കൊച്ചി : വാഹനം ഒടിച്ച് മാധ്യമ പ്രവര്ത്തകന് മരിക്കാന് ഇടയായ സംഭവത്തില് സര്വ്വീസില് നിന്നും സസ്പെന്ഡ് ചെയ്തത് പിന്വലിക്കണമെന്നാവശ്യപ്പെട്ട് ശ്രീറാം വെങ്കിട്ടരാമന്. കേസിലെ ജാമ്യം റദ്ദാക്കണമെന്ന സംസ്ഥാന സര്ക്കാരിന്റെ വാദം ഹൈക്കോടതി കഴിഞ്ഞ ദിവസം തള്ളിയിരുന്നു. ഈ സാഹചര്യത്തില് ശ്രീറാം സര്വ്വീസില് തിരിച്ചെടുക്കുന്നതിനായി സെന്ട്രല് അഡ്മിനിസ്ട്രേറ്റീവ് ട്രൈബ്യൂണലില് ഹര്ജി നല്കാനും തീരുമാനിച്ചിട്ടുണ്ട്.
കേന്ദ്ര സര്ക്കാര് ജീവനക്കാരുടെ സേവന സംബന്ധമായ തര്ക്കങ്ങളും പരാതികളും പരിഹരിക്കാനായി വിഭാവനം ചെയ്തിട്ടുള്ള സംവിധാനമാണ് സെന്ട്രല് അഡ്മിനിസ്ട്രേറ്റീവ് ട്രൈബ്യൂണല്. കേസില് നേരത്തെ കീഴ്ക്കോടതി ജാമ്യം അനുവദിച്ചതും ട്രൈബ്യൂണലിന്റെ ശ്രദ്ധയില് പെടുത്തും. തനിക്കെതിരേയുള്ള കുറ്റം തെളിയിക്കാന് പോലീസിനു സാധിച്ചിട്ടില്ല. ജീവിതത്തില് ഇതുവരെ മദ്യപിച്ചിട്ടില്ല. മനഃപൂര്വമല്ലാത്ത വാഹനാപകടമാണു സംഭവിച്ചത്. താന് മദ്യപിച്ചിരുന്നെന്നു സാക്ഷിമൊഴികള് മാത്രമാണ്. രക്തത്തില് മദ്യത്തിന്റെ അംശം കണ്ടത്താത്തതിനാല് നരഹത്യാക്കുറ്റം നിലനില്ക്കില്ല.
അതിനാല് സസ്പെന്ഷന് അന്യായമായ നടപടിയാണെന്നും പ്രബേഷനുശേഷമുള്ള ആദ്യ നിയമനത്തിനാണ് ചുമതലയേല്ക്കും മുമ്പ് സസ്പെന്ഷന് ലഭിച്ചിരിക്കുന്നതെന്നും ശ്രീറാം ട്രൈബ്യൂണലിന് നല്കുന്ന പരാതിയില് പ്രതിപാദിക്കും. വിദേശ പഠനത്തിനുശേഷം തിരിച്ചെത്തിയതിനുശേഷം സര്വ്വേ ഡയറക്ടറായി ആദ്യം നിയമിച്ചതിന്റെ ആഘോഷം കഴിഞ്ഞു മടങ്ങുമ്പോഴാണ് ശ്രീറാം ഓടിച്ച കാര് സിറാജ് പത്രത്തിന്റെ തിരുവനന്തപുരം ബ്യൂറോ ചീഫ് കെ.എം. ബഷീറിന്റെ ബൈക്കില് ഇടിച്ച് അപകടം സംഭവിക്കുന്നത്.
