കോപ്പ അമേരിക്കയ്‌ക്ക് നാളെ കൊടിയേറ്റ്

സാവോപോളോ: കാല്‍പ്പന്തുകളിക്ക് കവിതയുടെ ചാരുതയേകുന്ന ലാറ്റിനമേരിക്കന്‍ പോരാട്ടത്തിന് നാളെ കൊടിയേറ്റ്. കോപ്പ അമേരിക്കയുടെ 46-ാം പതിപ്പിന് സാവോപോളോയില്‍ തുടക്കമാകും. ആകെ 12 ടീമുകളാണ് ഇത്തവണത്തെ ടൂര്‍ണമെന്റില്‍ പങ്കെടുക്കുന്നത്. നാളെ ഇന്ത്യന്‍ സമയം രാവിലെ 6ന് ഉദ്ഘാടന മത്സരം. ആദ്യ അങ്കത്തില്‍ ആതിഥേയരായ ബ്രസീല്‍ ബൊളീവിയയുമായി ഏറ്റുമുട്ടും.

തെക്കേ അമേരിക്കന്‍ മേഖലയില്‍ നിന്ന് 10 ടീമും ഏഷ്യയില്‍ നിന്നുള്ള രണ്ട് ടീമുകളുമടക്കം 12 ടീമുകളാണ് ചാമ്പ്യന്‍ഷിപ്പില്‍ പങ്കെടുക്കുന്നത്. ആതിഥേയരായ ബ്രസീലിന് പുറമെ ഹാട്രിക്ക് കിരീടം തേടിയെത്തുന്ന ചിലി, കരുത്തരായ അര്‍ജന്റീന, ഉറുഗ്വെ, കൊളംബിയ, ബൊളീവിയ, പെറു, ഇക്വഡോര്‍, പരാഗ്വെ, വെനസ്വേല എന്നീ ടീമുകള്‍ക്കൊപ്പം ഏഷ്യയില്‍ നിന്ന് ജപ്പാനും 2022 ലോകകപ്പിന്റെ ആതിഥേയരായ ഖത്തറുമാണ് ടൂര്‍ണമെന്റില്‍ കളിക്കുന്നത്. മുന്‍ ചാമ്പ്യന്‍ഷിപ്പുകളില്‍ വടക്കേ അമേരിക്കയില്‍ നിന്നുള്ള രണ്ട് ടീമുകളാണ് അതിഥികളായി കളിക്കാനെത്തിയിരുന്നത്.

ബ്രസീലിലെ ചരിത്രപ്രസിദ്ധമായ മാരക്കാന ഉള്‍പ്പെടെ ആറ് സ്‌റ്റേഡിയങ്ങളിലാണ് ലാറ്റിനമേരിക്കയുടെ കരുത്തും താളവും കാലിലേക്കാവാഹിച്ച് 12 ടീമുകളാണ് പോരാട്ടത്തിനിറങ്ങുന്നത്. ജൂലൈ 7ന് മാരക്കാന സ്‌റ്റേഡിയത്തിലാണ് ഫൈനല്‍. 12 ടീമുകളെ മൂന്ന് ഗ്രൂപ്പുകളിലാക്കി തിരിച്ചാണ് മത്സരങ്ങള്‍. 

ഗ്രൂപ്പ് എയില്‍ ബ്രസീലിന് പുറമെ ബൊളീവിയ, വെനസ്വേല, പെറു ടീമുകളാണുള്ളത്. ഗ്രൂപ്പ് ബിയില്‍ അര്‍ജന്റീന, കൊളംബിയ, പരാഗ്വെ, ഖത്തര്‍, ഗ്രൂപ്പ് സിയില്‍ ഉറുഗ്വെ, ഇക്വഡോര്‍, ജപ്പാന്‍, ചിലി ടീമുകളും കളിക്കും.

