കൊച്ചി: നിരവധി ദേശീയ, രാജ്യാന്തര മെഡലുകള് നേടിയ മലയാളി നീന്തല് താരം സജന് പ്രകാശ് ഇനി കേരള പോലീസില് ഇന്സ്പെക്ടര്. പോലിസ് ട്രെയിനിങ് കോളജില് പരിശീലനം പൂര്ത്തിയാക്കിയ സജന് പ്രകാശ് ഔദ്യോഗികമായി പോലിസ് സേനയുടെ ഭാമായി.
പരിശീലനം പൂര്ത്തിയാക്കി സാജന് ഡിജിപി ലോക്നാഥ് ബെഹ്റക്ക് മുന്നില് സത്യപ്രതിജ്ഞ ചെയ്ത് സേനയുടെ ഭാഗമായി. ഡിജിപി ഓഫിസില് നടന്ന പ്രത്യേക ചടങ്ങിലായിരുന്നു സജന് സത്യപ്രതിജ്ഞ ചെയ്തത്. സജനെ പൊലിസ് മേധാവിയും എഡിജിപി മനോജ് എബ്രഹാമും ചേര്ന്ന് അധികാര ചിഹ്നങ്ങള് അണിയിച്ചു.
നിയമന ഉത്തരവ് ലഭിച്ച സജന് പ്രകാശ് ആംഡ് റിസര്വ് പോലിസില് ഇന്സ്പെക്ടര് തസ്തികയില് ജോലിയില് പ്രവേശിച്ചു. കഴിഞ്ഞ ദേശീയ ഗെയിംസിനുശേഷം പോലിസില് നിയമനം ലഭിച്ചിട്ടും ഒരു വര്ഷത്തിലേറെയായി ശമ്പളം ലഭിക്കാത്ത അവസ്ഥയിലായിരുന്നു. വിഷയം ശ്രദ്ധയില്പ്പെട്ട മുഖ്യമന്ത്രി പിണറായി വിജയന്, ഡിജിപി ലോക്നാഥ് ബെഹ്റ, എഡിജിപി മനോജ് എബ്രഹാം തുടങ്ങിയവരുടെ ഇടപെടലിനെ തുടര്ന്നാണ് സജന് ശമ്പളം ലഭിച്ചു തുടങ്ങിയത്. വിദേശ പരിശീലനത്തിന്റെയും രാജ്യാന്തര, ദേശീയ മത്സരങ്ങളുടെയും ഇടവേളകളില് പോലിസ് ട്രെയിനിങ് കോളജില് എത്തിയാണ് ട്രെയിനിങ് പൂര്ത്തിയാക്കിയത്. ഒളിമ്പിക്സ് ലക്ഷ്യമിട്ട് തായ്ലന്ഡിലാണ് സജന് പരിശീലനം നടത്തുന്നത്.
