നും പുറത്താക്കണമെന്ന് രക്ഷിതാക്കളും ആവശ്യപ്പെട്ടു. കോളേജ് യൂണിയന് ചെയര്മാന് അഭിജിത്, മീന എം നായര്, ജ്യോതി ഡി കുറുപ്പ്, എ.ആര്. രാജേഷ്, മലയാലപ്പുഴ ഗ്രാമ പഞ്ചായത്ത് അംഗം ജി. മനോജ് എന്നിവര് പ്രസംഗിച്ചു.