ഗ്രൂപ്പിലെ ഒന്നും രണ്ടും സ്ഥാനക്കാരും മികച്ച രണ്ട് മൂന്നാം സ്ഥാനക്കാരും ഉള്‍പ്പെടെ എട്ട് ടീമുകള്‍ ക്വാര്‍ട്ടറിലേക്ക് യോഗ്യത നേടും. ജൂണ്‍ 28, 29, 30 തീയതികളില്‍ ക്വാര്‍ട്ടറും ജൂലൈ 3, 4 തീയതികളില്‍ സെമിയും നടക്കും.

അതേസമയം ഇന്ത്യന്‍ ആരാധകര്‍ കടുത്ത നിരാശയിലാണ്. ചാമ്പ്യന്‍ഷിപ്പ് ഇന്ത്യയില്‍ സംപ്രേഷണം ചെയ്യുന്നില്ല. സംഘാടകര്‍ ഭീമമായ തുക ആവശ്യപ്പെട്ടതിനെ തുടര്‍ന്ന് സോണി സ്‌പോര്‍ട്‌സ് പിന്മാറിയതാണ് തിരിച്ചടിയായത്. ടൂര്‍ണമെന്റിലെ ചാമ്പ്യന്മാര്‍ 2021-ല്‍ നടക്കുന്ന ഫിഫ കോണ്‍ഫെഡറേഷന്‍ കപ്പ് ചാമ്പ്യന്‍ഷിപ്പിലേക്ക് യോഗ്യത നേടും.

കോപ്പ അമേരിക്കയുടെ ചരിത്രത്തില്‍ ഏറ്റവും കൂടുതല്‍ തവണ കിരീടം നേടിയത് ഉറുഗ്വെയാണ്. 21 തവണ ഫൈനലില്‍ കളിച്ച നിലവിലെ ചാമ്പ്യന്മാര്‍കൂടിയായ ഉറുഗ്വെ 15 തവണയാണ് കോപ്പയില്‍ മുത്തമിട്ടത്. കിരീടനേട്ടത്തില്‍ തൊട്ടുപിന്നില്‍ അര്‍ജന്റീന. 28 ഫൈനലുകളില്‍ 14 തവണ ജയിച്ചു. എന്നാല്‍ 1993നുശേഷം അവര്‍ക്ക് കിരീടം നേടാന്‍ കഴിഞ്ഞിട്ടില്ല. 2004, 2007 ഫൈനലുകളില്‍ ബ്രസീലിനോടും 2015, 16 ഫൈനലുകളില്‍ ചിലിയോടും പരാജയപ്പെട്ടു. 19 തവണ ഫൈനല്‍ കളിച്ച ബ്രസീല്‍ എട്ട് തവണയാണ് ജേതാക്കളായത്. 2007ലായിരുന്നു അവസാനം ബ്രസീല്‍ കിരീടമുയര്‍ത്തിയത്. അതിനുശേഷം ഒരു ഫൈനല്‍ കളിക്കാന്‍ ബ്രസീലിനായില്ല. ഇത്തവണ കിരീടം ഉയര്‍ത്തുമെന്ന ആത്മവിശ്വാസത്തോടെയാണ് സ്വന്തം മണ്ണില്‍ സാംബാ താളവുമായി കാനറികള്‍ പന്തുതട്ടാനിറങ്ങുന്നത്. പരാഗ്വെ, ചിലി, പെറു ടീമുകള്‍ രണ്ട് തവണ വീതവും കൊളംബിയ, ബൊളീവിയ എന്നിവര്‍ ഓരോ തവണയും കിരീടമുയര്‍ത്തിയിട്ടുണ്ട്.

