സതാംപ്റ്റണ്: കിരീടത്തിലേക്കുള്ള പ്രയാണം കോഹ്ലിപ്പട ജയത്തോടെ ആരംഭിച്ചു. ലോകകപ്പിലെ ആദ്യ മത്സരത്തില് കരുത്തരായ ദക്ഷിണാഫ്രിക്കയെ അനായാസം തകര്ത്തെറിഞ്ഞ ഇന്ത്യക്ക് ഇനി ആത്മവിശ്വാസത്തോടെ യാത്ര തുടരാം. അടുത്ത മത്സരത്തില് നിലവിലെ ചാമ്പ്യന്മാരായ ഓസ്ട്രേലിയയാണ് എതിരാളികള്. ഞായറാഴ്ച ഇന്ത്യന് സമയം ഉച്ചകഴിഞ്ഞ് മൂന്നിന് കെന്നിങ്ങ്ടണ് ഓവലിലാണ് ഇന്ത്യ- ഓസീസ് പോരാട്ടം.
റോസ്ബൗളില് ഓപ്പണര് രോഹിത് ശര്മയുടെ ബാറ്റില് നിന്ന് പിറന്ന ശതകവും ലെഗ് സ്പിന്നര് യുസ്വേന്ദ്ര ചഹലിന്റെ മിന്നുന്ന പ്രകടനവുമാണ് ഇന്ത്യക്ക് ആദ്യ മത്സരത്തില് ദക്ഷിണാഫ്രിക്കക്കെതിരെ ആറു വിക്കറ്റ്് വിജയം ഒരുക്കിയത്. ശര്മ 122 റണ്സുമായി അജയ്യനായി നിന്നു. ഏകദിനത്തില് ഈ മുംബൈ താരത്തിന്റെ 23-ാം സെഞ്ചുറി. ശര്മയാണ് കളിയിലെ കേമന്. യുസ്വേന്ദ്ര ചഹല് നാലു വിക്കറ്റുകള് പിഴുതെടുത്തു.
ഓപ്പണര്മാരെ ജസ്പ്രീത് ബുംറ പുറത്താക്കിയതിന് പിന്നാലെ യുസ്വേന്ദ്ര ചഹല് തീര്ത്ത സ്പിന് വലയില് ദക്ഷിണാഫ്രിക്ക കുടുങ്ങി. 50 ഓവറില് ഒമ്പത് വിക്കറ്റിന് 227. ചഹല് 10 ഓവറില് 51 റണ്സിന് നാലു വിക്കറ്റുകള് വീഴ്ത്തി. ഭുവനേശ്വര് കുമാറും ജസ്പ്രീത് ബുംറയും രണ്ട് വിക്കറ്റ് വീതം വീഴ്ത്തി.
228 റണ്സ് ലക്ഷ്യത്തിനായി ബാറ്റേന്തിയ ഇന്ത്യ പതിനഞ്ച് പന്ത് ശേഷിക്കെ നാല് വിക്കറ്റ് നഷ്ടത്തില് 230 റണ്സ് എടുത്തു. മൂന്ന്് തവണ ദക്ഷിണാഫ്രിക്കന് ഫീല്ഡര്മാരുടെ കൈകളില് നിന്ന്് ചോര്ന്ന് പോയ ശര്മ 144 പന്തില് 13 ഫോറും രണ്ട് സിക്സറും അടക്കമാണ് 122 റണ്സ് കുറിച്ചത്. ഇതോടെ ഏകദിനങ്ങളില് ഏറ്റവും കൂടുതല് സെഞ്ചുറികള് കുറിക്കുന്ന മൂന്നാമത്തെ ഇന്ത്യന് താരമായി രോഹിത്. 22 സെഞ്ചുറികളുള്ള ഗാംഗുലിയെയാണ് മറികടന്നത്്. ഇനി രോഹിതിന് മുന്നിലുള്ളത് സച്ചിനും (49) വിരാട് കോഹ്ലിയും (41) മാത്രം.
നാലാമനായി ഇറങ്ങിയ കെ.എല്. രാഹുലും (26), പരിചയ സമ്പന്നനായ ധോണിയും (34) ശര്മയ്ക്ക് മികച്ച പിന്തുണ നല്കി. ഫെഹല്ക്കുവായോ എറിഞ്ഞ 48-ാം ഓവറിലെ മൂന്നാം പന്ത് അതിര്ത്തി കടത്തി ഹാര്ദിക് പാണ്ഡ്യയാണ് ഇന്ത്യക്ക് ജയം സമ്മാനിച്ചത്. പാണ്ഡ്യ ഏഴു പന്തില് 15 റണ്സുമായി കീഴടങ്ങാതെ നിന്നു.
ഈ വിജയത്തോടെ ഇന്ത്യക്ക്് രണ്ട് പോയിന്റായി. അതേസമയം ദക്ഷിണാഫ്രിക്കയുടെ തുടര്ച്ചയായ മൂന്നാം തോല്വിയാണിത്. കളിച്ച മൂന്ന് മത്സരങ്ങളും തോറ്റത് അവരുടെ സെമിഫൈനല് മോഹങ്ങള്ക്ക് തിരിച്ചടിയായി. അടുത്ത മത്സരത്തില് ദക്ഷിണാഫ്രിക്ക തിങ്കളാഴ്ച്ച വെസ്റ്റ് ഇന്ഡീസിനെ നേരിടും.
