ഭോപ്പാല്: കര്ഷകരെ വഞ്ചിച്ച രാഹുല് ഗാന്ധിയുടെയും മധ്യപ്രദേശ് സര്ക്കാരിന്റെയും പൊള്ളത്തരങ്ങള് തുറന്നുകാട്ടി സമരം ചെയ്ത മധ്യപ്രദേശ് മുന് മുഖ്യമന്ത്രി ശിവരാജ് സിങ് ചൗഹാനെ പോലീസ് അറസ്റ്റ് ചെയ്തു. ശിവപുരിയിലെ പിച്ചോറില് നടന്ന കര്ഷക പ്രക്ഷോഭത്തിനിടെയാണ് ബി.ജെ.പി നേതാവായ ശിവരാജ് സിങ് ചൗഹാനെ അറസ്റ്റ് ചെയ്തത്. പോലീസ് നടപടിയില് പ്രതിഷേധിച്ച് കര്ഷകര് രംഗത്തെത്തി. ഇവര് പോലീസിന്റെ വാഹനങ്ങള് തടയുകയും നേരിയ സംഘര്ഷം ഉണ്ടാവുകയും ചെയ്തിരുന്നു. തുടര്ന്ന് രാഷ്ട്രീയ നേതാക്കള് ഇടപെട്ടാണ് കര്ഷകരെ ശാന്തമാക്കിയത്.
കാര്ഷിക വായ്പകള് എഴുതിതള്ളാമെന്ന രാഹുല് ഗാന്ധിയുടെയും മധ്യപ്രദേശ് സര്ക്കാരിന്റെ വാഗ്ദാനം നടപ്പിലാക്കാത്തതില് പ്രതിഷേധിച്ചാണ് ശിവരാജ് സിങ് ചൗഹാന്റെ നേതൃത്വത്തില് പ്രക്ഷോഭം സംഘടിപ്പിച്ചത്. ഇതിനെതിരെ മധ്യപ്രദേശ് സര്ക്കാര് എകാധിപത്യ നിലപാട് സ്വീകരിക്കുകയായിരുന്നു. അധികാരത്തിലെത്തി ഇത്രയുംനാളായിട്ടും കമല്നാഥ് സര്ക്കാര് കര്ഷകരുടെ വായ്പകള് എഴുതിത്തള്ളിയില്ലെന്നും, സര്ക്കാര് നല്കിയ ഒരു വാഗ്ദാനവും പാലിച്ചില്ലെന്നും ചൗഹാന് ആരോപിച്ചു. സര്ക്കാരിന്റെ ഈ നടപടികള് കൊണ്ടൊന്നും ഞങ്ങള് പേടിക്കാന് പോകുന്നില്ലെന്നും, അടിയന്തരാവസ്ഥ കാലത്തുപോലും പേടിക്കാത്ത ഞങ്ങള് എന്തുകൊണ്ട് ഇപ്പോള് ഭയക്കണമെന്നും അറസ്റ്റ് വരിച്ചുകൊണ്ട് അദേഹം ചോദിച്ചു. പോലീസിനെ കാണിച്ച് പേടിപ്പിക്കേണ്ടെന്നും അദേഹം പറഞ്ഞു.
കഴിഞ്ഞദിവസം അഗോര്മാല്വയില് കര്ഷകസമരത്തിലും ശിവരാജ് സിങ് ചൗഹാന് കോണ്ഗ്രസിനെതിരെയും സര്ക്കാരിനെതിരെയും രൂക്ഷ വിമര്ശനമുന്നയിച്ചിരുന്നു. നിയമസഭ തിരഞ്ഞെടുപ്പ് പ്രചരണത്തില് പത്തുദിവസം കൊണ്ട് രണ്ടുലക്ഷം വരെയുള്ള കാര്ഷിക വായ്പകള് എഴുതിത്തള്ളുമെന്നായിരുന്നു രാഹുല് ഗാന്ധിയുടെ പ്രഖ്യാപനം. നിശ്ചിതസമയത്തിനുള്ളില് പ്രഖ്യാപനം നടപ്പിലായില്ലെങ്കില് മുഖ്യമന്ത്രിയെ മാറ്റുമെന്നും രാഹുല്ഗാന്ധി പറഞ്ഞിരുന്നു. എന്നാല് എട്ടുമാസം കഴിഞ്ഞിട്ടും വാഗ്ദാനങ്ങള് പാലിക്കപ്പെട്ടില്ലെന്നും രാഹുല്ഗാന്ധിയുടെ കണക്കനുസരിച്ച് ഇപ്പോള് 24 മുഖ്യമന്ത്രിമാരെ നിയമിക്കേണ്ട സമയമായെന്നും ശിവരാജ് സിങ് ചൗഹാന് പറഞ്ഞിരുന്നു.
