മലപ്പുറം: മാധ്യമപ്രവര്ത്തകനായ കെ.എം ബഷീറ് വാഹനാപകടത്തില് കൊല്ലപ്പെട്ട സംഭവത്തിലെ കൂട്ടു പ്രതിയായ വഫക്കെതിരെ ഗുരുതര ആരോപണങ്ങളുമായി ഭര്ത്താവ്. വഫ ഫിറോസ് ഭീഷണിപ്പെടുത്തിയെന്ന ആരോപണവുമായി ഭര്ത്താവ് ഫിറോസ് വിവാഹ മോചന വക്കീല് നോട്ടീസ് അയച്ചു. വഫയുടെ വഴിവിട്ട ജീവിതരീതികള് ചോദ്യംചെയ്യുന്ന ഘട്ടങ്ങളില്, തനിക്ക് കേരളത്തില് ഉന്നതബന്ധങ്ങളുണ്ടെന്നും തന്റെ കാര്യങ്ങളില് ഇടപെട്ടാല് പാഠം പഠിപ്പിക്കുമെന്നും പലവട്ടം ഭീഷണിപ്പെടുത്തിയിരുന്നതായും ഫിറോസ് അയച്ച വക്കീല് നോട്ടീസില് പറയുന്നു. വഫയുടെ സ്വദേശമായ വെള്ളൂര്ക്കോണം മുസ്ലിം ജമാഅത്തിനും വഫയുടെ മാതാപിതാക്കള്ക്കുമാണ് വക്കീല് നോട്ടീസിന്റെ കോപ്പി അയച്ചത്. വക്കീല് നോട്ടീസിന്റെ പകര്പ്പ് മഹല്ല് കമ്മറ്റി ഓഫീസില് ലഭിച്ചതായി ഭാരവാഹികള് സ്ഥിരീകരിച്ചിട്ടുണ്ട്. കാര് അപടത്തിനുശേഷം വഫ ഫിറോസ് ഏഷ്യാനെറ്റ് ചാനലിന് നല്കിയ അഭിമുഖത്തില് തനിക്ക് പിന്തുണയുമായി ഭര്ത്താവും കുടുംബവുമുണ്ടെന്ന് പറഞ്ഞിരുന്നു. ഈ വാദഗതികള് പൂര്ണമായും തള്ളിയാണ് ഭര്ത്താവ് വക്കീല് നോട്ടീസ് അയച്ചിരിക്കുന്നത്.
ഇസ്ലാമികമല്ലാത്ത ജീവിതരീതി, പരപുരുഷ ബന്ധം, തന്റെ വാക്കുകള് മുഖവിലയ്ക്കെടുക്കാതെയും പരസ്പരം ആലോചിക്കാതെയും കുടുംബകാര്യങ്ങളില് തീരുമാനമെടുക്കല്, അനുമതിയില്ലാതെയുള്ള വിദേശയാത്രകള്, തന്റെ ചെലവില് വാങ്ങിയ കാര് സ്വന്തം പേരില് രജിസ്റ്റര് ചെയ്ത് ഇഷ്ടാനുസരണം രഹസ്യയാത്രകള് നടത്തല് തുടങ്ങി നിരവധി ആരോപണങ്ങളാണ് ഏഴുപേജുള്ള വക്കീല് നോട്ടീസിലുള്ളതെന്ന് മീഡിയാവണ് റിപ്പോര്ട്ട് ചെയ്യുന്നു. നോട്ടീസ് ലഭിച്ച് 14 ദിവസത്തിനുള്ളില് മറുപടി നല്കണമെന്നാണ് ആവശ്യപ്പെട്ടിരിക്കുന്നത്. വിവാഹജീവിതം ആരംഭിച്ചത് മുതല് അപകടം നടന്ന ദിവസം വരെയുള്ള, വഫയുമായി ബന്ധപ്പെട്ട സംഭവങ്ങള് നോട്ടീസില് വിശദീകരിക്കുന്നുണ്ട്.
