ന്യൂദല്ഹി: കേന്ദ്ര സര്ക്കാര് നടപ്പാക്കുന്ന ദേശീയ വിദ്യാഭ്യാസ നയം ഭാരതീയ മൂല്യങ്ങളിലും സംസ്കാരത്തിലും അടിയുറച്ചതായിരിക്കണമെന്ന് ആര്എസ്എസ്. രാഷ്ട്രത്തിന്റെ ആത്മാഭിമാനത്തിന്റെയും സ്വാതന്ത്ര്യത്തിന്റെയും സ്വയംപര്യാപ്തതയുടെയും പാതയിലേക്ക് പുതിയ തലമുറയെ നയിക്കാന് കഴിയുന്ന തരത്തില് ദേശീയ വിദ്യാഭ്യാസനയം അവതരിപ്പിക്കുമെന്നാണ് കരുതുന്നതെന്ന് ആര്എസ്എസ് സര്സംഘചാലക് ഡോ. മോഹന് ഭാഗവത് പറഞ്ഞു.
ശിക്ഷാ സംസ്കൃതി ഉത്ഥാന് സംഘടിപ്പിച്ച ജ്ഞാനോത്സവത്തില് സംസാരിക്കുകയായിരുന്നു സര്സംഘചാലക്. എന്ഡിഎ സര്ക്കാര് ദേശീയ വിദ്യാഭ്യാസനയത്തിന്റെ കരടു രേഖ അവതരിപ്പിക്കാനൊരുങ്ങുമ്പോഴാണ് വിഷയത്തില് മോഹന് ഭാഗവതിന്റെ പ്രതികരണം. വാണിജ്യാടിസ്ഥാനത്തില് രൂപീകരിക്കുന്ന വിദ്യാഭ്യാസ രീതികള് അറിവു പ്രദാനം ചെയ്യില്ലെന്ന് അദ്ദേഹം പറഞ്ഞു. വിദ്യാഭ്യാസം കൊണ്ട് ഉദ്ദേശിക്കുന്ന യഥാര്ഥ ലക്ഷ്യം കൈവരിക്കാന് ഇത്തരം രീതികള്ക്കു കഴിയില്ല. വിദ്യാഭ്യാസത്തിന്റെ യഥാര്ഥ ലക്ഷ്യം സഫലമാക്കാന് കഴിയുന്ന തരത്തിലാകും പുതിയ നയമെന്നാണ് പ്രതീക്ഷയെന്നും മോഹന് ഭാഗവത് പറഞ്ഞു.
യൂറോപ്പിലെ ഏറ്റവും മികച്ച വിദ്യാഭ്യാസ രീതി ഫിന്ലന്ഡിലാണെന്നാണ് പൊതുവെ പറയുന്നത്. ഫിന്ലന്ഡില് നിന്നുള്ള വിദ്യാര്ഥികള് അന്താരാഷ്ട്ര വേദികളില് മികച്ച വിജയവും നേടുന്നു. എന്നാല്, വിജയങ്ങള് നേടാനല്ല, നല്ല ജീവിതം നയിക്കാന് പ്രാപ്തരാക്കുന്ന വിധമാണ് വിദ്യാഭ്യാസനയമെന്നാണ് ഫിന്ലന്ഡ് പറയുന്നത്. ഇത് മാതൃകയാക്കേണ്ടതാണ്, അദ്ദേഹം പറഞ്ഞു.
കഴിഞ്ഞവര്ഷം ന്യൂദല്ഹിയില് സംഘടിപ്പിച്ച മൂന്നു ദിവസത്തെ പ്രഭാഷണ പരമ്പരയില് ദേശീയ വിദ്യാഭ്യാസ നയം രൂപീകരിക്കേണ്ടതിനെക്കുറിച്ച് മോഹന് ഭാഗവത് വിശദമായി പരാമര്ശിച്ചിരുന്നു.
