ന്യൂദല്ഹി: പ്രത്യേക പദവി നല്കിയിരുന്ന 370ാം വകുപ്പ് റദ്ദാക്കിയതോടെ മോദി സര്ക്കാര് കശ്മീരില് എന്താണ് ലക്ഷ്യമിടുന്നതെന്ന് വ്യക്തമാക്കി ആഭ്യന്തരമന്ത്രി അമിത് ഷാ. കശ്മീര് ആഭ്യന്തര വിഷയമല്ലെന്ന് വാദിച്ച കോണ്ഗ്രസിന്റെ കക്ഷിനേതാവ് അധീര് രഞ്ജന് ചൗധുരിക്ക് അതിശക്തമായ ഭാഷയിലാണ് അമിത് ഷാ മറുപടി നല്കിയത്. കശ്മീര് ഇന്ത്യയുടെ അവിഭാജ്യ ഘടകമാണ്. കശ്മീരില് വരുന്ന എന്ത് തീരുമാനവും ഇന്ത്യയുടെ ആഭ്യന്തര വിഷയമാണ്. പാക് അധീന കശ്മീരും ഇന്ത്യയുടെ ഭാഗം തന്നെ. ചൈന കൈവശപ്പെടുത്തിയ ഭാഗവും നമ്മുടേത് തന്നെ. കശ്മീരില് എന്തു നിയമം നിര്മിക്കണമെന്ന് ഇനി ഇന്ത്യന് പാര്ലമെന്റ് തീരുമാനിക്കും. ബില്ല് പാസ്സാക്കിയെടുക്കാന് ജീവന് തന്നെ നല്കാന് തയ്യാറാണ്. ഇത് രാഷ്ട്രീയനീക്കമല്ല, രാജ്യസുരക്ഷയെത്തന്നെ ബാധിക്കുന്ന കാര്യമാണ്. ജമ്മു കശ്മീരിന്റെ പ്രത്യേക പദവി റദ്ദാക്കിയ പ്രമേയവും വിഭജിക്കാനുള്ള ബില്ലുകളും ലോക്സഭയില് അവതരിപ്പിച്ചു സംസാരിക്കുകയായിരുന്നു കേന്ദ്ര ആഭ്യന്തര മന്ത്രി അമിത് ഷാ. അമിത് ഷാ സംസാരിക്കുമ്പോഴൊക്കെ പ്രതിപക്ഷ എംപിമാര് ബഹളം വച്ചപ്പോള് രോഷത്തോടെയാണു അമിത് ഷാ മറുപടി നല്കിയത്.
ബില്ലിന്മേല് ചര്ച്ച തുടങ്ങിയപ്പോള് ശക്തമായി എതിര്ത്ത കോണ്ഗ്രസ്, എന്താണ് കശ്മീരില് നടക്കുന്നതെന്ന് കേന്ദ്രസര്ക്കാര് വ്യക്തമാക്കണമെന്ന് ആവശ്യപ്പെട്ടു. ബില്ല് കൊണ്ടുവന്നത് നിയമവിരുദ്ധമാണെന്ന് ലോക്സഭയിലെ കോണ്ഗ്രസിന്റെ കക്ഷിനേതാവ് അധിര് രഞ്ജന് ചൗധുരി ആരോപിച്ചു. എന്താണ് നിയമവിരുദ്ധമെന്ന് കൃത്യമായി ചൂണ്ടിക്കാട്ടണമെന്ന് സ്പീക്കര് ഓംപ്രകാശ് ബിര്ള ആവശ്യപ്പെട്ടു. അതേസമയം, കോണ്ഗ്രസ് നിരയില് ഇരിക്കുന്ന രാഹുല് ഗാന്ധി മൗനം തുടരുകയാണ്. വിഷയത്തില് കോണ്ഗ്രസിനുള്ളില് തന്നെ ആഭ്യന്തര തര്ക്കം രൂക്ഷമാണ്. അതേസമയം, തൃണമൂല് കോണ്ഗ്രസ് ബില്ലിനെതിരെ പ്രതിഷേധിച്ച് സഭ ബഹിഷ്കരിക്കുകയാണെന്ന് നേരത്തേ വ്യക്തമാക്കിയിരുന്നു. പ്രദേശിക പാര്ട്ടികള് ഉള്പ്പെടെ വലിയൊരു വിഭാഗം കക്ഷികള് സര്ക്കാരിനൊപ്പമാണ്. അതേസമയം തിങ്കാളാഴ്ച സഭയില് കശ്മീര് പ്രമേയം കീറിയെറിഞ്ഞ കേരള എംപിമാരായ ഹൈബി ഈഡനെയും ടി.എന്.പ്രതാപിനെയും സ്പീക്കര് ചേംബറിലേക്ക് വിളിപ്പിച്ചു ശാസിച്ചിരുന്നു.
