ന്യൂദല്ഹി : ജമ്മു കശ്മീരിന്റെ പ്രത്യേക പദവി എടുത്തുകളഞ്ഞ രാഷ്ട്രപതി വിജ്ഞാപനത്തെ ചോദ്യം ചെയ്ത് സമര്പ്പിച്ച ഹര്ജി പരിഗണിക്കാന് സുപ്രീംകോടതി വിസമ്മതിച്ചു. ആര്ട്ടിക്കിള് 370 റദ്ദാക്കിയിതിനെ ചോദ്യം ചെയ്ത് അടിയന്തിരമായി പരിഗണിക്കണമെന്നാവശ്യപ്പെട്ട് അഭിഭാഷകനായ എം.എല്. ശര്മ്മയാണ് ഹര്ജി നല്കിയത്.
എന്നാല് ഹര്ജി അടിയന്തരമായി പരിഗണിക്കേണ്ടതില്ലെന്ന് ജസ്റ്റിസ് എന്.വി. രമണയും എസ്.എ. ബോബ്ഡെയും അടങ്ങിയ ഡിവിഷന് ബെഞ്ച് തീരുമാനിക്കുകയായിരുന്നു. ചീഫ് ജസ്റ്റിസ് രഞ്ജന് ഗൊഗോയി അയോധ്യാ കേസ് പരിഗണിക്കുന്ന ഭരണഘടനാ ബെഞ്ചില് ആയതിനാലാണ് എന്.വി. രമണ ഉള്പ്പെട്ട ബെഞ്ചില് ഹര്ജി പരിഗണനയ്ക്ക് വിട്ടത്.
വിഷയം പാക്കിസ്ഥാന് ഐക്യരാഷ്ട്ര സഭയില് ഉന്നയിക്കാന് പോകുകയാണെന്നും അത് തടയണമെന്നുമാണ് ശര്മ ഹര്ജിയില് ആവശ്യപ്പെട്ടിരിക്കുന്നത്. അതുകൊണ്ട് എത്രയും വേഗം ഹര്ജി കേള്ക്കണമെന്നും അല്ലെങ്കില് ഇന്ത്യയ്ക്ക് എന്നന്നേക്കുമായി കശ്മീര് നഷ്ടപ്പെടുമെന്നും ഹര്ജിയില് പറയുന്നുണ്ട്.
അതേസമയം ഇന്ത്യന് ഭരണഘടനയില് ഭേദഗതി വരുത്തിയത് സ്റ്റേ ചെയ്യാന് ഐക്യരാഷ്ട്ര സഭയ്ക്ക് അധികാരം ഉണ്ടോ എന്ന് എന്.വി. രമണ ശര്മ്മയോട് ചോദിച്ചു. നിങ്ങളുടെ ഹര്ജി എപ്പോള് കേള്ക്കണം എന്ന് ചീഫ് ജസ്റ്റിസ് തീരുമാനിക്കുമെന്നും ശര്മയോട് രമണ പറഞ്ഞു.
ജമ്മു കശ്മീരിന്റെ സ്വയംഭരണാവകാശ് റദ്ദാക്കിക്കൊണ്ടുള്ള ബില്ലിന് രാജ്യസഭ തിങ്കളാഴ്ചയാണ് അംഗീകാരം നല്കിയത്. അതിനുശേഷം മൂന്നില് രണ്ട് ഭൂരിപക്ഷത്തോടെ ചൊവ്വാഴ്ച ലോക്സഭയും ബില് പാസ്സാക്കി.