1916ല്‍ ആരംഭിച്ച കോപ്പ അമേരിക്ക ഫുട്‌ബോളിന്റെ 46-ാം പതിപ്പാണ് കാനറികളുടെ നാടായ ബ്രസീലില്‍ നടക്കുന്നത്. ലോകത്തെ ഏറ്റവും പഴക്കമേറിയ ഫുട്‌ബോള്‍ ടൂര്‍ണമെന്റുകളിലൊന്നാണ് കോപ്പ അമേരിക്ക ചാമ്പ്യന്‍ഷിപ്പ്. 1916-ല്‍ സൗത്ത് അമേരിക്കന്‍ ഫുട്‌ബോള്‍ ചാമ്പ്യന്‍ഷിപ്പ് എന്ന പേരിലാണ് ടൂര്‍ണമെന്റ് ആരംഭിച്ചത്. 1967 വരെ തുടര്‍ച്ചയായ വര്‍ഷങ്ങളിലും ഒന്നിടവിട്ട വര്‍ഷങ്ങളിലുമാണ് ടൂര്‍ണമെന്റ് നടത്തിയിരുന്നത്. 1929-ല്‍ അര്‍ജന്റീനയില്‍ നടന്നശേഷം ആറ് വര്‍ഷം ടൂര്‍ണമെന്റ് മുടങ്ങി. പിന്നീട് 1935-ല്‍ പെറുവിലാണ് ടൂര്‍ണമെന്റ് വീണ്ടും ആരംഭിച്ചത്. പങ്കെടുക്കുന്ന ടീമുകള്‍ പരസ്പരം പോരാടി ഏറ്റവും കൂടുതല്‍ പോയിന്റ് നേടുന്ന ടീം കിരീടം നേടുകയായിരുന്നു. ആദ്യമെത്തുന്ന ടീമുകള്‍ക്ക് ഓരോ പോയിന്റാണെങ്കില്‍ പ്ലേ ഓഫിലൂടെ ജേതാക്കളെ നിര്‍ണയിക്കുകയായിരുന്നു.

ആദ്യ നാല് പതിപ്പില്‍ അര്‍ജന്റീന, ബ്രസീല്‍, ഉറുഗ്വെ, ചിലി ടീമുകള്‍ മാത്രമേ പങ്കെടുത്തുള്ളു. 1916 മുതല്‍ 1967 വരെയുള്ള കാലത്ത് അര്‍ജന്റീനയാണ് ചാമ്പ്യന്‍ഷിപ്പ് ഏറ്റവും കൂടുതല്‍ ഉയര്‍ത്തിയത്. പന്ത്രണ്ട് തവണ അര്‍ജന്റീന കിരീടമുയര്‍ത്തിയപ്പോള്‍ ഉറുഗ്വെ പതിനൊന്നു പ്രാവശ്യവും തെക്കേ അമേരിക്കയിലെ രാജാക്കന്മാരായി. ബ്രസീല്‍ മൂന്നു തവണയും. 1975 മുതല്‍ സൗത്ത് അമേരിക്കന്‍ ചാമ്പ്യന്‍ഷിപ്പ് കോപ്പ അമേരിക്ക എന്ന പേരില്‍ അറിയപ്പെട്ടു തുടങ്ങി. അപ്പോഴും ടൂര്‍ണമെന്റിന്റെ നടത്തിപ്പ് ശൈലിയില്‍ പല മാറ്റങ്ങളുമുണ്ടായി. നാല് വര്‍ഷത്തിലൊരിക്കലായി ടൂര്‍ണമെന്റ്. 75 മുതല്‍ 91 വരെ പത്ത് ടീമുകളാണ് പങ്കെടുത്തത്. 1993 മുതലാണ് കോപ്പ അമേരിക്കന്‍ ടൂര്‍ണമെന്റിന്റെ ഇന്നു കാണുന്ന അവസ്ഥയിലേക്കു മാറിയത്. 1993 മുതല്‍ നടന്ന ചാമ്പ്യന്‍ഷിപ്പില്‍ പങ്കെടുക്കുന്ന ടീമുകളുടെ എണ്ണം 12 ആയി ഉയര്‍ത്തി. കോപ്പ അമേരിക്കയെന്ന പേരിലേക്കു ടൂര്‍ണമെന്റ് മാറിയതില്‍പ്പിന്നെ ബ്രസീല്‍ അഞ്ചു തവണ ചാമ്പ്യന്മാരായപ്പോള്‍ അര്‍ജന്റീനക്ക് രണ്ട് തവണ മാത്രമാണ് കിരീടം നേടാന്‍ കഴിഞ്ഞത്.