രാജ്യഭരണം കുടുംബസ്വത്താക്കിയ കാട്ടുകള്ളന്മാര് ആര്ത്തുവിളിച്ചത് ‘ചൗക്കിദാര് ചോര് ഹേ” എന്നാണ്. കാവല്ക്കാരന് കള്ളനാണത്രെ… റഫാലിന്റെ പേരില് നട്ടാല്കിളിര്ക്കാത്ത നുണ ആവര്ത്തിച്ചുവിളിച്ചുകൂവിയാണ് നമ്പര് 10 ജന്പഥിലെ ആര്ത്തിക്കാരനും അടുക്കളക്കാരും രാജ്യത്തിന്റെ പ്രധാനമന്ത്രിയെ കള്ളനെന്ന് വിളിച്ചത്. എന്നാല് മോദി രാജ്യത്തോട് പറഞ്ഞത്, ”ആ… ഞാന് ചൗക്കിദാറാണ്, നിങ്ങളോരോരുത്തരും ചൗക്കിദാറാണ്, ഭാരതത്തിന്റെ കാവല്ക്കാരാണ്… നമുക്ക് അഭിമാനിക്കാം രാഷ്ട്രത്തിന്റെ കാവല്ക്കാരാണെന്ന് പറയുന്നതില്…” വിസ്മയകരമായിരുന്നു പ്രതികരണം. രാഷ്ട്രത്തെ സ്നേഹിക്കുന്ന ഓരോരുത്തരും സ്വയം രംഗത്തുവന്നു, നെഞ്ചത്ത് കൈവെച്ച് വിളിച്ചുപറഞ്ഞു, ”മേം ഭി ചൗക്കിദാര് ഹൂം.’
പത്താന്കോട്ടില് ഭീകരാക്രമണം നടത്തി കടന്നുകളഞ്ഞ പാക്കിസ്ഥാനികളെ തേടി ഉറിയില് മിന്നലാക്രമണം നടത്തിയ ചൗക്കിദാറാണ് ഭാരതത്തെ നയിക്കുന്നതെന്ന് ഓരോരുത്തരും വിളിച്ചു പറഞ്ഞു. പാക്കിസ്ഥാന് ഭീരുക്കള് പുല്വാമയില് പതിയിരുന്ന് ആക്രമിച്ച കാലമായിരുന്നു അത്. എന്താണ് ചൗക്കിദാറിന്റെ കരുത്തെന്ന് പതിനാറാം നാള് അവരറിഞ്ഞു. പുല്വാമയിലേക്ക് ചാവേറിനെ കടത്തിവിട്ട് ഒളിച്ചിരുന്നുചിരിച്ച ജെയ്ഷെ മുഹമ്മദിന്റെ ആസ്ഥാനം ഇന്ത്യന് വ്യോമസേന ചുട്ടുചാമ്പലാക്കി. പുല്വാമയ്ക്ക് ബലാക്കോട്ടില് മറുപടി. പാക്കിസ്ഥാന്റെ മണ്ണില്കയറി പ്രത്യാക്രമണം. അതിനിടയില് പാക്ക് സൈനികരുടെ പിടിയിലായ കമാന്ഡര് അഭിനന്ദന് വര്ധമാന് ഇന്ത്യന് യുവത്വത്തിന്റെ ഐക്കണായി മാറി.. നെഞ്ച് വിരിച്ച് അഭിനന്ദന് മടങ്ങിവന്നു. മിഗും മിറാഷും തീതുപ്പി അരങ്ങുവാണ കാലത്താണ് ഭീരുക്കള് നുണപ്രചാരണത്തിനിറങ്ങിയത്. ആക്രമിച്ചുകടന്നുകളയാന് പഴയ ഇന്ത്യയല്ല ഇതെന്ന് ഭീകരര് തിരിച്ചറിഞ്ഞു… പിന്തുടര്ന്ന് കീഴ്പ്പെടുന്ന പുത്തന് യുദ്ധതന്ത്രം രാജ്യം നടപ്പാക്കി. ഭാരതം ലോകത്തിന് മുന്നില് കരുത്തോടെ തല ഉയര്ത്തിപ്പിടിച്ചു.
പാക്കിസ്ഥാന് മാത്രമല്ല ധോക്ലാമില് ചൈനയും ചൗക്കിദാറിന്റെ കരുത്തറിഞ്ഞു. പാളയമൊരുക്കി സ്ഥിരതാമസമാക്കാന് വന്നിറങ്ങിയ ചൈനീസ് പട ആരുമറിയാതെ പിന്വാങ്ങി. വിദേശരാജ്യങ്ങളില് തടവറകളില് കഴിഞ്ഞ ആയിരക്കണക്കിന് ഭാരതീയര് മോചിപ്പിക്കപ്പെട്ടു. കൊടുംഭികരന് മസൂദ് അസര് ആഗോള ഭീകരനായി ലോകരാജ്യങ്ങള് പ്രഖ്യാപിച്ചു. രാജ്യത്തിന്റെ സമ്പത്ത് കൊള്ളയടിച്ച് മുങ്ങിയ വിജയ് മല്യയെയും നീരവ് മോദിയെയും വിദേശത്തിട്ട് പൂട്ടി.
ഇന്ത്യന് സേനയാകെ നവീകരിക്കപ്പെട്ടു. ദുര്ഗകള് സേനയെ നയിച്ചു. നിര്മല സീതാരാമന്റെ നേതൃത്വത്തില് പ്രതിരോധസേനയും സുഷമ സ്വരാജിന്റെ നേതൃത്വത്തില് വിദേശകാര്യവും രാജ്യം ഭദ്രമാക്കി… രാഷ്ട്രവിരുദ്ധ ഏജന്സികളെയെല്ലാം കര്ശനമായി പിന്തുടര്ന്ന് നശിപ്പിച്ചു. രാഷ്ട്രഹിതമാണ് എന്തിനും മുകളില് എന്ന് പ്രഖ്യാപിക്കുന്ന കരുത്തുള്ള ഭരണസംവിധാനം നിലവില് വന്നു. ചൗക്കിദാര് ചോര് ഹേ എന്ന് ആര്ത്തുവിളിച്ചവര് ആവര്ത്തിച്ച് മാപ്പ് പറഞ്ഞു. ജനങ്ങള് അവരെ നിലം തൊടീക്കാതെ പരാജയപ്പെടുത്തി. രാഷ്ട്രരക്ഷയുടെ കാവാലാളാകാന് ഓരോ ഭാരതീയനും തയ്യാറെന്ന് പ്രഖ്യാപിക്കുകയാണ് കാലം…
