ജോഹന്നസ്ബര്ഗ്: വേഗം എതിരാളികളുടെ പേടിസ്വപ്നമായി മാറിയ ദക്ഷിണാഫ്രിക്കന് പേസര് ഡെയ്ല് സ്റ്റെയ്ന് ടെസ്റ്റ് ക്രിക്കറ്റിനോട് വിടപറഞ്ഞു. തിങ്കളാഴ്ചയാണ് സ്റ്റെയ്ന് ടെസ്റ്റ് മതിയാക്കുന്ന വിവരം അറിയിച്ചത്.
ഏകദിനത്തിലും ട്വന്റി 20-യിലും തുടര്ന്ന് കളിക്കുമെന്ന് സ്റ്റെയ്ന് പറഞ്ഞു. ക്രിക്കറ്റിന്റെ ചെറിയ ഫോര്മാറ്റുകളില് തുടര്ന്നും കളിക്കുന്നതിനായാണ് ടെസ്റ്റ് മതിയാക്കുന്നതെന്ന് 36-കാരനായ താരം വ്യക്തമാക്കി. ക്രിക്കറ്റിന്റെ തനിക്ക് ഏറ്റവും ഇഷ്ടപ്പെട്ട ഫോര്മാറ്റിനോടാണ് വിടപറയുന്നതെന്നും അദ്ദേഹം കൂട്ടിച്ചേര്ത്തു.
ദക്ഷിണാ്രഫിക്കയ്ക്കായി ഏറ്റവും കൂടുതല് വിക്കറ്റുകള് വീഴ്ത്തിയ ടെസ്റ്റ് ബൗളറെന്ന ബഹുമതിയുമായാണ് സ്റ്റെയ്ന് അഞ്ച് ദിവസ മത്സരങ്ങളോട് വിടപറയുന്നത്. 2004-ല് ഇംഗ്ലണ്ടിനെതിരെ പോര്ട്ട് എലിസബത്തില് ദക്ഷിണാഫ്രിക്കയ്ക്കായി ടെസ്റ്റില് അരങ്ങേറിയ സ്റ്റെയ്ന് 93 മത്സരങ്ങളില് നിന്നായി 439 വിക്കറ്റുകള് സ്വന്തമാക്കിയിട്ടുണ്ട്. ഇന്നിങ്സില് 26 തവണ അഞ്ച് വിക്കറ്റ് നേട്ടം സ്വന്തമാക്കിയ സ്റ്റെയ്ന് ടെസ്റ്റില് 10 വിക്കറ്റ് നേട്ടം അഞ്ച് തവണയും കരസ്ഥമാക്കിയിട്ടുണ്ട്. 2010-ല് നാഗ്പുരില് ഇന്ത്യക്കെതിരെ 51 റണ്സിന് ഏഴ് വിക്കറ്റ് വീഴ്ത്തിയതാണ് മികച്ച ബൗളിങ് പ്രകടനം. ടെസ്റ്റില് രണ്ട് അര്ധസെഞ്ചുറി ഉള്പ്പെടെ 1251 റണ്സും നേടിയിട്ടുണ്ട്. 2008-ല് മെല്ബണില് ഓസ്ട്രേലിയക്കെതിരെ നേടിയ 76 റണ്സാണ് ബാറ്റിങ്ങിലെ മികച്ച പ്രകടനം. കഴിഞ്ഞ ഫെബ്രുവരിയില് ശ്രീലങ്കക്കെതിരെയാണ് സ്റ്റെയ്ന് അവസാന ടെസ്റ്റ് കളിച്ചത്.
നേരത്തെ തോളിനേറ്റ പരിക്കിനെ തുടര്ന്ന് ഇക്കഴിഞ്ഞ ലോകകപ്പ് മത്സരങ്ങളും താരത്തിന് നഷ്ടമായിരുന്നു. 2016 മുതല് തന്നെ സ്റ്റെയ്നിനെ തോളിലെ പരിക്ക് അലട്ടിയിരുന്നു. ആ വര്ഷം താരം ശസ്ത്രക്രിയയ്ക്ക് വിധേയനാവുകയും ചെയ്തിരുന്നു. പരിക്കിനെ തുടര്ന്ന് ഇക്കഴിഞ്ഞ ഐപിഎല്ലിലെ ഭൂരിഭാഗം മത്സരങ്ങളും സ്റ്റെയ്നിന് നഷ്ടമായിരുന്നു.
