ന്യൂദല്ഹി/ചെന്നൈ: ഉത്തരേന്ത്യ ഉഷ്ണതരംഗത്തില് വലയുന്നു. നാളെ വരെ ഇതേ രീതിയില് തുടരുമെന്നാണ് കാലാവസ്ഥാ നിരീക്ഷണ വകുപ്പ് പറയുന്നത്. മധ്യപ്രദേശ്, രാജസ്ഥാന്, മഹാരാഷ്ട്ര, പഞ്ചാബ്, ഹരിയാന, യുപി തുടങ്ങി മിക്ക സംസ്ഥാനങ്ങളും കൊടുംചൂടിന്റെ പിടിയിലാണ്. സുഖവാസ കേന്ദ്രങ്ങളായ ഷിംലയിലും നൈനിറ്റാളിലും പോലും ചൂട് വര്ധിക്കുന്നു.
രണ്ടു ദിവസം തുടര്ച്ചയായി അന്തരീക്ഷ ഊഷ്മാവ് 45 ഡിഗ്രി സെല്ഷ്യസിനു മുകളില് നില്ക്കുമ്പോഴാണ് ഉഷ്ണ തരംഗമുണ്ടെന്ന് (ഹീറ്റ്വേവ്) പറയുന്നത്. മഹാരാഷ്ട്ര, ഹിമാചല് പ്രദേശ്, രാജസ്ഥാന്, മധ്യപ്രദേശ് തുടങ്ങിയ സംസ്ഥാനങ്ങളിലെ പലയിടങ്ങളിലും 51 ഡിഗ്രി സെല്ഷ്യസാണ് ചൂട്. കര്ണാടകത്തിലെ ചില സ്ഥലങ്ങളിലും അവസ്ഥ സമാനം. ശനിയാഴ്ച മുതല് ഗംഗാനഗര്, ബിക്കാനീര്, ജെയ്സാല്മര്, കോട്ട, ജോധ്പൂര്, ജയ്പൂര്, ബാമര് തുടങ്ങിയ സ്ഥലങ്ങളില് 46 മുതല് 49 ഡിഗ്രി വരെയാണ് ചൂട്.
ദല്ഹിയില് പാലം വിമാനത്താവളത്തില് രേഖപ്പെടുത്തിയ ചൂട് 46.1 ഡി്രഗി, ചാണക്യപുരിയില് 47 ഡിഗ്രി. പഞ്ചാബിലെ ലുധിയാന, അമൃത്സര് തുടങ്ങിയ ഇടങ്ങളില് നാലഞ്ചു ദിവസമായി 46 ഡിഗ്രിക്കടുത്താണ് ചൂട്. ഞായറാഴ്ച ഇന്ത്യയിലെ മൂന്നില് രണ്ടു ഭാഗങ്ങളും കൊടുംചൂടിലായിരുന്നു.
45 ഡിഗ്രിക്കു മുകളിലായിരുന്നു താപനില. തണുപ്പുള്ള കാലാവസ്ഥയ്ക്ക് പ്രശസ്തി കേട്ട ഷിംലയില് പോലും അന്ന് 32 ഡിഗ്രി ചൂടുണ്ടായിരുന്നു. സുഖകരമായ കാലാവസ്ഥയുള്ള നൈനിറ്റാളില് 33 ഡിഗ്രിയും. അതിനിടെ, ചെന്നൈ കടുത്ത കുടിവെള്ള ക്ഷാമത്തിലാണ്. നഗരത്തില് താമസിക്കാന് പോലും വയ്യാത്ത അവസ്ഥ. നഗരവാസികളില് പലരും കേരളത്തിലെ ബന്ധുക്കളുടെയോ കൂട്ടകാരുടെയോ വസതികളിലേക്ക് പോകുന്നെന്ന ടൈംസ് ഓഫ് ഇന്ത്യ റിപ്പോര്ട്ട് ചെയ്തു. കഴിഞ്ഞ രണ്ടു വര്ഷമായി ചെന്നൈയില് മഴ തീരെക്കുറവാണ്. അതിനാല് ഭൂഗര്ഭജലം വല്ലാതെ കുറഞ്ഞു. ചെന്നൈയും കാഞ്ചീപുരവും അടക്കം 17 ജില്ലകളെ വരള്ച്ചാ ബാധിതമായി സര്ക്കാര് പ്രഖ്യാപിച്ചു. ചെന്നൈയില് വെള്ളമെത്തിക്കുന്ന നാലു അണക്കെട്ടുകള് വരണ്ടുകിടക്കുകയാണ്.
ഏറ്റവും ചൂടുള്ള 10 സ്ഥലങ്ങള് ഇന്ത്യയില്
ന്യൂദല്ഹി: ലോകത്തെ ഏറ്റവും ചൂടു കൂടുതലുള്ള പതിനഞ്ച് നഗരങ്ങളില് പത്തെണ്ണവും ഇന്ത്യയില്. രാജസ്ഥാനിലെ ചുരു (48.9 ഡിഗ്രി) ശ്രീ ഗംഗാനഗര്, (48.6) എന്നിവിടങ്ങളാണ് ലോകത്തെ ഏറ്റവും ചൂടേറിയ പ്രദേശങ്ങള്. മൂന്നാം സ്ഥാനം പാക്കിസ്ഥാനിലെ ജക്കോബാബാദാണ്, 48 ഡിഗ്രി. യുപിയിലെ ഭാണ്ഡ (47.4) ഹരിയാനയിലെ നര്നുവാല് (47.2) എന്നീ നഗരങ്ങളും പട്ടികയിലുണ്ട്.
