ന്യൂദല്ഹി : രോഹിങ്ക്യന് അഭയാര്ത്ഥികള്ക്കായി ഇന്ത്യ മ്യാന്മറില് 250 വീടുകള് നല്കും. ഇവയുടെ നിര്മാണം നടന്നു വരികയാണ് പൂര്ത്തിയാക്കിയശേഷം ഇവ മ്യാന്മര് സര്ക്കാരിന് കൈമാറും.
രോഹിങ്ക്യന് അഭയാര്ത്ഥികളുടെ വാസവും സുരക്ഷയും ഒരുക്കുന്നത് സംബന്ധിച്ച് 2017ല് ഇന്ത്യയും മ്യാന്മറും തമ്മില് കരാറില് ഒപ്പുവെച്ചതാണ്. ഇതിന്റെ അടിസ്ഥാനത്തിലാണ് ഇന്ത്യ വീട് നിര്മിച്ച് നല്കുന്നത്. രോഹിങ്ക്യന് അഭയാര്ത്ഥികള്ക്കായി 25 ദശലക്ഷം ഡോളര് അഞ്ചുവര്ഷത്തിനുള്ളില് ഇന്ത്യ ചെലവിടുമെന്നാണ് കരാറില് പറയുന്നത്.
ഷ്വേസാര്, കിന് ചൗങ് തൗങ്, നാന് ഥാര് തൗങ് എന്നീ പ്രദേശങ്ങളിലാണ് ഇന്ത്യ വീട് നിര്മിച്ച് നല്കുന്നത്. 10 കോടിയാണ് ഇതിനായി മൊത്തം വകയിരുത്തിയിരിക്കുന്നത്.
അതിനിടെ ഇന്ത്യയില് എത്തിയിട്ടുള്ള 20,000 രോഹിങ്ക്യന് അഭയാര്ത്ഥികളെ സ്വദേശത്തേയ്ക്ക് തിരിച്ചയയ്ക്കുന്നതിനുള്ള നടപടികള് സ്വീകരിച്ചു വരികയാണ്. ഇവരുടെ പേരും വിശദാംശങ്ങളും മ്യാന്മര് അധികൃതര് പരിശോധിച്ചു വരികയാണ്. ഇതുവരെ 13,000 പേരുടെ വിവരങ്ങളും മറ്റും അന്വേഷണം പൂര്ത്തിയാക്കിയതായി മ്യാന്മര് അധികൃതര് അറിയിച്ചു.
ഇതുകൂടാതെ രോഹിങ്ക്യന് അഭയാര്ത്ഥികളുടെ പുനരധിവാസവുമായി ബന്ധപ്പെട്ട് 21 പദ്ധതികള് കൂടി ഇന്ത്യ ഫണ്ട് നല്കുന്നുണ്ട്. ചെറു ഗ്രാമ നിര്മാണ പദ്ധതി, സ്കൂള് നിര്മാണം എന്നിവയും ഈ പദ്ധതിയില് ഉള്പ്പെടും. ഇന്ത്യയെ കൂടാതെ ആസിയാന് രാജ്യങ്ങളായ ജപ്പാന്, ചൈന തുടങ്ങിയ രാജ്യങ്ങളും രോഹിങ്ക്യന് അഭയാര്ത്ഥികളുടെ പുനരധിവാസത്തിനായി വീട് നിര്മിച്ച് നല്കുന്നുണ്ട്.
