മുംബൈ : മഹാരാഷ്ട്രയില് രണ്ട് ദിവസമായി തുടരുന്ന ശക്തമായ മഴയില് മരിച്ചവരുടെ എണ്ണം 21ലെത്തി. മുംബൈയിലെ മലാഡിലും പൂനെയിലും മതിലിടിഞ്ഞുവീണും അപകടമുണ്ടായിട്ടുണ്ട്.
മലാഡില് മതില് ഇടിഞ്ഞുവീണ് 13 പേരാണ് മരിച്ചത്. അപകടത്തില്പെട്ട നാല് പേരെ രക്ഷപ്പെടുത്തി. നിരവധി പേര് മതിലിനിടയില് കുടുങ്ങി കിടക്കുന്നുണ്ട്. പൂനെയിലുണ്ടായ അപകടത്തില് അഞ്ച് പേരാണ് മരിച്ചത്. പൂനെയിലെ സിന്ഹാഡ് കോളേജിലാണ് മതില് ഇടിഞ്ഞ് വീണ് അപകടമുണ്ടായത്.
ശക്തമായ മഴയില് താഴ്ന്ന പ്രദേശങ്ങള് പലതും വെള്ളത്തിനടിയിലാണ്. റോഡ്- ട്രെയിന് ഗതാഗതം താറുമാറായിരിക്കുകയാണ്. പ്രതികൂല കാലാവസ്ഥയെ തുടര്ന്ന് സംസ്ഥാന സര്ക്കാര് രണ്ട് ദിവസത്തേക്ക് സംസ്ഥാനത്ത് പൊതുഅവധി പ്രഖ്യാപിച്ചു.
അടുത്ത അഞ്ച് ദിവസത്തേയ്ക്കു കൂടി മഹാരാഷ്ട്രയില് അതിശക്തമായ മഴയുണ്ടാകുമെന്നാണ് കാലാവസ്ഥാ നിരീക്ഷണകേന്ദ്രത്തിന്റെ മുന്നറിയിപ്പ്. ഒഡീഷയിലും വരും ദിവസങ്ങളില് മഴ കനക്കുമെന്നതിനാല് മത്സ്യത്തൊഴിലാളികള്ക്ക് ജാഗ്രത നിര്ദ്ദേശം നല്കിയിട്ടുണ്ട് റെയില്വെ ട്രാക്കില് രൂപപ്പെട്ട വെള്ളക്കെട്ടിനെ തുടര്ന്ന് മഹാരാഷ്ട്രയിലെ പല ട്രെയിനുകളും റദ്ദാക്കിയിട്ടുണ്ട്.
പ്രതികൂല സാഹചര്യങ്ങള് മൂലം മുംബൈ വിമാനത്താവളവും അടച്ചു. മഴയെ തുടര്ന്ന് തിങ്കളാഴ്ച രാത്രി സ്പൈസ് ജെറ്റ് വിമാനം റണ്വെയില് നിന്ന് തെന്നി നീങ്ങിയിരുന്നു. 54 വിമാനങ്ങള് ഇതേത്തുടര്ന്ന് തിരിച്ചുവിട്ടു. 10 വിമാനങ്ങള് റദ്ദാക്കിയതായി എയര് വിസ്താരയും അറിയിച്ചിട്ടുണ്ട്. വിമാനത്താവളത്തിലേക്ക് പുറപ്പെടും മുമ്പ് റദ്ദാക്കിയതും വൈകുന്നതുമായ വിമാനങ്ങളെ കുറിച്ച് യാത്രക്കാര് പരിശോധിച്ച് ഉറപ്പ് വരുത്തണമെന്നും കമ്പനികള് അറിയിച്ചിട്ടുണ്ട്.
