ചെന്നൈ: തമിഴ്നാട്ടിലെ തെരഞ്ഞെടുപ്പ് പ്രചാരണത്തിന്റെ അവസാന ദിവസം കോൺഗ്രസ് അധ്യക്ഷൻ മല്ലികാർജുൻ ഖാർഗെ, പ്രധാനമന്ത്രി മോദിയെ ‘ഭകീരൻ’ എന്ന് വിളിച്ചത് വിവാദമാകുന്നു. വിവാദമായപ്പോൾ ഖാർഗെ തിരുത്തി. എന്നാൽ ഖാർഗെയ്ക്കെതിരേ വിമർശനം ശക്തമാകുകയാണ്.
സമത്വത്തിൽ വിശ്വസിക്കാത്തവരും അവരോടൊപ്പം ചേരുന്നവരും ജനാധിപത്യത്തെ ദുർബലപ്പെടുത്തുകയാണെന്നും ഖാർഗെ പറഞ്ഞു.
‘അവർക്ക് (എഐഎഡിഎംകെ) മോദിയുമായി എങ്ങനെ ചേരാൻ കഴിയും? അദ്ദേഹം ഒരു ഭീകരവാദിയാണ്. സമത്വത്തിൽ വിശ്വസിക്കാത്തയാൾ. അദ്ദേഹത്തിന്റെ പാർട്ടി സമത്വത്തിലും നീതിയിലും വിശ്വസിക്കില്ല. ഈ ആളുകൾ അവരോടൊപ്പം ചേരുന്നു, അതിനർത്ഥം അവർ ജനാധിപത്യത്തെ ദുർബലപ്പെടുത്തുകയാണെന്നാണ്…’
പ്രധാനമന്ത്രി മോദിയെക്കുറിച്ചുള്ള ഖാർഗെയുടെ പരാമർശത്തോട് പ്രതികരിച്ചുകൊണ്ട് ബിജെപിയുടെ തമിഴ്നാട് തെരഞ്ഞെടുപ്പ് ചുമതലയുള്ള കേന്ദ്രമന്ത്രി പീയൂഷ് ഗോയൽ പറയുന്നു, ‘എൻഡിഎ സഖ്യത്തിന് വൻ വിജയം. പ്രധാനമന്ത്രി മോദിക്ക് ലഭിച്ച മികച്ച പ്രതികരണവും എടപ്പാടി കെ. പളനിസ്വാമിക്ക് ദിവസവും തുടർച്ചയായി ലഭിക്കുന്ന പ്രതികരണവും നിങ്ങൾ കാണുന്നു. മൈലാപ്പൂരിൽ കേന്ദ്ര ആഭ്യന്തര മന്ത്രി അമിത് ഷായുടെ റോഡ് ഷോ നിങ്ങൾ കണ്ടു. ചന്ദ്രബാബു നായിഡുവിനെ നിങ്ങൾ കണ്ടു, അദ്ദേഹത്തിന് ലഭിച്ച പ്രതികരണവും നിങ്ങൾ കണ്ടു…’
അതിനിടയിൽ, ഖാർഗെ തന്റെ ‘ഭീകരവാദി’ പരാമർശത്തെ കൂടുതൽ വിശദീകരിച്ച് കുഴപ്പത്തിലായി. ‘ബിജെപി സർക്കാർ രാഷ്ട്രീയ പാർട്ടികളെയും പ്രത്യേകിച്ച് സ്ഥാനാർത്ഥികളെയും ഭയപ്പെടുത്തുന്നു. അവർ സിബിഐ, ഇ ഡി, ആദായനികുതി വകുപ്പ് തുടങ്ങിയ സ്ഥാപനങ്ങളെ ഉപയോഗിക്കുന്നു, അവയെ ദുരുപയോഗം ചെയ്യുന്നു. പ്രതിപക്ഷ പാർട്ടികളെ പോലും ലക്ഷ്യം വയ്ക്കാൻ തക്ക ശക്തി സർക്കാരിനുണ്ടെന്ന് അവർ കരുതുന്ന തരത്തിൽ അവർ ജനങ്ങളിൽ ഭയം സൃഷ്ടിക്കുന്നു. ആ സന്ദർഭം വിവരിക്കാനാണ് ഞാൻ സംസാരിച്ചത്. അയാൾ ഒരു ഭീകരവാദിയാണെന്ന് ഞാൻ ഒരിക്കലും പറഞ്ഞിട്ടില്ല. ഈ സ്ഥാപനങ്ങൾ ഉപയോഗിച്ച് അദ്ദേഹവും അദ്ദേഹത്തിന്റെ സർക്കാരും ആളുകളെ ഭയപ്പെടുത്തുകയാണെന്ന് ഞാൻ പറഞ്ഞു. അതാണ് ഞാൻ ഉദ്ദേശിച്ചത്.’
എന്നാൽ ഖാർഗെയുടെ പരാമർശം വൻ വിവാദങ്ങളും വിമർശനങ്ങളുമാണ് ഉയർത്തിയിരിക്കുന്നത്.
