ന്യൂദല്‍ഹി: ഇത്തവണ സ്വാതന്ത്ര്യദിനത്തില്‍ ജമ്മു കശ്മീരിലെ എല്ലാ പഞ്ചായത്തുകളിലും ത്രിവര്‍ണ പതാക ഉയര്‍ത്തുമെന്ന് ആഭ്യന്തര സഹമന്ത്രി ജി. കിഷന്‍ റെഡ്ഡി. ഇതു സംബന്ധിച്ച് സംസ്ഥാനത്തെ എല്ലാ പഞ്ചായത്തുകള്‍ക്കും കേന്ദ്ര സര്‍ക്കാര്‍ നിര്‍ദേശം നല്‍കിയിട്ടുണ്ടെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു.
ജമ്മു കശ്മീരിന് പ്രത്യേക പദവി നല്‍കുന്ന 370ാം വകുപ്പ് നീക്കിയിരുന്നു. ഇതോടെ സംസ്ഥാനത്തിന്റെ പ്രത്യേക പതാകയും ഭരണഘടനയും ഇല്ലാതായി. ഈ പശ്ചാത്തലം കൂടി കണക്കിലെടുത്താണ് പഞ്ചായത്തുകള്‍ തോറും ദേശീയ പതാക ഉയര്‍ത്തുന്നത്.നിലവില്‍ ഇവിടങ്ങളിലെ സ്ഥിതിഗതികള്‍ ശാന്തമാണ്. ഒരിടത്തും പ്രശ്‌നങ്ങള്‍ റിപ്പോര്‍ട്ട് ചെയ്തിട്ടില്ലെന്നും അദ്ദേഹം വ്യക്തമാക്കി.
ബിജെപിയുടെ ജമ്മുകശ്മീര്‍ ഘടകം 50000 ഇന്ത്യന്‍ പതാകകള്‍ കശ്മീരില്‍ വിതരണം ചെയ്യും.ഇന്ത്യന്‍ പതാക ഉപയോഗിച്ചുള്ള കാശ്മീരിലെ സ്വാതന്ത്ര്യദിനാഘോഷം കൂടിയാകുമിത്. ”ഇതൊരു ആഘോഷമാണെന്ന് ആളുകള്‍ മനസിലാക്കണം. എല്ലാ പഞ്ചായത്തിലും വാര്‍ഡിലും ഞങ്ങള്‍ ഇന്ത്യന്‍ പതാക ഉയര്‍ത്തും. സ്‌കൂള്‍ വിദ്യാര്‍ത്ഥികള്‍ ഉള്‍പ്പെടെ എല്ലാവര്‍ക്കും ഞങ്ങള്‍ പതാക വിതരണം ചെയ്യും. ‘ ബി.ജെ.പിയുടെ ജമ്മു കാശ്മീര്‍ വിഭാഗം പ്രസിഡന്റ് രവീന്ദര്‍ റെയ്‌ന പറഞ്ഞു.
ഈദ് ആഘോഷങ്ങളുടെ ഭാഗമായി സുരക്ഷ വര്‍ദ്ധിപ്പിച്ചു.ആവശ്യമെങ്കില്‍ കൂടുതല്‍ സൈന്യത്തെ നിയോഗിക്കും. വെള്ളിയാഴ്ച ചില സ്ഥലങ്ങളില്‍ ഒറ്റപ്പെട്ട കല്ലേറുകള്‍ ഉണ്ടായതല്ലാതെ വലിയ പ്രതിഷേധമൊന്നും രൂപപ്പെട്ടില്ല.ലേ, ജമ്മു എന്നിവിടങ്ങള്‍ അടക്കം അഞ്ചു ജില്ലകളിലെ നിരോധനാജ്ഞ പിന്‍വലിച്ചു. ഇവിടങ്ങളിലെ സ്‌കൂളുകളും കോളേജുകളും എല്ലാം തുറന്നു.
രണ്ടു ജില്ലകളില്‍ നിലനിന്നിരുന്ന നിശാനിയമത്തിനും ഇളവ് വരുത്തിയതായി കശ്മീരിലെ ഔദ്യോഗിക വൃത്തങ്ങള്‍ അറിയിച്ചു. ദോബ, കിഷ്ത്വാര്‍ ജില്ലകളിലാണ് നിശാനിയമത്തിന് ഇളവ് നല്‍കിയിരിക്കുന്നത്.ഇവിടങ്ങളില്‍ സാധാരണ ജനജിവിതം പുനഃസ്ഥാപിച്ചതായും ഉദ്യോഗസ്ഥര്‍ അറിയിച്ചു.
ജമ്മു കശ്മീരിന്റെ പ്രത്യേക പദവി റദ്ദാക്കിയ നടപടിക്കെതിരെ കശ്മീരില്‍ പതിനായിരക്കണക്കിനാളുകള്‍ പ്രതിഷേധിക്കുന്നു എന്ന വാര്‍ത്തകള്‍ നിഷേധിച്ച് കേന്ദ്ര ആഭ്യന്തരമന്ത്രാലയം. പ്രതിഷേധം നാമമാത്രമാണെന്നും ഇരുപതില്‍ കൂടുതല്‍ പേര്‍ ഒന്നിച്ച് ഒരിടത്തു പോലും പ്രതിഷേധം നടത്തിയിട്ടില്ലെന്നും കേന്ദ്ര ആഭ്യന്തര മന്ത്രാലയ വക്താവ് പറഞ്ഞു.
ജമ്മു കശ്മീരിന് പ്രത്യേക പദവി നല്‍കുന്ന 370ാം അനുച്ഛേദം റദ്ദാക്കിയ സര്‍ക്കാര്‍, ജമ്മുകശ്മീരിനെയും ലഡാക്കിനെയും രണ്ട് കേന്ദ്ര ഭരണപ്രദേശങ്ങളായി പ്രഖ്യാപിച്ചിരുന്നു. രാഷ്‌ട്രപതിയുടെ അനുമതി കൂടി ലഭിച്ചതോടെ ഒക്ടോബര്‍ ഒന്ന് മുതല്‍ ജമ്മു കശ്മീര്‍, ലഡാക്ക് കേന്ദ്രഭരണ പ്രദേശങ്ങള്‍ നിലവില്‍ വരും.
