ലോക്‌സഭാ തെരഞ്ഞെടുപ്പ് ഘട്ടത്തില്‍തന്നെ കോണ്‍ഗ്രസില്‍ അസ്വാരസ്യങ്ങള്‍ ഉരുണ്ടുകൂടിയിരുന്നു. കോണ്‍ഗ്രസ് അധികാരത്തില്‍ തിരിച്ചെത്തുമെന്ന ഒരുവിഭാഗം മാധ്യമങ്ങളുടേയും രാഷ്‌ട്രീയ നിരീക്ഷകരുടേയും ജല്‍പ്പനങ്ങളാണ് കോണ്‍ഗ്രസ്സിലെ വ്യത്യസ്ത അടരുകളെ തെരഞ്ഞെടുപ്പിലെങ്കിലും ഒന്നിപ്പിച്ചത്. വന്‍ഭൂരിപക്ഷത്തില്‍ ദേശീയ ജനാധിപത്യസഖ്യം അധികാരത്തിലേറിയതോടെ കോണ്‍ഗ്രസ്സിലെ അസ്വാരസ്യങ്ങള്‍ മറനീക്കി പുറത്തുവന്നിരിക്കുന്നു. മോദിക്കെതിരെ കോണ്‍ഗ്രസ് രൂപപ്പെടുത്തിയ മഹാസഖ്യത്തില്‍നിന്ന് ചെയര്‍മാനായ നിധീഷ് കുമാര്‍ പിന്‍വാങ്ങിയതോടെതന്നെ യുപിഎ അപ്രസക്തമായിരിക്കുന്നു എന്ന് രാഷ്‌ട്രീയ നിരീക്ഷകര്‍ തിരിച്ചറിഞ്ഞിരുന്നു. എന്നാല്‍ ബിജെപിക്കും മോദി ഗവണ്‍മെന്റിനുമെതിരെ കോണ്‍ഗ്രസ്സും ഇടതുപാര്‍ട്ടികളും ചില പ്രാദേശികപാര്‍ട്ടികളും നടത്തിയ നുണപ്രചരണങ്ങളാണ് ഒരുവിഭാഗം ജനങ്ങളെ തെറ്റിദ്ധരിപ്പിച്ച് ചില ഉപതെരഞ്ഞെടുപ്പുകളില്‍ ബിജെപിവിരുദ്ധ പ്രാദേശിക കക്ഷികള്‍ക്കും കോണ്‍ഗ്രസ്സിനും വിജയങ്ങള്‍ സമ്മാനിച്ചത്. ഇതൊക്കെ യുപിഎയുടെ തിരിച്ചുവരവിനുള്ള സൂചകമായി വിലയിരുത്തപ്പെട്ടു. ലോക്‌സഭാ തെരഞ്ഞെടുപ്പില്‍ ബിജെപിയും സഖ്യകക്ഷികളും കൊയ്ത വന്‍നേട്ടങ്ങളും ചതിയനായ ദ്വിഗ്‌വിജയസിംഗിന്റെ പരാജയവും നെഹ്‌റു കുടുംബത്തിന്റെ തറവാട്ടുസ്വത്തായ അമേഠിയില്‍ രാഹുല്‍ നേരിട്ട ദയനീയപരാജയവും 18 സംസ്ഥാനങ്ങളിലെ സീറോബാലന്‍സ് അക്കൗണ്ടും, പ്രതിപക്ഷ പദവിപോലും നേടാന്‍കഴിയാത്ത സാഹചര്യവും കോണ്‍ഗ്രസ്സിന്റെ തിരിച്ചുവരവിനേക്കുറിച്ചുള്ള പ്രതീക്ഷകള്‍ക്ക് കനത്ത പ്രഹരമായി. ഇവയൊക്കെ കോണ്‍ഗ്രസ്സിനുള്ളില്‍ ആഭ്യന്തര കലഹത്തിന് വഴിമരുന്നിട്ടിരിക്കുന്നു.
രാഹുല്‍ഗാന്ധി തികഞ്ഞ പരാജയമാണെന്ന് തെളിയിക്കപ്പെട്ടതോടെ കോണ്‍ഗ്രസ്സിലെ തലമുതിര്‍ന്ന നേതാക്കള്‍ അദ്ദേഹത്തെ അനുസരിക്കാതെയായി. നെഹ്‌റു കുടുംബത്തിലൊഴികെ മറ്റാരും കുടുംബവാഴ്ച ആഗ്രഹിക്കേണ്ടതില്ലെന്ന രാഹുലിന്റെ പ്രസ്താവനയിലെ സൂചന എരിതീയില്‍ എണ്ണ പകരുന്നതായി. ഇന്ന് രാജസ്ഥാന്‍ മുഖ്യമന്ത്രി അശോക് ഗഹ്ലോട്ടും മധ്യപ്രദേശ് മുഖ്യമന്ത്രി കമല്‍നാഥും, തമിഴ്‌നാട് കോണ്‍ഗ്രസ് നേതാവ് പി. ചിദംബരവും തികച്ചും അസ്വസ്ഥരാണ്. രാഹുല്‍ഗാന്ധിക്കെതിരെ ഇവര്‍ മറ്റു സംസ്ഥാനങ്ങളിലെ അസംതൃപ്തരായ തലമുതിര്‍ന്ന കോണ്‍ഗ്രസ് നേതാക്കളുമായി ആശയവിനിമയം ആരംഭിച്ചിരിക്കുന്നതായാണ് വാര്‍ത്ത. കോണ്‍ഗ്രസ് അദ്ധ്യക്ഷന്‍ രാഹുല്‍ഗാന്ധി പാര്‍ട്ടിക്കുള്ളില്‍ അടിയന്തരാവസ്ഥ പ്രഖ്യാപിച്ചിരിക്കുകയാണ്. മാധ്യമസാന്നിദ്ധ്യം ഒഴിവാക്കാന്‍ നിര്‍ദ്ദേശിക്കുകവഴി നേതാക്കളുടെ അഭിപ്രായ സ്വാതന്ത്ര്യത്തിന് വിലക്കേര്‍പ്പെടുത്തിയിരിക്കുന്നു. കോണ്‍ഗ്രസ്സിന്റെ രാഷ്‌ട്രീയ പ്രതിസന്ധിയില്‍ പ്രഖ്യാപിച്ച ദേശീയ അടിയന്തരാവസ്ഥ ഭരണമില്ലാത്ത സാഹചര്യത്തില്‍ പാര്‍ട്ടിക്കുള്ളില്‍ ഒതുക്കിയെന്നു മാത്രം. കോണ്‍ഗ്രസ്സിന്റേയും രാഹുല്‍ഗാന്ധിയുടേയും വരുംനാളുകള്‍ വളരെ നിര്‍ണ്ണായകമായിരിക്കും. ഇവയൊക്കെ നല്‍കുന്ന സൂചനകള്‍ കോണ്‍ഗ്രസ് ദേശീയതലത്തില്‍ മറ്റൊരു പിളര്‍പ്പിലേക്ക് നീങ്ങുന്നുവെന്നാണ്.
-കെ. ഗുപ്തന്‍, കപിക്കാട്
(ബിജെപി സംസ്ഥാന സമിതി അംഗം)
