പത്തനംതിട്ട : ഹിന്ദു സമൂഹം ഇന്നു നേരിടുന്ന എല്ലാ പ്രശ്നങ്ങള്ക്കും കാരണം ആത്മീയതയില് നിന്നും അകന്നതുകൊണ്ടാണെന്ന് സ്വാമി ഉദിത് ചൈതന്യ പറഞ്ഞു. കൈപ്പുഴ ശ്രീകൃഷ്ണസ്വാമി ക്ഷേത്രത്തിലെ അഷ്ടമിരോഹിണി മഹോത്സവത്തിനു മുന്നോടിയായി നടന്ന ആത്മീയ വിജ്ഞാന സദസ്സില് പ്രഭാഷണം നടത്തുകയായിരുന്നു അദ്ദേഹം.
അയ്യായിരം വര്ഷത്തിലേറെ പഴക്കമുള്ള പുരാതനവും ശ്രേഷ്ഠവുമായ സംസ്കാരമാണു ഹിന്ദുവിന്റേത്. അത്തരമൊരു സംസ്കാരത്തിനുടമയാകുന്നതു തന്നെ ഭാഗ്യമാണ്. രാഷ്ട്രീയമായ ഭേദങ്ങളാല് ഹിന്ദുവെന്ന ചിന്തകളഞ്ഞു പ്രവര്ത്തിക്കുന്നതാണ് എല്ലാ പ്രശ്നങ്ങളുടെയും ഉറവിടം. അതിനാലാണ് കുടുംബ ബന്ധങ്ങളുടെ കെട്ടുറപ്പിനെയും ഇല്ലാതാക്കുന്നത്. എല്ലാ പ്രശ്നങ്ങള്ക്കുമുള്ള പരിഹാരം നമ്മുടെ ഗ്രന്ഥങ്ങളിലുണ്ട്. അതിനാല് നമ്മില് ആത്മീയമായ ഉണര്വ്വുണ്ടാകണം.
സര്ക്കാരുകളുടെ വിവേകമില്ലാത്ത പ്രവൃത്തികള് ജീവിതത്തിന്റെ സമസ്ത മേഖലകളെ മാത്രമല്ല പ്രകൃതിയെയും തകര്ക്കും. പ്രകൃതിയെ സംരക്ഷിച്ചാല് മാത്രമേ ദുരന്തങ്ങള് ഒഴിവാക്കാന് കഴിയൂ. ഭരിക്കുന്നവര്ക്ക് ധാര്ഷ്ട്യവും അഹങ്കാരവും ഉണ്ടാകുന്നത് ആത്മീയതയുടെ കുറവുകൊണ്ടാണ്. അത്തരം ഭരണാധികാരികളുടെ കീഴില് നാട്ടില് തുടര്ച്ചയായ ദുരന്തങ്ങളുണ്ടാകും. അതാണു നാമിപ്പോള് അനുഭവിച്ചറിയുന്നത്. ആസുര ശക്തികള് ഭരണത്തിലൂടെ ഹിന്ദുക്കളെ ദ്രോഹിക്കാന് തുടങ്ങിയതാണ് അടുത്ത കാലത്തായി ഹിന്ദുക്കളില് ആത്മീയ ഉണര്വ്വുണ്ടാകാന് കാരണം.
അവിവേകവും അഹങ്കാരവും വളര്ത്തുന്ന തലത്തിലേക്ക് ഇന്നത്തെ വിദ്യാഭ്യാസ സമ്പ്രദായം അധഃപതിച്ചു. അമേരിക്കയുടെയും മറ്റുള്ളവരുടെയും ചരിത്രം പഠിപ്പിക്കാതെ നമ്മുടെ ചരിത്രമാണ് പഠിപ്പിക്കേണ്ടത്. അതിന് ആര്ജ്ജവമുള്ള ഭരണാധികാരികളാണ് ഉണ്ടാകേണ്ടത്. ഇപ്പോള് നമ്മുടെ രാജ്യത്ത് ആര്ജ്ജവമുള്ള സര്ക്കാരാണുള്ളത്. അവര് നമ്മുടെ രാജ്യത്തിനും സമൂഹത്തിനും അന്യമായിക്കൊണ്ടിരിക്കുന്ന നമ്മുടെ സാംസ്കാരിക പൈതൃകം തിരിച്ചു കൊണ്ടുവരാനുള്ള ശ്രമത്തിലാണെന്നത് ഏറെ പ്രതീക്ഷ നല്കുന്നുവെന്നും അദ്ദേഹം പറഞ്ഞു.
പന്തളം കൊട്ടാരം നിര്വ്വാഹക സംഘം പ്രസിഡന്റ് പി.ജി. ശശികുമാര് വര്മ്മ സമ്മേളനം ഉദ്ഘാടനം ചെയ്തു. നമ്മില് പലരും വെറും ഹിന്ദു നാമധാരികള് മാത്രമാണെന്നും മറിച്ചായിരുന്നുവെങ്കില് സര്ക്കാര് ഹിന്ദുവിന്റെ തോളില് കയറിയിരുന്ന് ചെവി തിന്നുന്ന സാഹചര്യം ഉണ്ടാകില്ലായിരുന്നുവെന്നും അദ്ദേഹം പറഞ്ഞു. ക്ഷേത്രോപദേശക സമിതി പ്രസിഡന്റ് പി.സി.സജികുമാര് അദ്ധ്യക്ഷനായി. പന്തളം കൊട്ടാരം നിര്വ്വാഹക സംഘം സെക്രട്ടറി പി.എന്. നാരായണവര്മ്മ, പന്തളം വലിയകോയിക്കല് ശ്രീധര്മ്മശാസ്താ ക്ഷേത്രോപദേശക സമിതി പ്രസിഡന്റ് പൃഥ്വിപാല്, കൈപ്പുഴ ക്ഷേത്രോപദേശക സമിതി വൈസ് പ്രസിഡന്റ് മനോജ് നന്ദാവനം എന്നിവര് പ്രസംഗിച്ചു.
