കേദാര്‍ ജാദവും യുസ്‌വേന്ദ്ര ചഹലും പരിശീലനത്തിനിടെ
പോര്‍ട്ട് ഓഫ് സ്‌പെയിന്‍: പലരെയും പരീക്ഷിച്ച പരാജയപ്പെട്ട നാലാം നമ്പറിലേക്ക് യുവ താരം ശ്രേയസ് അയ്യര്‍ എത്തുന്നു. ഇന്ന് വിന്‍ഡീസിനെതിരായ രണ്ടാം ഏകദിനത്തില്‍ കേരളത്തില്‍ വേരുകളുള്ള ഈ മുംബൈ ബാറ്റ്‌സ്മാന്‍ ഇന്ത്യയുടെ നാലാം നമ്പറില്‍ ബാറ്റേന്തുമെന്നാണ് സൂചന. വൈകിട്ട് ഏഴിന് കളി തുടങ്ങും. മത്സരത്തിന് മഴ ഭീഷണിയില്ലെന്നാണ് കലാവസ്ഥ പ്രവചനം.
വിന്‍ഡീസിനെതിരായ ടി ട്വന്റി പരമ്പരയില്‍ കളിക്കാന്‍ കഴിയാതെപോയ അയ്യര്‍ ഗയാനയിലെ ആദ്യ ഏകദിനത്തിനുള്ള ഇന്ത്യയുടെ അവസാന പതിനൊന്നില്‍ സ്ഥാനം നേടിയിരുന്നു. പക്ഷെ മഴയെ തുടര്‍ന്ന് ആദ്യ ഏകദിനം ഉപേക്ഷിച്ചു.
ഈ ബാറ്റിങ് ഓര്‍ഡര്‍ മാറ്റം വരുത്താനുള്ള സാധ്യത കുറവാണ്. അതിനാല്‍ നാലാം നമ്പറില്‍ തന്നെ അയ്യര്‍ രണ്ടാം മത്സരത്തില്‍ ബാറ്റേന്തും. പരമ്പരയില്‍ രണ്ട് ഏകദിനങ്ങളാണ് ശേഷിക്കുന്നതെങ്കിലും ഈ മത്സരങ്ങളില്‍ മിന്നിത്തിളങ്ങിയാല്‍ അയ്യര്‍ക്ക് ചിലപ്പോള്‍ നാലാം നമ്പര്‍ സ്ഥിരമായി ലഭിച്ചേക്കും.
ഇന്ത്യ എ ടീമിനൊപ്പം വിന്‍ഡീസില്‍ പര്യടനം നടത്തിയ അയ്യര്‍ വിന്‍ഡീസ് എ ടീമിനെതിരെ രണ്ട് അര്‍ധ സെഞ്ചുറികള്‍ കുറിച്ചു. നായകന്‍ കോഹ്‌ലിയും ഉപനായകന്‍ രോഹിത് ശര്‍മയും അയ്യര്‍ക്ക്് മികച്ച പിന്തുണയാണ് നല്‍കുന്നത്്്. അതിനാല്‍ മികച്ച പ്രകടനം പ്രതീക്ഷിക്കാം.
അയ്യര്‍ നാലാമനായി ഇറങ്ങുന്നതോടെ രാഹുലിന് അവസാന ഇലവനില്‍ സ്ഥാനം നഷ്ടമാകും. ഓപ്പണര്‍മാരായ രോഹിത് ശര്‍മയ്‌ക്കോ ശിഖര്‍ ധവാനോ പരിക്കേറ്റാല്‍ മാത്രമെ രാഹുലിന് അവസരം ലഭിക്കു.
യുവ താരമായ കേദാര്‍ ജാദവിനും ഈ പരമ്പര നിര്‍ണായകമാണ്. ടീമില്‍ ചിരപ്രതിഷ്ഠ നേടാന്‍ കേദാറിന് മികച്ച പ്രകടനം തന്നെ പുറത്തെടുക്കേണ്ടിവരും. വിന്‍ഡീസ് എ ടീമിനെതിരെ ഇരട്ട സെഞ്ചുറി കുറിച്ച ശുഭ്മന്‍ ഗില്‍ സീനിയര്‍ ടീമില്‍ സ്ഥാനം മോഹിച്ച് കാത്തിരിക്കുകയാണ്. ഡെത്ത് ഓവറുകളില്‍ പരാജയപ്പെടുന്നതാണ് കേദാറിന്റെ പ്രശ്‌നം.
കുല്‍ദീപ് യാദവും രവീന്ദ്ര ജഡേജയും അവസാന ഇലവനില്‍ ഉണ്ടാകും. ഭുവനേശ്വര്‍ കുമാറിന് വിശ്രമം നല്‍കിയാല്‍ യുവ പേസര്‍ നവ്ദീപ് സെയ്‌നിക്ക് നറുക്ക്് ലഭിക്കും.
ആദ്യ മത്സരത്തില്‍ മൂന്ന് ഓവറില്‍ 27 റണ്‍സ് വിട്ടുകൊടുത്ത പേസര്‍ ഖലീല്‍ അഹമ്മദിനെ ഒഴിവാക്കിയേക്കും.
ആദ്യ ഏകദിനത്തില്‍ ഓപ്പണര്‍ ലൂയിസ് ഫോമിലേക്ക് ഉയര്‍ന്നത് വിന്‍ഡീസിന്റെ പ്രതീക്ഷ ഉയര്‍ത്തുന്നു. യൂണിവേഴ്‌സല്‍ ബോസ് ക്രിസ് ഗെയ്‌ലും മിന്നിയാല്‍ വിജയത്തിലേക്ക്് പിടിച്ചുകയറാമെന്നാണ് ജേസണ്‍ ഹോള്‍ഡറുടെ ടീമിന്റെ വിശ്വാസം. ഈ പരമ്പരയിലെ രണ്ട് മത്സരങ്ങളോടെ ഗെയ്്ല്‍ വിടവാങ്ങും. സ്വന്തം ഗ്രൗണ്ടില്‍ ടെസ്റ്റ് കളിക്കാന്‍ അനുവദിക്കണമെന്ന ഗെയ്‌ലിന്റെ അപേക്ഷ വിന്‍ഡീസ് സെലക്ഷന്‍ കമ്മിറ്റി തള്ളി. ഗെയ്‌ലിനെ ഒഴിവാക്കിയാണ് ടെസ്റ്റ് ടീമിനെ പ്രഖ്യാപിച്ചത്.
