മുകുള് റോയി
കൊല്ക്കത്ത: തൃണമൂല് ഭരണത്തിന് കീഴില് പശ്ചിമ ബംഗാളില് അരാജകത്വം തുടരുന്ന സാഹചര്യത്തില് ബിജെപി നേതാവ് മുകുള് റോയി ആഭ്യന്തരമന്ത്രി അമിത് ഷായോട് സഹായം അഭ്യര്ത്ഥിച്ച് കത്തെഴുതി. ലോക്സഭാ തെരഞ്ഞെടുപ്പില് വന് വിജയം കൈവരിച്ചതിനെ തുടര്ന്ന് ബിജെപി പ്രവര്ത്തകരെ കടന്നാക്രമിക്കുന്ന തൃണമൂല് രാഷ്ട്രീയ അരാചകത്വമാണ് സംസ്ഥാനത്ത് സൃഷ്ടിക്കുന്നത്. അരാജകത്വവും കലാപവുമാണ് ബംഗാളില് നിറഞ്ഞാടുന്നതെന്നും സംസ്ഥാനത്തെ ജനങ്ങളെ രക്ഷിക്കണമെന്നും മുകുള് റോയി കത്തില് ചൂണ്ടിക്കാട്ടി.
മുഖ്യമന്ത്രി മമതാ ബാനര്ജിയുടെ നേതൃത്വത്തിലുള്ള തൃണമൂല് പ്രവര്ത്തകര് രാഷ്ട്രീയ സംഘര്ഷങ്ങള് അഴിച്ചുവിടുകയാണ്. സംസ്ഥാനത്തെ ഭരണകൂടം താറുമാറായിരിക്കുകയാണ്. നിലവിലെ അവസ്ഥയ്ക്കെതിരെ നടപടികള് സ്വീകരിച്ചില്ലെങ്കില് സാഹചര്യങ്ങള് കൈയില് നില്ക്കാതെ വരുമെന്നും മുകുള് റോയി കത്തില് സൂചിപ്പിക്കുന്നു.
ലോക്സഭാ തെരഞ്ഞെടുപ്പില് ബിജെപി മികച്ച പ്രകടനങ്ങള് സംസ്ഥാനത്ത് നടത്തിയതിന്റെ അമര്ഷമാണ് ഈ സംഘര്ഷങ്ങളിലേയ്ക്ക് വഴിതെളിച്ചത്. സംസ്ഥാനത്തെ 42 ലോക്സഭാ സീറ്റുകളില് 18 സീറ്റുകളും ബിജെപി നേടിയിരുന്നു. ഇതേ തുടര്ന്ന് സംസ്ഥാനത്തെ ജില്ലകളായ നോര്ത്ത് 24 പര്ഗനാസ്, കൂച്ച്ബെഹാര്, ഹൗറാ, പടിഞ്ഞാറന് ബുര്ദ്വാന് എന്നിവിടങ്ങളില് സംഘര്ഷങ്ങള് നടക്കുകയും നിരവധി പേര് മരിക്കുകയും നിരവധി പേര്ക്ക് പരിക്കുകള് സംഭവിക്കുകയും ചെയ്തു. വിവിധയിടങ്ങളില് തൃണമൂല് പ്രവര്ത്തകര് അഴിച്ചുവിട്ട സംഘര്ഷങ്ങളില് 15 ബിജെപി പ്രവര്ത്തകരാണ് കൊല്ലപ്പെട്ടത്. കഴിഞ്ഞാഴ്ച മാത്രം നാല് ബിജെപി പ്രവര്ത്തകര് കൊല്ലപ്പെട്ടു. സംസ്ഥാനത്തെ ക്രമസമാധാന നില താറുമാറായ സാഹചര്യത്തില് മമത മുഖ്യമന്ത്രിപദത്തില് നിന്ന് രാജി വയ്ക്കണമെന്ന് മുകുള് റോയി പറഞ്ഞു.
ബംഗാളിലെ സംഘര്ഷങ്ങളില് കഴിഞ്ഞ ദിവസം കേന്ദ്ര സര്ക്കാര് ആശങ്ക പ്രകടിപ്പിച്ചിരുന്നു. തുടര്ന്ന് സംസ്ഥാനത്ത് ക്രമസമാധാന നില പാലിക്കണമെന്ന് ആഭ്യന്തര മന്ത്രാലയം ആവശ്യപ്പെടുകയും ചെയ്തിരുന്നു.
