തൃശൂര്: സംസ്ഥാനത്ത് മതഭീകരവാദികള് അഴിഞ്ഞാട്ടം തുടരുമ്പോള് അവരെ സഹായിക്കുന്ന നിലപാടാണ് സര്ക്കാരിനെന്നും എസ്ഡിപിഐയുടെ ഭീകരതയെ നേരിടുന്നതില് സര്ക്കാര് സമ്പൂര്ണ പരാജയമാണെന്നും ബിജെപി സംസ്ഥാന ജനറല് സെക്രട്ടറി കെ. സുരേന്ദ്രന്. എസ്ഡിപിഐയെ സര്ക്കാര് വഴിവിട്ട് സഹായിക്കുകയാണ്. സിപിഎം-എസ്ഡിപിഐ ഒത്തുകളിയെ തുടര്ന്നാണ് അഭിമന്യു കൊലക്കേസിലെ ചുരുളഴിയാത്തത്. ബിജെപി ജില്ലാ കമ്മിറ്റി ഓഫീസില് മാധ്യമപ്രവര്ത്തകരോട് സംസാരിക്കുകയായിരുന്നു അദ്ദേഹം.
കേസിലെ പ്രതി രാജ്യം വിട്ടുപോയിട്ടില്ലെന്ന് മുഖ്യപ്രതിയുടെ അമ്മ തന്നെ മൊഴി നല്കിയിട്ടും പോലീസ് നടപടിയെടുക്കാത്തതിന്റെ കാരണം ഇതാണ്. കേസില് എസ്ഡിപിഐക്ക് പങ്കുണ്ടെന്ന് എസ്എഫ്ഐ-ഡിവൈഎഫ്ഐ നേതാക്കള് പറഞ്ഞിട്ടും രാഷ്ട്രീയ ഇടപെടല് മൂലമാണ് പ്രതിയെ പോലീസ് പിടികൂടാത്തത്.
ഭരണപക്ഷത്തിന്റെയും എസ്ഡിപിഐയുടെയും സഹായത്തോടെ നാട്ടില് പ്രതി വിലസുകയാണ്. അഭിമന്യു കൊലക്കേസില് സിപിഎം-എസ്ഡിപിഐ ധാരണയെന്താണെന്ന് സിപിഎം തുറന്നു പറയണം. അഭിമന്യുവിന്റെ കുടുംബത്തെ സഹായിക്കാനാണെന്ന് പറഞ്ഞ് മൂന്നു കോടി പിരിച്ച സിപിഎം പിന്നീട് അവരോട് നീതി കാട്ടിയില്ല. ചാവക്കാട് കോണ്ഗ്രസ് പ്രവര്ത്തകന്റെ കൊലപാതകം എസ്ഡിപിഐ ആസൂത്രണമാണെന്ന് വ്യക്തമായിട്ടും പ്രതികളെ പിടികൂടാനാകാതെ സര്ക്കാരും പോലീസും നിസഹായരായി നോക്കി നില്ക്കുകയാണ്. ആരാണ് കൊലപാതകം നടത്തിയതെന്ന് പറയാന് കോണ്ഗ്രസിന് ആദ്യം ധൈര്യം ഉണ്ടായില്ല. കഴിഞ്ഞ തെരഞ്ഞെടുപ്പില് എസ്ഡിപിഐ പിന്തുണ പരസ്യമായി കോണ്ഗ്രസിലെ 19 എംപിമാര്ക്കും ലഭിച്ചിരുന്നുവെന്നതാണിതിന്റെ കാരണം.
യുഡിഎഫിന്റെ അനൗപചാരിക ഘടകകക്ഷിയായാണ് എസ്ഡിപിഐ പ്രവര്ത്തിക്കുന്നത്. മത ന്യൂനപക്ഷങ്ങളുടെ നഷ്ടപ്പെട്ട പിന്തുണ കിട്ടാനായി എസ്ഡിപിഐയെ അതിരുവിട്ട് സിപിഎം സഹായിക്കുകയാണ്. ലോക്സഭാ തെരഞ്ഞെടുപ്പില് സിപിഎമ്മിലെ ആരിഫിനും എസ്ഡിപിഐയുടെ പിന്തുണ ലഭിച്ചിട്ടുണ്ട്. വോട്ട് ബാങ്ക് രാഷ്ട്രീയത്തിനായി യുഡിഎഫും എല്ഡിഎഫും എസ്ഡിപിഐ പിന്തുണയ്ക്കുകയാണ്. കൈവെട്ടുമെന്ന ഭയം മൂലം എസ്ഡിപിഐയുടെ നരനായാട്ടിനെതിരെ സാംസ്കാരിക നായകര് പ്രതികരിക്കുന്നില്ല. മത ഭീകരവാദ സംഘട്ടനങ്ങള് തുടരുന്നതിനെതിരെ പോലീസിന് നടപടിയെടുക്കാന് കഴിയുന്നില്ലെങ്കില് കേസന്വേഷണം കേന്ദ്ര ഏജന്സിക്ക് വിടണം. എന്നാല് കോണ്ഗ്രസ് ഇതാഗ്രഹിക്കുന്നില്ല.
സംസ്ഥാനത്ത് സിപിഎം-എസ്ഡിപിഐ പ്രവര്ത്തകരെ തമ്മില് തിരിച്ചറിയാനാകാത്ത വിധം ഇവര് മാറി ക്കഴിഞ്ഞു. എസ്ഡിപിഐയുടെ മതതീവ്രവാദ പ്രവര്ത്തനങ്ങള്ക്കെതിരെ തീരദേശ മേഖലയില് ബിജെപിയുടെ നേതൃത്വത്തില് ബോധവല്ക്കരണം നടത്തുമെന്നും പ്രചരണം കൂടുതല് ശക്തമാക്കുമെന്നും കെ. സുരേന്ദ്രന് പറഞ്ഞു
ബിജെപി ജില്ലാ പ്രസിഡന്റ് എ. നാഗേഷ്, പട്ടികജാതി മോര്ച്ച ദേശീയ വൈസ് പ്രസിഡന്റ് ഷാജുമോന് വട്ടേക്കാട് എന്നിവരും പത്രസമ്മേളനത്തില് പങ്കെടുത്തു.
