മകാവു: സൂപ്പര് സ്റ്റാര് നെയ്മറെ കൂടാതെ ഇറങ്ങിയ പാരീസ് സെന്റ് ജര്മയിന്(പിഎസ്ജി) സിനെ സൗഹൃദ മത്സരത്തില് ഇന്റര് മിലാന് ഷൂട്ടൗട്ടില് അട്ടിമറിച്ചു. ഷൂട്ടൗട്ടില് അഞ്ചിനെതിരെ ആറു ഗോളുകള്ക്കാണ് ഇന്റര് ജയിച്ചുകയറിയത്. അവസാന പെനാല്റ്റി ഗോളാക്കി പോര്ച്ചുഗീസ് മധ്യനിരക്കാരന് ജാവോ മാരിയോയാണ് ഇന്ററിന് വിജയം സമ്മാനിച്ചത്.
ആദ്യ പകുതിയില് ഗോള് നേടി മുന്നില് നിന്ന പിഎസ്ജി നിശ്ചിത സമയത്ത്് തന്നെ വിജയത്തിലേക്ക് നീങ്ങിയതാണ്. പക്ഷെ ഇഞ്ചുറി ടൈമില് സാമുവേല് ലോങ്ങോ കുറിച്ച ഗോളില് ഇന്റര് സമനില പിടിച്ചു. (1-1). തുടര്ന്നാണ് ഷൂട്ടൗട്ടില് ജേതാക്കളെ നിശ്ചയിച്ചത്.
ദിവസങ്ങള്ക്ക് മുമ്പ് ചൈനയില് നടന്ന സൗഹൃദ മത്സരത്തില് പെനാല്റ്റി ഷൂട്ടൗട്ടില് ഇറ്റാലിയന് ടീമായ യുവന്റസിനോട് തോറ്റശേഷമാണ് ഇന്റര് പിഎസ്ജിക്കെതിരെ വിജയം സ്വന്തമാക്കിയത്.
നെയ്മറുടെ അഭാവത്തില് ലോകകപ്പ് ഹീറോ കൈലിയന് എംബാപ്പെ പിഎസ്ജിക്കായി തകര്ത്തുകളിച്ചു. ഒട്ടേറെ തവണ എംബാപ്പെ ഗോളിന് അടുത്തെത്തുകയും ചെയ്തു. ഇടവേളയ്ക്ക്് മുമ്പ് എംബാപ്പെയെ ഫൗള് ചെയ്തതിന് ലഭിച്ച ഫ്രീകിക്ക് പാബ്ലോ സരാബിയ ഗോള് മുഖത്തേക്ക് ഉയര്ത്തിവിട്ടു. തിലോ കെഹ്റര് അത് ഗോളാക്കി മാറ്റി.
രണ്ടാം പകുതിയില് ഗോള് മടക്കാനായി ഇന്റര് മിലാന് നിരന്തരം ആക്രമണം അഴിച്ചുവിട്ടു. ഇവാന് പെരിസിച്ചും സ്റ്റെഫാനോ സെന്സിയുമാണ് ഇന്ററിന്റെ ആക്രമണങ്ങള്ക്ക്് നേതൃതം വഹിച്ചത്. പക്ഷെ പെരിസിച്ചിന് അവസരങ്ങള് മുതലാക്കാനായില്ല.ഒടുവില് സാമുവല് ലോങോ ഇഞ്ചുറി ടൈമില് ഇന്ററിന്റെ സമനില ഗോള് കുറിച്ചു.
