ന്യൂദല്ഹി: രണ്ടാം മോദി മന്ത്രിസഭയിലെ ആഭ്യന്തര മന്ത്രിയായി അമിത് ഷായും പ്രതിരോധ മന്ത്രിയായി രാജ്നാഥ് സിങ്ങും ചുമതലയേറ്റു. പാര്മെന്റിന്റെ നോര്ത്ത് ബ്ലോക്കിലെ ഓഫീസുകളിലെത്തിയാണ് ഇരുവരും ചുമതലയേറ്റത്.
കേന്ദ്ര ആഭ്യന്തര സെക്രട്ടറി രാജീവ് ഗുബയും മറ്റ് മുതിര്ന്ന ഉദ്യോഗസ്ഥരും ചേര്ന്ന് അമിത് ഷായെ ആഭ്യന്തരമന്ത്രാലയത്തിലേക്ക് സ്വീകരിച്ചു. മന്ത്രാലയത്തെ സംബന്ധിച്ച വിഷയങ്ങള് ചര്ച്ച ചെയ്യാന് ഉദ്യോഗസ്ഥരുമായി ആഭ്യന്തരമന്ത്രി കൂടിക്കാഴ്ച നടത്തും.
രാവിലെ യുദ്ധ സ്മാരകം സന്ദര്ശിച്ചതിന് ശേഷമാണ് രാജ്നാഥ് സിങ്ങ് മന്ത്രാലയത്തിലെത്തിയത്. ചുമതലയേറ്റശേഷം സേനാമേധാവികളുമായും രാജ്നാഥ് സിങ് ചര്ച്ച നടത്തി.
പ്രധാനമന്ത്രി അടക്കമുള്ള മന്ത്രിമാര് ഇന്നലെ ചുമതലയേറ്റിരുന്നു. നരേന്ദ്ര മോദിക്ക് പുറമെ ധനകാര്യമന്ത്രി നിര്മ്മലാ സീതാരാമന്, വാര്ത്താ വിതരണ പ്രക്ഷേപണ വകുപ്പ് മന്ത്രി പ്രകാശ് ജാവദേക്കര്, ന്യൂനപക്ഷ ക്ഷേമ മന്ത്രി മുക്താര് അബ്ബാസ് നഖ്വി, മാനവ വിഭവശേഷി വകുപ്പ് മന്ത്രി രമേഷ് പൊഖ്രിയാല്, പെട്രോളിയം മന്ത്രി ധര്മ്മേന്ദ്ര പ്രധാന്, ഭക്ഷ്യ പൊതു വിതരണ വകുപ്പ് മന്ത്രി രാം വിലാസ് പാസ്വാന്, റെയില് വേ മന്ത്രി പീയൂഷ് ഗോയല്, അടക്കമുള്ളവര് ഇന്നലെ ചുമതലയേറ്റിരുന്നു.
കേന്ദ്ര മന്ത്രിസഭയിലെ മലയാളി സാന്നിധ്യമായ വി.മുരളീധരനും ഇന്നലെ ചുമതലയേറ്റെടുത്തു. വൈകുന്നേരം 4.45 ഓടെയാണ് ഓഫീസിലെത്തി ചുമതലയേറ്റെടുത്തത്. വിദേശ, പാര്ലമെന്ററി കാര്യ സഹമന്ത്രിയാണ് വി മുരളീധരന്.
