തിരുവനന്തപുരം: ജമ്മു കാശ്മീരുമായി ബന്ധപ്പെട്ട് കേന്ദ്ര സര്ക്കാര് കൈക്കൊണ്ട നടപടികളുടെ പശ്ചാത്തലത്തില് സംസ്ഥാനത്തെ എല്ലാ ജില്ലകളിലും അതീവജാഗ്രത പുലര്ത്താന് സംസ്ഥാന പോലീസ് മേധാവി ലോകനാഥ് ബെഹ്റ നിര്ദ്ദേശം നല്കി. ക്രമസമാധാനപ്രശ്നങ്ങള്ക്ക് ഇടയാകുന്ന തരത്തിലുള്ള യാതൊരു നടപടികളും അനുവദിക്കില്ല. വിവിധ കേന്ദ്രങ്ങളില് ആവശ്യത്തിന് പോലീസ് ഉദ്യോഗസ്ഥരെ വിന്യസിക്കാനും സ്ഥിതിഗതികള് സസൂക്ഷ്മം നിരീക്ഷിച്ച് നടപടി സ്വീകരിക്കാനും അദ്ദേഹം ജില്ലാ പോലീസ് മേധാവിമാര്ക്ക് നിര്ദ്ദേശം നല്കി.
അതേസമയം, എല്ലാ സംസ്ഥാനങ്ങളിലും കേന്ദ്ര ഭരണ പ്രദേശങ്ങളിലും സേനകളെ വിന്യസിച്ച് സുരക്ഷ കര്ശനമാക്കണമെന്നും പ്രശ്നങ്ങളുണ്ടാകാതെ നോക്കണമെന്നും എല്ലാ ചീഫ് സെക്രട്ടറിമാര്ക്കും ഡിജിപിമാര്ക്കും ഡല്ഹി പൊലീസ് കമ്മിഷണര്ക്കും ആഭ്യന്തര മന്ത്രാലയം നിര്ദേശം നല്കിയിരുന്നു. ഇതിന്റെ അടിസ്ഥാനത്തിലാണ് കേരളത്തിലും സുരക്ഷ നടപടികള് ശക്തമാക്കിയത്.
മതതീവ്രവാദ സംഘടനകള് കടുത്ത പ്രതിഷേധം നടത്തുമെന്ന കരുതുന്ന സംസ്ഥാനങ്ങളുടെ പട്ടികയില് കേരളവും ഉള്പ്പെട്ടിട്ടുണ്ട്. കേരളത്തിലെ മതതീവ്രവാദ സംഘടനകളെ പോലീസ് നീരീക്ഷിച്ചു കൊണ്ടിരിക്കുകയാണ്. കേന്ദ്ര ആഭ്യന്തരമന്ത്രി അമിത് ഷായുടെ പക്കലുള്ള രേഖകളിലാണ് കേരളത്തിന്റെ പേരും ഇടംപിടിച്ചത്. കേന്ദ്രമന്ത്രിസഭാ യോഗം കഴിഞ്ഞ് രാജ്യസഭയിലേക്കെത്തിയ അമിത് ഷായുടെ കൈകളിലുള്ള ‘ ടോപ് സീക്രട്ട്’ എന്നു രേഖപ്പെടുത്തിയ പട്ടികയില് കശ്മീര് പ്രഖ്യാപനം സംബന്ധിച്ച നടപടി ക്രമങ്ങളാണ് ഉണ്ടായിരുന്നു. വിദേശ വാര്ത്ത ഏജന്സിയായ എഎഫ്പി ഫോട്ടോഗ്രാഫര് ഈ ചിത്രം പകര്ത്തുകയും മാധ്യമങ്ങളിലൂടെ പുറത്തുവരുകയും ചെയ്തു. പ്രസിഡന്റ്, വൈസ് പ്രസിഡന്റ് എന്നിവരെ വിവരം അറിയിച്ച് അനുമതി തേടല്, കേന്ദ്രമന്ത്രിസഭാ യോഗം, രാജ്യസഭയിലെ പ്രഖ്യാപനം തുടങ്ങി എല്ലാ വിവരങ്ങളും പട്ടികയായി രേഖപ്പെടുത്തിയിരുന്നു. ഇതിനൊടുവിലാണ് സ്വീകരിക്കേണ്ട സുരക്ഷാ ക്രമീകരണങ്ങളെ സംബന്ധിച്ചു വിവരമുള്ളത്. സുരക്ഷ ശക്തമാക്കേണ്ട പട്ടികയില് ജമ്മു കശ്മീര്, മധ്യപ്രദേശ്, പശ്ചിമ ബംഗാള്, ഉത്തര് പ്രദേശ്, ബിഹാര്, അസം ആന്ധ്ര പ്രദേശ്, തെലങ്കാന എന്നീ സംസ്ഥാനങ്ങള്ക്കൊപ്പമാണ് കേരളവും ഇടംപിടിച്ചിരിക്കുന്നത്.
