ഭോപ്പാല്: കര്ണ്ണാടകയിലെ കുമാര സ്വാമി സര്ക്കാര് തകര്ന്നടിഞ്ഞതോടെ മധ്യപ്രദേശിലെ കോണ്ഗ്രസ് സര്ക്കാരും പരുങ്ങലിലെന്ന് സൂചന. കര്ണ്ണാടക സംഭവത്തോടെ മുഖ്യമന്ത്രി കമല്നാഥിന്റെ ഭരണരീതിയില് അംഗങ്ങള്ക്കുള്ള അതൃപ്തി വീണ്ടും തലപൊക്കിയതായാണ് റിപ്പോര്ട്ടുകള്.
കുമാരസ്വാമി സര്ക്കാര് വീണതിനു പിന്നാലെ മധ്യപ്രദേശ് സര്ക്കാരിനെ പ്രതിപാദിച്ച് മുന് ബിജെപി മുഖ്യമന്ത്രി ശിവരാജ് സിങ് ചൗഹാന് പ്രസ്താവന നടത്തിയിരുന്നു. സംസ്ഥാനത്ത് ഭരണപക്ഷ എംഎല്എമാരില് പലരും ബിജെപിയില് ചോരാന് താത്പര്യം പ്രകടിപ്പിച്ചിട്ടുമുണ്ട്.
ഇതോടെ സ്വന്തം കസേര ഇളകുമോയെന്ന ഭയം കമല്നാഥിനെ ബാധിച്ചു തുടങ്ങിയെന്നാണ് അടുത്ത വൃത്തങ്ങള് സൂചിപ്പിക്കുന്നത്. നിലവിലെ മധ്യപ്രദേശ് സര്ക്കാറിന് എന്തുസംഭവിച്ചാലും പൂര്ണ്ണ ഉത്തരവാദി കോണ്ഗ്രസ്സായിരിക്കും. കോണ്ഗ്രസ്സും ബിഎസ്പി- എസ്പി സംഖ്യത്തില് പ്രകടമായ അസ്വസ്ഥതകള് ഉണ്ടെന്നാണ്് ചൗഹാന് പ്രസ്താവന നടത്തിയത്.
കോണ്ഗ്രസ്സ് മാധ്യമവിഭാഗം മേധാവി ശോഭാ ഓഛയും എംഎല്എമാര് കൂറുമാറാന് സാധ്യതയുണ്ടെന്ന് അറിയിച്ചിരുന്നു. നിലവില് മധ്യപ്രദേശിലെ കോണ്ഗ്രസ്സ് സഖ്യത്തിന് 121ഉം ബിജെപിക്ക് ഒറ്റയ്ക്ക് 108 അംഗങ്ങളുമാണ് നിയമസഭയിലുള്ളത്.
കോണ്ഗ്രസ്സ് ഇതര കക്ഷികളിലെ നാല് സ്വതന്ത്രരടക്കം ബിഎസ്പി എസ്പി ചേര്ന്ന് ഏഴ് പേരാണുള്ളത്. അത് മാറ്റിയാല് കോണ്ഗ്രസ്സ് ഒറ്റയ്ക്ക് 107 പേരായി ചുരുങ്ങും. കര്ണ്ണാടകയിലെ പോലെ വിമത എംഎല്എമാര് കൂറ് മാറിയാല് അത് കമല്നാഥിന്റെ കസേരയേയും ബാധിക്കും.
