മുംബൈ: കര്ണാടകയില് രാജി വച്ച വിമതര് താമസിക്കുന്ന മുംബൈയിലെ ഹോട്ടലിന് 500 മീറ്റര് ചുറ്റളവില് നിരോധനാജ്ഞ പ്രഖ്യാപിച്ചു. പ്രശ്നങ്ങള് ഉണ്ടാക്കിയാല് ഡി.കെ.ശിവകുമാറിനെ അറസ്റ്റ് ചെയ്യുമെന്ന് മുംബൈ കമ്മീഷണര് വ്യക്തമാക്കി. കര്ണാടകയില് നിന്ന് എത്തിയ ഡി.കെ.ശിവകുമാര് മൂന്നുമണിക്കൂറായി വിമതര് താമസിക്കുന്ന ഹോട്ടലിനു മുന്നില് തന്നെയാണ്. ശിവകുമാറിന് മുറി ബുക് ചെയ്തിരുന്നെങ്കിലും ഹോട്ടലുകാര് റദ്ദാക്കി. സഹപ്രവര്ത്തകരെ കാണാതെ തിരിച്ചുപോകില്ലെന്ന നിലപാടിലാണ് ശിവകുമാര് .
രാജിവെച്ച എംഎല്എമാര് താമസിക്കുന്ന മുംബൈയിലെ ഹോട്ടലിന്റെ സുരക്ഷ വര്ധിപ്പിച്ചു. മഹാരാഷ്ട്ര റിസര്വ് പൊലീസിന്റെ നേതൃത്വത്തിലാണ് സുരക്ഷാക്രമീകരണങ്ങള്. രാഷ്ട്രീയ പ്രതിസന്ധി തുടരുന്നതിനിടെ സ്പീക്കര്ക്കെതിരെ ശക്തമായ പ്രതിഷേധവുമായി ബിജെപി രംഗത്തെത്തി. അതേസമയം, രാജിക്കത്ത് നല്കിയിട്ടും അത് സ്വീകരിക്കാത്ത കര്ണാടക നിയമസഭാ സ്പീക്കറുടെ നടപടിക്കെതിരെ വിമത എംഎല്എമാര് സുപ്രീം കോടതിയെ ഹര്ജി നല്കി. രാഷ്ട്രീയ ലാഭത്തിന് വേണ്ടി സ്പീക്കര് തന്റെ ഭരണഘടനാപരമായ ബാധ്യതകള് മറക്കുന്നുവെന്ന് ആരോപിച്ചാണ് ഇവര് കോടതിയിലെത്തിയിരിക്കുന്നത്. അതേസമയം ഭൂരിപക്ഷം നഷ്ടപ്പെട്ട സഖ്യസര്ക്കാരിനെ രക്ഷിക്കാന് സ്പീക്കര് ബോധപൂര്വം തങ്ങളുടെ രാജി വൈകിപ്പിക്കുകയാണെന്നും ഇവര് ആരോപിക്കുന്നുക്കുന്നുണ്ട്.
ആറുദിവസത്തിനുള്ളില് എം.എല്.എമാരുടെ രാജിക്കത്തില് തീരുമാനമെടുക്കുമെന്നാണ് സ്പീക്കര് കെ.ആര്.രമേശിന്റെ നിലപാട്. അവര് സ്വമേധയാ രാജിവച്ചതാണെന്ന് ബോദ്ധ്യപ്പെട്ടാലേ താന് രാജി സ്വീകരിക്കൂ എന്ന് അദ്ദേഹം പറഞ്ഞു. കേസ് അടിയന്തരമായി പരിഗണിക്കണമെന്ന് ആവശ്യപ്പെട്ട് ഇവര് ചീഫ് ജസ്റ്റിസ് രഞ്ജന് ഗോഗോയിയെ സമീപിച്ചെങ്കിലും ഹര്ജി നാളെ മാത്രമേ പരിഗണിക്കൂ എന്നാണ് അറിയുന്നത്.
