മധുര: ആള്ക്കൂട്ട അക്രമങ്ങളേയും പശുക്കളേയും കൂട്ടുപിടിച്ച് ഹിന്ദുക്കളെ ആക്ഷേപിക്കുന്നെന്ന് ആര്എസ്എസ് സര്സംഘചാലക് മോഹന് ഭാഗവത്. മധുരയില് ആര്എസ്എസിന്റെ അഖില ഭാരതീയ സാമാജിക് സദ്ഭാവ് വാര്ഷിക യോഗത്തെ അഭിസംബോധന ചെയ്ത് സംസാരിക്കുകയായിരുന്ന അദ്ദേഹം ഇത്തരം ആക്ഷേപങ്ങളെ അംഗീകരിക്കാനാവില്ലെന്നും വ്യക്തമാക്കി.
ആള്ക്കൂട്ട അക്രമങ്ങള് അവസാനിപ്പിക്കണമെന്നാവശ്യപ്പെട്ട് വിവിധ മേഖലകളില് നിന്നുള്ള 49 പ്രമുഖര് ഒപ്പിട്ട കത്ത് പ്രധാനമന്ത്രി നരേന്ദ്ര മോദിക്ക് സമര്പ്പിച്ചിരുന്നു. ഈ പശ്ചാത്തലത്തിലാണ് സര്സംഘചാലകിന്റെ പ്രതികരണം.
2009 ജനുവരി ഒന്ന് മുതല് 2018 ഒക്ടോബര് 29 വരെയുള്ള കാലഘട്ടത്തിനിടെ മതവുമായി ബന്ധപ്പെട്ട് 254 കുറ്റകൃത്യങ്ങള് നടന്നിട്ടുണ്ടെന്നും കത്തില് ആരോപിക്കുന്നു.
നടി കങ്കണാ രണൗട്ടും എഴുത്തുകാരനും സെന്സര് ബോര്ഡ് ചെയര്മാനുമായ പ്രസൂണ് ജോഷി എന്നിവരടക്കമുള്ള 62 പ്രമുഖര് കത്തിലെ ആരോപണങ്ങള്ക്കെതിരെ മറ്റൊരു കത്ത് തയ്യാറാക്കി സമര്പ്പിച്ചു. സെലക്ടീവായ പ്രതികരണങ്ങള് ഒഴിവാക്കാനും എല്ലാവരോടും തുല്യം നിലപാട് സ്വീകരിക്കാനും കത്തില് പറയുന്നു. മോദി സര്ക്കാരിന് കീഴില് അഭിപ്രായ സ്വാതന്ത്ര്യം ഏറ്റവുമധികം ആധരിക്കപ്പെടുന്നതായി വ്യക്തമാക്കുന്നു.
ഹിന്ദുത്വം എല്ലാം ഉള്ക്കൊള്ളുന്നതാണെന്നും മുസ്ലീങ്ങളും അതിന്റെ ഭാഗമാണെന്നും അങ്ങനെയല്ലെങ്കില് അതിനെ ഹിന്ദുത്വമെന്ന് വിളിക്കാനാകില്ലെന്നും മോഹന് ഭാഗത് നേരത്തെ പറഞ്ഞിരുന്നു.
